"Biz ətraf mühit sahəsində çox işləri görməli olduq" – Şəhərsalma Forumu və gəncliyin ekoloji məsuliyyəti

Bakı:

22 °C

66 %

5 m/s

AZ RU EN

Ana səhifə / YAP xəbərləri / "Biz ətraf mühit sahəsində çox işləri görməli olduq" – Şəhərsalma Forumu və gəncliyin ekoloji məsuliyyəti

"Biz ətraf mühit sahəsində çox işləri görməli olduq" – Şəhərsalma Forumu və gəncliyin ekoloji məsuliyyəti

22.05.2026 [12:05]

Bakıda keçirilən Ümumdünya Şəhərsalma Forumunun 13-cü sessiyası, qlobal urbanizasiya problemlərinin müzakirə edildiyi mötəbər bir platforma olmaqla yanaşı, həm də Azərbaycanın gələcək inkişaf strategiyasını dərk etmək üçün mühüm bir imkan yaratdı. Prezident İlham Əliyevin forumdakı proqram xarakterli çıxışını izləyərkən, hər bir gəncin üzərində xüsusilə dayanmalı olduğu mühüm bir məqam var idi. Dövlət başçısının "Biz ətraf mühit sahəsində çox işləri görməli olduq" fikri, sadəcə icra olunan layihələrin hesabatı deyil, ölkənin gələcək simasını müəyyən edəcək gənclər üçün ciddi bir vizyon mesajıdır.

Müasir dünyada güclü dövlət anlayışı artıq sadəcə iqtisadi göstəricilərlə deyil, həm də ekoloji tarazlıq, "yaşıl artım" və dayanıqlı şəhərsalma prinsipləri ilə ölçülür. Dövlət başçısının çıxışında qeyd etdiyi o "görülməli olan böyük işlər" əslində çox çətin və böyük fədakarlıq tələb edən bir prosesin nəticəsidir. Keçmişdən qalan ekoloji gərginliyin aradan qaldırılması, sənaye tullantıları ilə çirklənmiş ərazilərin təmizlənərək yenidən şəhər infrastrukturuna qazandırılması və müasir yaşıl zonaların yaradılması ölkəmizdə ekoloji təhlükəsizliyin təmin olunmasında mühüm mərhələ teşkil edib.

Biz gənclər olaraq bu dəyişikliyi hər gün şəhərlərimizin yenilənən simasında, salınan yeni meqa-parklarda və ekoloji cəhətdən bərpa edilən ərazilərdə aydın görürük. Lakin bu xüsusi vurğu bizə onu xatırladır ki, ekoloji təhlükəsizlik və dayanıqlı şəhərsalma bitən bir proses deyil. Bu, hər gün qorunması və davam etdirilməsi vacib olan bütöv bir sistemdir. Məhz bu məqamda yaradılan bu yaşıl infrastrukturu qorumaq və daha da inkişaf etdirmək missiyası indiki gəncliyin üzərinə düşür.

Dəyişən dünya şərtləri daxilində artıq gənclər üçün yalnız müəyyən bir sahə üzrə ixtisaslaşmaq kifayət etmir. İndiki dövrün fəal gənci həm də yüksək ekoloji savadlılığa və qlobal trendləri analiz etmək bacarığına sahib olmalıdır. Əgər bu gün dövlət səviyyəsində ətraf mühitin qorunması prioritet hədəf kimi qarşıya qoyulursa, deməli, gələcəyin memarları, mühəndisləri, idarəçiləri və iqtisadçıları olacaq gənclər də öz fəaliyyətlərini bu "yaşıl fəlsəfə" üzərində qurmalıdırlar. Prezidentin çıxışındakı sətiraltı mesaj da elə bundan ibarətdir: Azərbaycanı dünyada ekoloji cəhətdən nümunəvi bir ölkəyə çevirmək birbaşa gəncliyin intellektual məsuliyyətidir.

Bu baxımdan, Şəhərsalma Forumu gənclik üçün sadəcə qürurverici bir beynəlxalq tədbir deyil, həm də böyük bir motivasiya və hərəkət nöqtəsidir. Dövlətin gələcək vizyonunun tamamilə ekoloji balans və innovativ şəhərsalma prinsipləri üzərində qurulduğunu görmək, gələcəyə daha inamla baxmağa əsas verir. Bizə ötürülən bu mesajı düzgün oxumalı, fərdi məsuliyyətimizi dərk etməli və Azərbaycanın qlobal səviyyədəki bu yaşıl inkişaf yürüşünə öz elmi və fəal töhfəmizi verməliyik

Aydan Əliyeva

YAP Nərimanov rayon təşkilatının gənc fəalı

Paylaş:

Baxılıb: 246 dəfə