Vətən müharibəsi şəhidi Elmar Nəbiyevin xatirəsinə həsr olunmuş anım tədbiri keçirilmişdir

Bakı:

25 °C

55 %

3 m/s

Əlaqə

AZ RU EN

Ana səhifə / Xəbər lenti / Vətən müharibəsi şəhidi Elmar Nəbiyevin xatirəsinə həsr olunmuş anım tədbiri keçirilmişdir

Vətən müharibəsi şəhidi Elmar Nəbiyevin xatirəsinə həsr olunmuş anım tədbiri keçirilmişdir

03.10.2025 [17:25]

Pirallahı Rayon İcra Hakimiyyəti və 186 nömrəli tam orta məktəbin birgə təşkilatçılığı ilə Vətən müharibəsi şəhidi Nəbiyev Elmar Elman oğlunun xatirəsinə həsr olunmuş anım tədbiri keçirilmişdir. Tədbirdə Pirallahı Rayon İcra Hakimiyyəti başçısının birinci müavini Vəzir Səfixanov, başçının müavini Zülfiyyə Məmmədhüseynova, Yeni Azərbaycan Partiyası Pirallahı rayon təşkilatının sədri Emil Abasov, rayon ərazisində fəaliyyət göstərən idarə, müəssisə və təşkilatların nümayəndələri, şəhidin ailə üzvləri, müəllimləri, Vətən müharibəsi iştirakçıları və ictimaiyyət nümayəndələri iştirak etmişlər.

Tədbir Azərbaycan Respublikasının Dövlət Himninin səsləndirilməsi, Ümummilli Lider Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlamış, daha sonra şəhid Elmar Nəbiyevə həsr olunmuş videoçarx nümayiş etdirilmişdir.

İlk olaraq çıxış edən Pirallahı Rayon İcra Hakimiyyəti başçısının müavini Zülfiyyə Məmmədhüseynova 44 günlük Vətən müharibəsinin əhəmiyyətindən bəhs etmiş, bu müharibənin xalqımızın birliyi, ordumuzun gücü və Müzəffər Ali Baş Komandan cənab İlham Əliyevin qətiyyətli rəhbərliyi sayəsində tarixi Qələbə ilə başa çatdığını vurğulamışdır. Çıxış zamanı qeyd edilmişdir ki, bu şanlı Qələbənin qazanılmasında canından keçən şəhidlərimizin, o cümlədən Pirallahı rayon sakini Elmar Nəbiyevin qəhrəmanlığı xalqımız üçün böyük qürur mənbəyidir. Eyni zamanda, Elmar Nəbiyevin göstərdiyi fədakarlıq, cəsurluq və vətənpərvərlik gənc nəsil üçün nümunə kimi dəyərləndirilmiş, məhz belə qəhrəmanlarımızın sayəsində bu gün Azərbaycan xalqının işğaldan azad olunmuş ərazilərdə əmin-amanlıq və sabitlik şəraitində yaşadığı bildirilmişdir.

Daha sonra çıxış edən Yeni Azərbaycan Partiyası Pirallahı rayon təşkilatının sədri Emil Abasov Vətən müharibəsində qazanılan Qələbənin hər bir vətəndaş üçün fəxr mənbəyi olduğunu vurğulamışdır. Şəhidlərin xatirəsinin uca tutulması, onların ailələrinə və qazilərə dövlət tərəfindən göstərilən diqqət və qayğının davamlı xarakter daşıdığı qeyd olunmuş, bu istiqamətdə Yeni Azərbaycan Partiyasının həyata keçirdiyi sosial dəstək tədbirlərindən bəhs edilmişdir. Elmar Nəbiyevin həyat yolu və döyüşlərdə göstərdiyi igidlik bir daha xatırlanmış, onun xatirəsinin daim yaşayacağı vurğulanmışdır.

Yekun olaraq çıxış edən şəhidin müəllimi, hazırda şəhidin adını daşıyan V "a" sinfinin sinif rəhbəri Rəna Mustafayeva Elmar Nəbiyevin məktəb illərindəki davranış və şəxsiyyət xüsusiyyətlərindən bəhs etmiş, onun məsuliyyətli, çalışqan və vətənpərvər bir şagird kimi yadda qaldığını qeyd etmişdir. Bildirilmişdir ki, Elmarın adını daşıyan sinfə rəhbərlik etmək böyük şərəf və məsuliyyətdir. Sinifdə təhsil alan hər bir şagirdə vətən sevgisi, milli dəyərlərə hörmət və məsuliyyət hissinin aşılanması, şəhidin xatirəsinin yaşadılması əsas hədəf kimi müəyyən olunmuşdur.

Tədbirin sonunda şəhidin ailə üzvləri onlara göstərilən diqqət və ehtirama görə dövlət rəhbərliyinə, Pirallahı Rayon İcra Hakimiyyətinə və tədbirin təşkilatçılarına təşəkkür etmişlər. Məktəblilər tərəfindən şəhidlərə həsr olunmuş ədəbi-bədii kompozisiyalar nümayiş olunmuş, Elmar Nəbiyevin həyat və döyüş yolunu əks etdirən stendlər və foto guşələr tədbir iştirakçılarının diqqətinə təqdim edilmişdir.

Anım tədbirindən sonra Pirallahı Rayon İcra Hakimiyyətinin başçısı Vasif İmanov, rayonun hüquq-mühafizə orqanlarının rəhbərləri, idarə və müəssisələrin rəhbərləri, eləcə də ictimaiyyət nümayəndələri şəhid Elmar Nəbiyevin məzarını ziyarət etmiş, onun ruhuna dualar oxunmuş və məzarı üzərinə gül dəstələri qoyulmuşdur.

Sonda şəhidin ailəsi yaşadığı ünvanda ziyarət olunmuş, onlara mənəvi dəstək ifadə edilmişdir.

Allah bütün şəhidlərimizə rəhmət eləsin!

Paylaş:

Baxılıb: 582 dəfə