Azərbaycan - Almaniya əməkdaşlığında yeni dövr

Bakı:

25 °C

70 %

16 m/s

Əlaqə

AZ RU EN

Ana səhifə / YAP xəbərləri / Azərbaycan - Almaniya əməkdaşlığında yeni dövr

Azərbaycan - Almaniya əməkdaşlığında yeni dövr

24.07.2026 [10:45]

Elnur Əsədov

YAP Kəngərli rayon təşkilatının əməkdaşı

Azərbaycan Respublikasının Prezidenti İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri iki ölkə arasında münasibətlərin inkişafında mühüm mərhələ kimi qiymətləndirilir. Səfər çərçivəsində keçirilən görüşlər və imzalanan sənədlər strateji dialoqun daha da dərinləşdiyini, əməkdaşlığın yeni istiqamətlər üzrə genişləndirildiyini göstərir.

Dövlət başçısı bəyanatında vurğulayıb ki, imzalanmış sənədlər Azərbaycan–Almaniya əlaqələrini yeni səviyyəyə qaldırır. Uzun müddətdir arzulanan strateji dialoqun başlanması iki ölkə arasında siyasi münasibətlərin daha da möhkəmlənməsinə xidmət edir. Almaniyanın Avropa İttifaqının aparıcı dövlətlərindən biri olması bu əməkdaşlığa xüsusi əhəmiyyət qazandırır və Cənubi Qafqazda sabitlik, təhlükəsizlik və sülhün möhkəmlənməsinə töhfə verir.

İqtisadi əməkdaşlıq da münasibətlərin əsas istiqamətlərindən biridir. Hazırda Azərbaycanda 200-dən çox Almaniya şirkəti uğurla fəaliyyət göstərir və bu rəqəmin gələcəkdə daha da artacağı gözlənilir. Səfər zamanı qarşılıqlı investisiyaların genişləndirilməsi, Almaniya şirkətlərinin Azərbaycanda yeni layihələrdə iştirakı və biznes əlaqələrinin inkişafı məsələləri müzakirə olunub.

Enerji sahəsində əməkdaşlıq da diqqət mərkəzində olub. Azərbaycan artıq təbii qazını Almaniyaya ixrac etməyə başlayıb və hazırda qaz ixracı Avropa İttifaqının 10 ölkəsini əhatə edir. Bununla yanaşı, gələcəkdə yaşıl enerji sahəsində əməkdaşlığın genişləndirilməsi və Azərbaycanın Avropanın enerji təhlükəsizliyində rolunun daha da artırılması qarşıya qoyulan əsas hədəflərdəndir.

Prezident İlham Əliyev nəqliyyat və tranzit imkanlarının inkişafının da xüsusi əhəmiyyət daşıdığını bildirib. Azərbaycanın Şərqlə Qərbi birləşdirən mühüm nəqliyyat qovşağı kimi mövqeyi möhkəmlənir, Almaniya ilə bu sahədə əməkdaşlıq isə Orta Dəhlizin imkanlarının genişlənməsinə və Avropa ilə Asiya arasında yükdaşımaların artmasına töhfə verəcək.

Səfərin mühüm nəticələrindən biri də ABŞ Prezidenti Donald Trampın iştirakı ilə Birgə Bəyannamənin imzalanması olub. Prezident İlham Əliyev bu sənədin 30 ildən artıq davam edən münaqişənin faktiki olaraq başa çatdığını nümayiş etdirdiyini bildirib. Almaniyanın Ermənistan–Azərbaycan münasibətlərinin normallaşmasına və Cənubi Qafqazda davamlı sülhün təmin olunmasına verdiyi dəstək yüksək qiymətləndirilib.

Prezident İlham Əliyev Almaniyanın Azərbaycanın ərazi bütövlüyünün və suverenliyinin bərpasından sonra regionda yaranmış yeni reallıqların qəbul edilməsində, eləcə də sülh prosesinə verdiyi töhfəni xüsusi vurğulayıb. Həmçinin Avropa İttifaqı ilə Azərbaycan arasında əlaqələrin inkişafında Almaniyanın mühüm rol oynadığı qeyd edilib.

Səfər çərçivəsində "Azərbaycan Respublikası ilə Almaniya Federativ Respublikası arasında ikitərəfli əməkdaşlığa dair Strateji Gündəliyə dair Birgə Bəyannamə" və Azərbaycan–Almaniya Biznes Şurasının yaradılmasına dair Birgə Bəyannamə də imzalanıb. Bu sənədlər iqtisadi, siyasi və ticari əməkdaşlığın gələcək inkişafı üçün möhkəm hüquqi və institusional baza yaradır.

Prezident İlham Əliyevin Almaniyaya rəsmi səfəri bir daha göstərdi ki, Azərbaycan–Almaniya münasibətləri yeni inkişaf mərhələsinə qədəm qoyub. Strateji dialoq, enerji tərəfdaşlığı, investisiyalar, nəqliyyat və biznes sahələrində əldə olunan razılaşmalar iki ölkənin əməkdaşlığını daha da gücləndirəcək, regionda sülhə, sabitliyə və qarşılıqlı faydalı tərəfdaşlığın inkişafına mühüm töhfə verəcək.

Paylaş:

Baxılıb: 190 dəfə