25 noyabr yaxın və uzaq keçmişimizi bir daha yada salır

Bakı:

4 °C

65 %

8 m/s

Əlaqə

AZ RU EN

Ana səhifə / YAP xəbərləri / 25 noyabr yaxın və uzaq keçmişimizi bir daha yada salır

25 noyabr yaxın və uzaq keçmişimizi bir daha yada salır

25.11.2025 [20:17]

Artıq 5 ildir ki, 25 noyabr Azərbaycanda Kəlbəcərin işğaldan azad edilidiyi gün kimi qeyd edilir. Bu gün XX əsrin sonlarında və XXI əsrin əvvəllərində xalqımızın yaşadığı böyük sınaqları, fədakarlığı və nəhayət, tarixi qələbəni xatırladan xüsusi bir gündür. Kəlbəcərin 2020-ci il noyabrın 25-də bir güllə belə atılmadan, üçtərəfli Bəyanata uyğun şəkildə Azərbaycana qaytarılması həm ölkəmizin hərbi-siyasi gücünün, həm də xalqımızın əzmkarlığının parlaq təzahürüdür. Bu səbəbdən 25 noyabr təkcə bir coğrafi məkanın azad olunma tarixi deyil, bütöv Azərbaycanın milli birliyinin, haqlı mübarizəsinin və bərpa olunmuş ədalətin simvoludur.

Kəlbəcər bölgəsi Azərbaycanın ən gözəl təbiətə malik regionlarından biridir. Zəngin meşələr, dağlar, çaylar, dağ-mədən ehtiyatları və minillik tarixə söykənən mədəni abidələr Kəlbəcəri ölkənin nadir incilərindən birinə çevirir. Lakin 1993-cü ildə rayonun işğalı ilə bu təbiətə, abidələrə, eləcə də bölgənin sosial-mədəni həyatına ağır zərbə dəymişdi. Yüz minlərlə kəlbəcərli öz doğma yurdundan didərgin düşmüş, təbiət və mədəni irs vandalizmə məruz qalmışdı. Bu acı tarix 2020-ci ilin 25 noyabrına qədər davam etdi və həmin gün Kəlbəcərin yenidən Azərbaycan nəzarətinə keçməsi bütöv bir bölgənin dirçəlişi üçün yeni ümidlər yaratdı.

Bu gün Kəlbəcər sürətlə bərpa olunur. Yol infrastrukturu, yaşayış məntəqələri, enerji təminatı, sosial obyektlər ardıcıl şəkildə tikilir. Bölgənin böyük strateji əhəmiyyətə malik olması, mühüm dağ aşırımları, təbii sərvətləri onun bərpasını dövlət üçün prioritet sahələrdən birinə çevirib. Xüsusilə də “Ağdərə–Kəlbəcər”, “Toğanalı–Kəlbəcər–İstisu”, “Kəlbəcər–Laçın” yollarının yenidən qurulması, İstisu sanatoriyasının bərpasına başlanması bölgənin sosial-iqtisadi inkişafına böyük təkan verir. Bu proses həm də doğma yurdlarına qayıdacaq kəlbəcərlilər üçün yeni həyat deməkdir.

25 Noyabr - Kəlbəcər Şəhəri Günü yalnız təntənəli tədbirlərlə qeyd edilən bir tarix deyil. O, hər bir azərbaycanlı üçün doğma torpağa bağlılıq, milli yaddaş və dövlətçilik təfəkkürünün mühüm bir parçasıdır. Bu gün Kəlbəcərin azadlığı uğrunda canını fəda etmiş şəhidlərimizin xatirəsinə ehtiram göstərilir, onların ruhu qarşısında baş əyilir. Eyni zamanda bu gün gələcəyə nikbin baxış yaradır; çünki Kəlbəcər artıq dağıntıların yox, quruculuğun, inkişafın və yenidən doğuluşun ünvanıdır.

Noyabrın 25-i bizə həm də böyük bir həqiqəti xatırladır: Azərbaycan xalqı öz torpaqlarına sahib çıxmağı bacaran, milli iradəsini qoruyan, tarixin çətin sınaqlarından alnıaçıq çıxan bir xalqdır. Kəlbəcər Şəhəri Gününün qeyd olunması bu iradənin, bu yaddaşın və bu qürurun təcəssümüdür.

Hər il bu tarix yaxın və uzaq keçmişimizi xatırladır, eyni zamanda işıqlı gələcək yolunda birliyimizi möhkəmləndirir.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 338 dəfə