Azərbaycan və Mərkəzi Asiya ölkələri arasında çoxsaylı layihələr həyata keçirilir

Bakı:

17°C

72%

4m/s

Əlaqə

AZ RU EN

Ana səhifə / YAP xəbərləri / Azərbaycan və Mərkəzi Asiya ölkələri arasında çoxsaylı layihələr həyata keçirilir

Azərbaycan və Mərkəzi Asiya ölkələri arasında çoxsaylı layihələr həyata keçirilir

19.09.2023 [16:09]

Azərbaycan Respublikasının Prezidenti İlham Əliyev sentyabrın 14-də Düşənbədə Mərkəzi Asiya Dövlət Başçılarının 5-ci Məşvərət görüşündə iştirak edib və öz çıxışında çox mühüm məsələlərə toxunmuşdur. Prezident İlham Əliyev görüşdə Tacikistan Prezidenti Emoməli Şaripoviç Rəhmonun dəvəti ilə fəxri qonaq qismində iştirak edib. Bu region ölkələrinin Azərbaycan ilə dərin tarixi qarşılıqlı əlaqələrinin və əməkdaşlığının yüksək səviyyəsinin daha bir təsdiqidir.

Tərəqqi yolunu seçmiş Azərbaycan özünün qonşusu olan və olmayan digər dövlətlərlə, həm ikitərəfli, həm də çoxtərəfli əsasda bərabər və qarşılıqlı faydalı münasibətlərin qurulub inkişaf etdirilməsini həyata keçirmək əzmindədir.

Azərbaycan və Mərkəzi Asiya xalqlarını çoxəsrlik qardaşlıq münasibətləri, ortaq mədəni köklər bağlayır. Bu gün Mərkəzi Asiya ölkələrindən Avropaya gedən ən qısa və təhlükəsiz tranzit daşımalar məhz ölkəmizin ərazisindən həyata keçirilir. Ölkəmiz reallaşdırdığı nəhəng infrastruktur layihələri ilə Avropa ilə Asiya arasında alternativsiz nəqliyyat qovşağına və tranzit mərkəzinə çevrilməkdədir. Azərbaycan Mərkəzi Asiya ölkələri üçün Türkiyə və Avropa bazarları istiqamətində etibarlı tranzit ölkəsidir. Şərq-Qərb dəhlizi Avropa ilə Asiya arasında ən qısa, təhlükəsiz və səmərəli bağlantı olaraq Avrasiya məkanında sərnişin və nəqliyyat daşımalarının gücləndirilməsinə böyük töhfə verəcək.

Azərbaycan və Mərkəzi Asiya ölkələri arasında sənaye əməkdaşlığı, maşınqayırma, avtomobil sənayesi, gəmiqayırma, kənd təsərrüfatı, xüsusən də pambıqçılıq, ipəkçilik, bağçılıq və heyvandarlıq sahələrində çoxsaylı layihələr həyata keçirilir. Təkcə 2022-ci ildə Azərbaycanın Mərkəzi Asiya ölkələri ilə ticarət dövriyyəsi 3 dəfədən çox, 2023-cü ilin ilk 7 ayı ərzində isə daha 50 faiz artıb. Həmçinin, birgə sərmayə fondları yaradılıb, növbəti 3 il üzrə 1 milyard dollardan artıq qarşılıqlı sərmayələrin həcmi barədə razılıq əldə olunub. Əməkdaşlığın yeni sahəsi fiber-optik infrastrukturun yaradılmasına yönəlmiş və hal-hazırda da üzərində işlənilən “Rəqəmsal İpək Yolu” layihəsidir. Regional əməkdaşlığın bu formatı ölkələrimizin və xalqlarımızın daha da yaxınlaşmasına zəmin yaradacaq.

Qloballaşan müasir dünyada Azərbaycan xalqının maraqlarının daha səmərəli müdafiəsi naminə ölkə iqtisadiyyatının inkişafı üçün müxtəlif layihələrə xarici sərmayələrin cəlb edilməsi də Azərbaycanın xarici siyasəti üçün müstəsna əhəmiyyət daşımaqdadır.

Son illər Azərbaycanın Mərkəzi Asiya ölkələri, o cümlədən türk dövlətləri ilə münasibətlərində böyük canlanma müşahidə olunur. Prezident İlham Əliyevin son bir neçə il ərzində Mərkəzi Asiya, o cümlədən türkdilli ölkələrə ardıcıl səfərləri və həmin dövlət başçılarının Azərbaycana səfərləri əlaqələrimizin genişlənməsini və dərinləşməsini şərtləndirir. Azərbaycan dövləti xarici siyasətdə balanslaşdırılmış siyasətin yeridilməsinə böyük həssaslıqla yanaşır. Bu gün Azərbaycan fərq qoymadan regionda maraqları olan hər bir beynəlxalq güc mərkəzi ilə bərabərhüquqlu qarşılıqlı faydalı əlaqələr qurmuşdur. Azərbaycanın özünəməxsus layiqli yer tutmasını şərtləndirmək naminə regionun digər dövlətlərinin milli maraqlarına toxunmamaq şərti ilə balanslaşdırılmış xarici siyasi kurs reallaşdırılmışdır.

Prezident İlham Əliyevin rəhbərliyi ilə ölkəmizin xarici siyasəti Azərbaycan dövlətçiliyini müntəzəm şəkildə möhkəmləndirib inkişaf etdirməyə və milli mənafeləri qorumağa yönəlmişdir. Regional səviyyədə bölgədə əmin-amanlıq və sabitliyin bərqərar edilməsi, nəhəng nəqliyyat və əməkdaşlıq layihələrinin gerçəkləşdirilməsi kimi strateji məqsədlərə nail olmaq Azərbaycanın xarici siyasətinin əsas prioritetlərindən birini təşkil etməkdədir. Prezident İlham Əliyev regional qarşılıqlı əməkdaşlığı regionda sülhün və sabitliyin qorunub saxlanılması üçün mühüm amil hesab edir. Regional səviyyədə qarşılıqlı əlaqələrin daha da inkişaf etdirilərək ən yüksək səviyyəyə qaldırılması regionda həllini gözləyən problemlərin birgə səylərlə, təminatlı şəkildə aradan qaldırılması üçün etibarlı zəmin yaradır.

YAP XƏZƏR RAYON TƏŞKİLATININ SƏDRİ NAMİQ ƏHMƏDOV

Paylaş:

Baxılıb: 308 dəfə