Yeni Azərbaycan Partiyası Müstəqil Azərbaycan dövlətçiliyinin əsas dayaqlarından biridir

Bakı:

25 °C

69 %

7 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası Müstəqil Azərbaycan dövlətçiliyinin əsas dayaqlarından biridir

Yeni Azərbaycan Partiyası Müstəqil Azərbaycan dövlətçiliyinin əsas dayaqlarından biridir

20.11.2025 [17:00]

Eldar Əsədov

YAP Tərtər rayon təşkilatının sədri

Azərbaycan xalqının çoxəsrlik dövlətçilik tarixi göstərir ki, hər bir milli yüksəliş, hər bir tarixi dönüş xalqın iradəsi və uzaqgörən liderin müdrik rəhbərliyi ilə mümkündür. XX əsrin sonlarında, müstəqilliyini yenicə bərpa etmiş, lakin daxili çətinliklər, siyasi böhran və separatizm təhlükəsi ilə üzləşən Azərbaycana məhz belə bir lider və siyasi qüvvə lazım idi. Bu zərurətdən doğan hadisə – 1992-ci il 21 noyabrda Yeni Azərbaycan Partiyasının yaranması – müasir tariximizin ən mühüm siyasi mərhələlərindən biridir. O dövrdə xalqın taleyi, dövlətin gələcəyi sual altında idi. Məhz bu şəraitdə xalqın istəyi ilə formalaşan Yeni Azərbaycan Partiyası milli birliyin, dövlətçiliyin və sabitliyin bərqərar olmasında əsas rol oynadı.

Ulu Öndər Heydər Əliyev deyirdi: “Yeni Azərbaycan Partiyası xalqın partiyasıdır, gələcəyin partiyasıdır, Azərbaycanın tərəqqisi və sabitliyi bu partiyanın fəaliyyətindən asılı olacaq.” Bu fikirlər zamanla tam təsdiqini tapdı. 2003-cü ildə ümummilli liderin siyasi kursunun layiqli davamçısı, Yeni Azərbaycan Partiyasının sədri İlham Əliyev Prezident seçildikdən sonra partiyanın fəaliyyəti yeni mərhələyə qədəm qoydu. Prezident İlham Əliyev YAP-ın ideoloji əsaslarını müasir çağırışlara uyğun şəkildə inkişaf etdirdi.

Bu gün, partiyanın yaranmasının 33-cü ildönümünü qeyd edərkən aydın görürük ki, Yeni Azərbaycan Partiyası (YAP) təkcə bir siyasi təşkilat deyil, Azərbaycan dövlətçiliyinin ideoloji sütunu, sabitliyin təminatçısı və inkişafın lokomotividir. Yeni Azərbaycan Partiyası qısa müddətdə xalqın etimadını qazanaraq, ölkədə siyasi sabitliyin və inkişafın əsas qüvvəsinə çevrildi.Ulu Öndər Heydər Əliyev Yeni Azərbaycan Partiyasının yaranması ilə ölkədə milli ideoloji dirçəlişin əsasını qoydu. Onun rəhbərliyi ilə partiya cəmiyyətin bütün təbəqələrini bir araya gətirərək milli birliyi təmin etdi.

2003-cü ildən etibarən YAP-ın sədri, ölkə Prezidenti İlham Əliyev Ulu Öndərin siyasi kursunu müasir dövrün çağırışlarına uyğun şəkildə inkişaf etdirmişdir. Prezident İlham Əliyev dövründə Azərbaycan: sürətli iqtisadi yüksəliş mərhələsinə qədəm qoydu, enerji və nəqliyyat mərkəzinə çevrildi, ordu quruculuğu sahəsində dünya standartlarına çatdı , beynəlxalq nüfuz baxımından lider dövlət statusu qazandı, multikulturalizm və tolerantlıq modeli ilə fərqləndi.

Partiyanın VII Qurultayında qəbul edilən qərarlar — strukturun yenilənməsi, gənclərin fəallığının artırılması, ictimai nəzarət və rəqəmsal islahatların gücləndirilməsi — YAP-ı müasir dövrün tələblərinə uyğun siyasi təşkilata çevirdi.

