Qürurumuzun, zəfərimizin və birliyimizin təntənəsi

Bakı:

15 °C

67 %

6 m/s

Əlaqə

AZ RU EN

Ana səhifə / YAP xəbərləri / Qürurumuzun, zəfərimizin və birliyimizin təntənəsi

Qürurumuzun, zəfərimizin və birliyimizin təntənəsi

08.11.2025 [19:34]

8 Noyabr Şuşa şəhəri günü Azərbaycan tarixində əbədi olaraq qızıl hərflərlə yazılmış bir gündür. Bu tarix xalqımızın 30 illik həsrətinə son qoyan, torpaqlarımızın azadlığı və milli qürurumuzun bərpası ilə nəticələnən Böyük Zəfər Günü kimi yaddaşlara həkk olunub.

2020-ci ilin noyabrında Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 günlük Vətən müharibəsində misilsiz qəhrəmanlıq göstərərək, düşməni torpaqlarımızdan qovdu. 8 noyabr 2020-ci il isə bu qəhrəmanlıq dastanının zirvəsinə çevrildi Şuşa azad olundu. Şuşanın azadlığı ilə Vətən müharibəsi faktiki olaraq başa çatdı, Azərbaycanın ərazi bütövlüyü bərpa olundu, xalqımızın illərlə arzuladığı qələbə gerçəyə çevrildi. Bu Zəfər, dövlətimizin siyasi iradəsi, ordumuzun gücü və xalqımızın sarsılmaz birliyinin nəticəsi idi. Prezident İlham Əliyevin sözləri ilə desək: “Şuşasız bizim işimiz yarımçıq olardı. Şuşanın azadlığı həm döyüş meydanında, həm də mənəvi sahədə qələbəmizin rəmzidir.”

Azərbaycan xalqı üçün Şuşa təkcə bir şəhər deyil bu torpaq milli kimliyimizin, mədəniyyətimizin və ruhumuzun beşiyidir. Üzeyir Hacıbəyli, Bülbül, Xurşidbanu Natəvan kimi dahilər burada yetişib, Şuşa muğamın, poeziyanın, incəsənətin mərkəzinə çevrilib. Bu gün isə Azərbaycan dövləti tərəfindən həyata keçirilən bərpa və yenidənqurma işləri nəticəsində Şuşa öz tarixi görkəmini bərpa edir. Tarixi məscidlər, qala divarları, Vaqifin məqbərəsi, Xurşidbanu Natəvanın evi və digər mədəni irs nümunələri bərpa olunur, şəhər yeni həyat qazanır.

2022-ci ilin “Şuşa İli” elan edilməsi, Vaqif Poeziya Günləri, Xarıbülbül Musiqi Festivalı, “Şuşa Türk dünyasının mədəniyyət paytaxtı” kimi beynəlxalq tədbirlər şəhərin mədəni dirçəlişinin parlaq göstəricisidir. Bu tədbirlər təkcə mədəniyyətin deyil, həm də milli birliyin, vətən sevgisinin təntənəsidir.

Şuşanın azad olunması yalnız torpağın deyil, həm də xalq ruhunun azadlığıdır. Bu qələbə gənc nəslə vətənpərvərlik dərsidir, Azərbaycanın dövlətçilik tarixində yeni bir mərhələ açıb. Bu gün Şuşada dalğalanan üçrəngli bayraq hər bir azərbaycanlı üçün qürur, inam və yenilməzlik simvoludur.

Azərbaycan dövləti Şuşanı Cənubi Qafqazın ən mühüm mədəni və turizm mərkəzinə çevirmək üçün ardıcıl addımlar atır. Yeni yollar, hava limanı, yaşayış binaları, məktəblər, muzeylər və mədəniyyət mərkəzləri şəhərin gələcəyinə xidmət edir. Şuşa təkcə keçmişin deyil, həm də gələcəyin şəhəridir müasir Azərbaycanın gücünü, dirçəlişini və milli birliyini təcəssüm etdirir.

8 Noyabr Şuşa şəhəri günü, Azərbaycan xalqının iradəsinin, dövlətimizin qüdrətinin və ordumuzun qəhrəmanlığının təntənəsidir. Bu gün biz yalnız Şuşanın azadlığını deyil, həm də xalqımızın milli dirçəlişini qeyd edirik. Hər yeni layihə, hər bərpa olunan bina, hər yenidən qurulan küçə bir xalqın əzmini, iradəsini və dövlətin gələcəyə inamını əks etdirir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 320 dəfə