Multikulturalizm Mərkəzi ləzgi dilində kitabların təqdimatını keçirib

Bakı:

23 °C

78 %

6 m/s

Əlaqə

AZ RU EN

Ana səhifə / Xəbər lenti / Multikulturalizm Mərkəzi ləzgi dilində kitabların təqdimatını keçirib

Multikulturalizm Mərkəzi ləzgi dilində kitabların təqdimatını keçirib

04.03.2026 [15:29]

Bakı Beynəlxalq Multikulturalizm Mərkəzinin (BBMM) və “Samur” Ləzgi Mədəniyyət Mərkəzi İctimai Birliyinin birgə təşkilatçılığı ilə Qusar rayon Heydər Əliyev Mərkəzində ləzgi dilində çap olunmuş Qurban Səidin “Əli və Nino”, ləzgi şairi Eyvaz Güləliyevin “Seçilmiş Əsərlər II Hissə” kitablarının təqdimatı keçirilib.

Azərbaycan Respublikasının Dövlət Himninin səsləndirilməsi ilə başlayan tədbirdən öncə Ülü Öndər Heydər Əliyevin abidəsinin önünə tər güllər düzülüb.

Açılış nitqi ilə çıxış edən BBMM-in icraçı direktorunun müavini Ramin Qəmbərov bildirib ki, “Əli və Nino” və ləzgi şairi Eyvaz Güləliyevin “Seçilmiş əsərlər II hissə” kitabı yalnız ədəbi hadisə deyil, eyni zamanda ölkəmizdə multikultural dəyərlərin qorunmasının və inkişaf etdirilməsinin bariz nümunəsidir. O vurğulayıb ki, Azərbaycan tarixən müxtəlif etnik-dini icmaların, dillərin və mədəniyyətlərin dinc yanaşı yaşadığı məkan olub. Bu zənginlik bizim milli sərvətimizdir.

Ramin Qəmbərov diqqətə çatdırıb ki, dövlətimizin həyata keçirdiyi multikultural siyasət nəticəsində ölkəmizdə yaşayan bütün etnik icmaların ana dilinin, ədəbiyyatının və mədəni irsinin qorunması və inkişafı üçün geniş imkanlar yaradılıb. Ləzgi dilində nəşr olunan bu kitablar bir daha göstərir ki, hər bir Azərbaycan vətəndaşının ana dili və mədəniyyəti böyük hörmətlə qarşılanır. Xüsusilə “Seçilmiş əsərlər II hissə” kitabında müəllifin şeirləri ilə yanaşı, Azərbaycanın tanınmış şairlərinin əsərlərinin ləzgi dilinə tərcümə olunması ədəbi və mənəvi körpünün daha da möhkəmlənməsinə xidmət edir.

BBMM-in baş məsləhətçisi Araz Qurbanov qeyd edib ki, təqdimat mərasimi ölkəmizdə ana dilinə, ədəbiyyata və mədəni müxtəlifliyə göstərilən diqqətin bariz nümunəsidir. Ləzgi dilində nəşr olunan kitablar milli-mənəvi dəyərlərin qorunmasına və zəngin ədəbi irsin gələcək nəsillərə ötürülməsinə mühüm töhfə verir. Bu cür layihələr cəmiyyətimizdə qarşılıqlı hörmətin, mədəni dialoqun və ədəbi əlaqələrin daha da möhkəmlənməsinə xidmət edir, ortaq dəyərlərin daha dərindən dərk olunmasına imkan yaradır. Ana dilində kitabların nəşri gənc nəslin öz köklərinə bağlılığını gücləndirir, onların dilə, ədəbiyyata marağını artırır, mənəvi dəyərlərə bağlı, mədəni müxtəlifliyi zənginlik kimi qəbul edən bir cəmiyyətin formalaşmasına xidmət edir.

“Samur” Ləzgi Mədəniyyət Mərkəzinin sədri İmran Rzayev, ehtiyatda olan polkovnik, Qarabağ müharibəsi və Silahlı Qüvvələrin veteranı Şair Ramaldanov, şair-publisist, Azərbaycan Yazıçılar Birliyinin üzvü Ramiz Qusarçaylı çıxışlarında Azərbaycan dövləti tərəfindən hər zaman azsaylı xalqlara qayğı ilə yanaşıldığını, onların mədəniyyətinin, adət-ənənələrinin qorunub saxlanılmasına önəm verildiyi, etnik icmaların mədəniyyət mərkəzlərinin fəaliyyətinə dəstək göstərildiyi, onların dillərində dərsliklər, kitablar çap olunduğunu bildiriblər. Vurğulanıb ki, Prezident İlham Əliyevin rəhbərliyi ilə ölkədə uğurlu multikulturalizmin siyasəti aparılır, bütün xalqların hüquq və azadlıqlarına bərabər yanaşılır, etnik azlıqlara xüsusi diqqət və qayğı göstərilir.

Qeyd edək ki, Eyvaz Güləliyevin “Seçilmiş əsərlər II hissə” kitabında müəllifin şeirləri, qəzəlləri və Azərbaycanın tanınmış şairlərinin ləzgi dilinə tərcümə olunmuş əsərləri yer alıb.

Paylaş:

Baxılıb: 721 dəfə