Azərbaycanın tarixində ən şərəfli səhifələrdən biri olan 44 günlük Vətən müharibəsi Yeni Azərbaycan Partiyasının dövlətçilik ideologiyasının praktiki təntənəsi idi. Müzəffər Ali Baş Komandan İlham Əliyevin rəhbərliyi altında Azərbaycan Ordusu 30 il davam edən işğala son qoydu, tarixi ədaləti bərpa etdi, ərazi bütövlüyünü təmin etdi. Bu Qələbə YAP-ın əsas prinsipləri – dövlətə sədaqət, milli həmrəylik və güclü liderlik konsepsiyasının parlaq təzahürü idi. Qarabağda və Şərqi Zəngəzurda bu gün həyata keçirilən böyük bərpa və quruculuq işləri, “Böyük Qayıdış” proqramı və Zəngəzur dəhlizi kimi strateji layihələr Yeni Azərbaycan Partiyasının müasir siyasi xəttinin davamıdır.

Bu gün Yeni Azərbaycan Partiyası təkcə iqtidar partiyası deyil, həm də dövlətlə xalq arasında etimad körpüsüdür. Partiyanın 740 mindən çox üzvü arasında alimlər, gənclər, müəllimlər, həkimlər, fermerlər, şəhid ailələri var. Onlar ölkənin ictimai-siyasi həyatında fəal iştirak edir, Prezident İlham Əliyevin müəyyən etdiyi strateji hədəflərin reallaşmasına töhfə verirlər.

YAP-ın ideoloji xəttində sosial rifah və insan amili hər zaman ön plandadır. Prezident İlham Əliyevin rəhbərliyi ilə həyata keçirilən sosial proqramlar — minimum əməkhaqlarının artırılması, şəhid ailələrinin, qazilərin, gənclərin və müəllimlərin sosial müdafiəsi, regionların inkişaf proqramları — partiyanın əsas məqsədinin xalq rifahını təmin etmək olduğunu sübut edir. Onu da qeyd edim ki, YAP həm də milli-mənəvi dəyərlərin qorunmasına, milli kimliyin və dilin saflığının saxlanılmasına xüsusi diqqət yetirir. Yeni Azərbaycan Partiyasının 33 illik fəaliyyəti sübut edir ki, bu siyasi təşkilat xalqın partiyası, dövlətçiliyin dayağı, sabitliyin və inkişafın təminatçısıdır.

Ulu Öndər Heydər Əliyevin ideyalarına söykənən, Prezident Cənab İlham Əliyevin müdrik siyasəti ilə inkişaf edən YAP bu gün Azərbaycanın güclü, qalib və müasir dövlət kimi mövqeyini möhkəmləndirir. 1992-ci il 21 noyabrdan başlayan bu yol millətin dirçəlişi, dövlətin qüdrəti və gələcəyin parlaq təminatı yoludur.

Bu əlamətdar gün münasibətilə Ulu Öndər Heydər Əliyevin ideyalarına sadiq qalaraq partiyamızı yüksək mərhələyə çatdıran, müasir və qalib Azərbaycanın qurucusu, Möhtərəm Prezident, Yeni Azərbaycan Partiyasının Sədri cənab İlham Əliyevi və partiyamızın bütün üzvlərini ürəkdən təbrik edirik!

Yeni Azərbaycan Partiyasının 33 illik şərəfli yolu xalqın etimadının, dövlətin sabitliyinin və müstəqilliyimizin möhkəm dayağı olmuşdur. Arzu edirik ki, YAP bundan sonra da Azərbaycan dövlətçiliyinin, milli birliyin və xalqın rifahının təminində ön sırada olsun, daha böyük nailiyyətlərə imza atsın. Müstəqil dövlətimizin, xalqımızın rifahı naminə Yeni Azərbaycan Partiyasına gələcək fəaliyyətində uğurlar, birliyimizə möhkəmlik, dövlətçiliyimizə əbədilik arzulayırıq.

Yaşasın Yeni Azərbaycan Partiyası!

Paylaş:

Baxılıb: 760 dəfə