YAP Ağcabədi rayon təşkilatının IX konfransı keçirilib

Bakı:

14 °C

72 %

7 m/s

Əlaqə

AZ RU EN

Ana səhifə / YAP xəbərləri / YAP Ağcabədi rayon təşkilatının IX konfransı keçirilib

YAP Ağcabədi rayon təşkilatının IX konfransı keçirilib

08.06.2017 [10:12]

İyunun 7-də Yeni Azərbaycan Partiyası (YAP) Ağcabədi rayon təşkilatının IX konfransı keçirilib. Konfrans iştirakçıları və qonaqlar əvvəlcə partiyanın yaradıcısı, Ümummilli lider Heydər Əliyevin rayondakı abidəsi önünə gül dəstələri düzüb, xatirəsini ehtiramla anıblar.
Yaqub Məmmədov adına Ağcabədi Mədəniyyət Mərkəzində keçirilən konfrans Yeni Azərbaycan Partiyasının yaranması, təşəkkülü və keçdiyi inkişaf yolundan, həmçinin YAP Ağcabədi rayon təşkilatının hesabat dövründə gördüyü işlərdən bəhs edən videoçarxın nümayişi ilə başlayıb. Sonra Azərbaycan Respublikasının Dövlət Himni səsləndirilib.
Hesabat məruzəsi ilə çıxış edən YAP Ağcabədi rayon təşkilatının sədri Rövşən Əhmədov VIII konfransdan ötən dövr ərzində görülən işlər barədə ətraflı məlumat verib. Çıxışında həmçinin hesabat dövründə rayon təşkilatının Ümummilli lider Heydər Əliyevin ideyalarını, Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin proqram xarakterli nitqlərini, partiyanın İcra Katibliyinin tövsiyə və tapşırıqlarından irəli gələn vəzifələri əsas fəaliyyət istiqaməti kimi daim rəhbər tutduğunu deyən Rövşən Əhmədov YAP Ağcabədi rayon təşkilatının üzvlərinin bundan sonra da üzərlərinə düşən vəzifələrin layiqincə yerinə yetirilməsinə çalışacaqlarını bildirib.
Sonra Nəzarət-Təftiş Qrupunun sədr müavini Elsevər İsmayılov hesabat məruzəsi ilə çıxış edib.
Məruzə ətrafında çıxış edən rayondakı Heydər Əliyev Mərkəzinin direktoru Məhsəti Ağayeva, YAP Ağcabədi rayon təşkilatı Gənclər Birliyinin sədri Elnur Quliyev, YAP Ağcabədi rayon təşkilatı Qadınlar Şurasının sədri Radə Qafarova rayon təşkilatının hesabat dövrü ərzindəki fəaliyyətini qənaətbəxş hesab etdiklərini vurğulayıblar.
Konfransda çıxış edən Yeni Azərbaycan Partiyası İdarə Heyətinin üzvləri - Milli Məclisin Aqrar siyasət komitəsinin sədri Eldar İbrahimov və YAP İcra Katibliyinin əməkdaşı Kərim Kərimov partiyanın yaranma tarixi və Azərbaycanın inkişafındakı rolundan danışıblar. Qeyd olunub ki, Yeni Azərbaycan Partiyası Azərbaycan dövlətçiliyinin ən ağır sınaqlar qarşısında qaldığı bir zamanda xalqın istək və arzularının nəticəsi olaraq tarixi zərurətdən yarandı. Yarandığı ilk gündən YAP ölkəmizin siyasi səhnəsində uğurla fəaliyyət göstərərək, milli müstəqilliyimizin qorunmasında, dövlətçiliyimizin möhkəmləndirilməsində, iqtisadiyyatımızın inkişaf etdirilməsində özünün layiqli töhfələrini verib.
Natiqlər vurğulayıblar ki, YAP əldə etdiyi uğurlarla qələbələr partiyası olduğunu sübuta yetirib. YAP milli dəyərlərə söykənərək inkişaf edir. Ona görə də hazırda YAP Azərbaycanın ən böyük siyasi təşkilatı olmaqla bərabər, həm də öz xalqına ən yaxın siyasi təşkilatdır.
Çıxış edən YAP Siyasi Şurasının üzvü, Ağcabədi rayon İcra Hakimiyyətinin başçısı Şahin Məmmədov Yeni Azərbaycan Partiyasının ölkənin ictimai-siyasi həyatındakı rolu, keçdiyi inkişaf yolu, Prezident İlham Əliyevin rəhbərliyi ilə qazanılan uğurlarda iştirakı barədə geniş söz açıb.
Sonra təşkilati məsələlərə baxılıb. YAP Ağcabədi rayon təşkilatının 45 nəfərdən ibarət Şurası, 13 nəfərdən ibarət İdarə Heyəti, 9 nəfərdən ibarət Nəzarət-Təftiş Qrupu seçilib. Rövşən Əhmədov yenidən YAP Ağcabədi rayon təşkilatının sədri seçilib.

Paylaş:

Baxılıb: 768 dəfə