Qərbi Azərbaycan İcmasında Şamama Ələsgərovanın 120 illik yubileyi qeyd olunub

Bakı:

13 °C

94 %

5 m/s

Əlaqə

AZ RU EN

Ana səhifə / Xəbər lenti / Qərbi Azərbaycan İcmasında Şamama Ələsgərovanın 120 illik yubileyi qeyd olunub

Qərbi Azərbaycan İcmasında Şamama Ələsgərovanın 120 illik yubileyi qeyd olunub

31.10.2024 [14:09]

Oktyabrın 31-də Qərbi Azərbaycan İcmasında (QAİ) səhiyyə sahəsində görkəmli təşkilatçı, Əməkdar həkim, ictimai xadim, Azərbaycan SSR Ali Sovetinin deputatı, İkinci Dünya müharibəsinin iştirakçısı, Sosialist Əməyi Qəhrəmanı Şamama Ələsgərovanın 120 illik yubileyinə həsr edilmiş konfrans keçirilib.

AZƏRTAC xəbər verir ki, əvvəlcə Şamama Ələsgərovanın keçdiyi şərəfli həyat yolundan və qazandığı misilsiz nailiyyətlərdən bəhs edən videoçarx nümayiş olunub.

Qərbi Azərbaycan İcmasının Qadınlar Şurasının sədri, Milli Məclisin deputatı Məlahət İbrahimqızı Şamama Ələsgərovanın zəngin səhiyyə irsi və ömür yolu barədə danışıb. Bildirib ki, Ş.Ələsgərova səhiyyə sahəsində tədqiqatlarını əsasən ana və uşaqların sağlamlığının qorunmasına, ginekoloji xəstəliklərin müalicə və profilaktikasına həsr edib, respublikamızda malyariya və helmintoz xəstəliklərinə qarşı mübarizə tədbirlərinin fəallarından biri olub. Qeyd edilib ki, Qərbi Azərbaycanın İrəvan şəhərində anadan olan Ş.Ələsgərova ilk təhsilini gimnaziyada alıb. Azərbaycan Tibb İnstitutunu bitirdikdən sonra 1941-ci ildə cəbhəyə yollanan cəsarətli və nümunəvi həkim 1958-ci ildə “Səhiyyə əlaçısı”, iki il sonra respublikanın Əməkdar həkimi adlarına layiq görülüb.

M.İbrahimqızı, eyni zamanda vurğulayıb ki, şərəfli və zəngin yol keçmiş Azərbaycan səhiyyəsi bu gün Prezident İlham Əliyevin və birinci xanım Mehriban Əliyevanın yüksək diqqət və qayğısı ilə əhatə olunub.

Qərbi Azərbaycan İcmasının Ağsaqqallar Şurasının sədri, Milli Məclisin deputatı Əhliman Əmiraslanov Ş.Ələsgərovanın səhiyyə sahəsində əldə etdiyi uğurların nümunəvi xarakter daşıdığını vurğulayıb. Deyib ki, əmək fəaliyyətinə məhz müharibə illərində başlayan Ş.Ələsgərova Azərbaycan SSR Xalq Səhiyyə Komissarlığında şöbə müdiri, Kadrlar idarəsinin rəisi vəzifələrində çalışıb, 1945-ci ildən ömrünün sonunadək N.Krupskaya adına 5 saylı doğum evinin (hazırda həmin doğum evi Şamama Ələsgərovanın adını daşıyır) baş həkimi olub. 1969-cu ildə Sosialist Əməyi Qəhrəmanı adı alan Ş.Ələsgərova Azərbaycanda bu yüksək ada layiq görülən ilk səhiyyə işçisi olub.

İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Şamama xanımın öz işinin xüsusi incəliklərinə yaxşı bələd olduğunu, bu gün də tibb sahəsində onun təcrübəsindən geniş istifadə edildiyini vurğulayıb. O, Ş.Ələsgərovanın fədakarlığının və əzminin hər zaman yaddaşlarda qalacağını qeyd edib.

Tibbi Ərazi Bölmələrini İdarəetmə Birliyinin İcraçı direktoru Vüqar Qurbanov bildirib ki, Şamama Ələsgərova, sadəcə, bir həkim deyil, həm də səhiyyə sahəsində təşkilati işləri ilə fərqlənən, yüksək mənəvi keyfiyyətlərə malik şəxsiyyət idi. Şamama Ələsgərova İkinci Dünya müharibəsi zamanı 416-cı (Taqanroq) diviziyada tibbi briqadaya rəhbərlik edərək yaralı əsgərlərə yardım göstərib, insanların həyatını qorumaq üçün yorulmadan çalışıb. V.Qurbanov qeyd edib ki, Qələbə ilə başa çatan Vətən müharibəsində də qadın həkimlərimiz vəzifələrinin öhdəsindən böyük cəsarətlə, şərəflə gəlib və adlarını Şamama xanımın davamçıları kimi Zəfər tariximizə yazdırıblar.

Qərbi Azərbaycan İcması İdarə Heyətinin üzvü, professor, ictimai xadim Dilarə Seyidzadə isə bildirib ki, İrəvan şəhərindən olan Şamama Ələsgərova cəsur və savadlı səhiyyə işçisi olmaqla yanaşı, yüksək insani keyfiyyətlərə malik idi, əsl Azərbaycan xanımına xas xüsusiyyətləri özündə birləşdirirdi.

Şamama Ələsgərovanın nəvəsi, professor Lalə Cəfərova nənəsi ilə bağlı xatirələrini bölüşüb. Deyib ki, belə parlaq şəxsiyyətin nəvəsi olmaqdan qürur duyur. O bildirib ki, Ş.Ələsgərova ictimai işlərdə də yüksək fəallıq göstərib, Azərbaycan SSR Ali Sovetinin IX çağırış deputatı olub, "Şərəf nişanı" ordeni və digər medallarla təltif edilib.

Paylaş:

Baxılıb: 417 dəfə