Bugünlərdə məlum olub ki, Əli Əliyevdən başqa Vətəndaş və İnkişaf Partiyasında ikinci bir adam da var imiş

Bakı:

21 °C

83 %

2 m/s

AZ RU EN

Ana səhifə / Xəbər lenti / Bugünlərdə məlum olub ki, Əli Əliyevdən başqa Vətəndaş və İnkişaf Partiyasında ikinci bir adam da var imiş

Bugünlərdə məlum olub ki, Əli Əliyevdən başqa Vətəndaş və İnkişaf Partiyasında ikinci bir adam da var imiş

18.11.2021 [12:24]

Vüqar Seyidov

YAP Suraxanı rayon təşkilatının sədri

Mən Azərbaycan siyasi palitrasını rəngarəng edən bütün siyasi partiyalara və müxtəlif siyasi görüşlərə hörmətlə yanaşıram. Belə ki, hakim partiya olaraq Yeni Azərbaycan Partiyası siyasi mənsubiyyətindən asılı olmayaraq milli maraqlar ətrafında birləşən bütün siyasi partiyaların fəaliyyətinə ehtiramla yanaşır və dəstək olur. Lakin Vətəndaş və İnkişaf Partiyası (VİP) haqqında danışarkən milli və dövlət maraqları ətrafında birləşmək məfhumu yad bir anlayış kimi səslənir. Açığı mətbuata, Mərkəzi Seçki Komissiyasına və Vergilər Xidmətinə verdiyi məlumatlara nəzər yetirəndə başa düşmək çətin deyil ki, bu partiya indi real heç bir fəaliyyət göstərmir.

Cəmiyyətimizdə VİP kimi siyasi partiyaları yarıciddi, yarızarafatla “portfel partiyalar” adlandırırlar. Heç bir siyasi qurumu olmayan, yalnız sənəd üzərində fəaliyyət göstərən VİP-ə Əli Əliyev kimi qeyri-rasional bir adam “rəhbərlik” edir. Bu ifadə dırnaq arasında daha doğru səslənir. Çünki bütün günü demokratiyadan dəm vurmasına rəğmən özündən başqa bir adamın da efirlərdə görünməsinə icazə verməyən Əli Əliyev partiya daxilində diktatura rejimi formalaşdırmışdır. Əlbəttə, bu, onların daxili işləridir. Lakin hakim partiya olan YAP-ın ucqar kənd rayonlarının ərazi partiya təşkilatının üzvlərindən də az sayda üzvlərə malik bu yalançı qurumun qondarma sədri gərək nəyə, necə dil uzatdığını dərk etsin. Müzəffər Ali Baş Komandanın qərarlarını öz tüfeyli aləmində və balaca dünyasında müzakirə etməyə cəhd edən Əli Əliyevi cəmiyyətimiz qeyri-ciddi, öz ailə daxili münasibətlərini tənzimləyə bilməyən bir adam kimi tanımaqdadır.

Bugünlərdə məlum olub ki, sən demə Əli Əliyevdən başqa Vətəndaş və İnkişaf Partiyasında ikinci bir adam da var imiş. Cəmiyyət bundan xəbərsizdir. Çünki əldə etdiyimiz məlumata görə Əli Əliyev nə xarici missionerlərdən əldə etdiyi qonararların partiya daxilində paylaşılmasına, nə efirlərdə partiyanın rəhbər şəxslərinin iştirakına, nə də partiyadaxili demokratiyaya icazə vermir. Məhz bu səbəblərdən vaxti ilə Azərbaycan Milli İstiqlal Partiyasının Etibar Məmmədovla birgə qurucularından olan, 30 illik ictimai-siyasi xadim Əliyar Şirməmmədov VİP-in bütün rəhbər orqanlarından istefa verib. Mətbuata verdiyi açıqlamasında Əliyar Şirməmmədov partiya daxilində anti-demokratik bir mühitin hökm sürdüyünü ifadə etmişdir. Əslində bu, məlum olan bir hadisənin elanıdır.

Əli Əliyev son vaxtlar siyasi partiya liderliyindən daha çox youtuber kimi davranmaqdadır. Kanal-kanal gəzərək özünü “politoloq”, “siyasi şərhçi” kimi təqdim edərək ermənidən daha çox erməni mövqeyini dəstəkləyir. Ya doğrudan da əqli sağlamlığını itirib, ya da xəyanətkar mövqeyindən zövq alır. Başqa bir variant da ola bilər ki, siyasi partiya lideri kimi xalqın etimadını qazana bilməsə də, anti-milli mövqeyi ilə xaricidə ona pul buraxan “yiyələrinin” etimadını və pullarını qazana bilmişdir.

Sonda Əli Əliyevə tövsiyyə edərdim ki, siyasi fəaliyyətdən başqa bütün qeyri-ciddi və rasional olmayan işlərlə məşğul olan “portfel partiyasını” qapatsın. Çünki proseslər göstərir ki, artıq kağız üzərində belə Əli Əliyevdən başqa onun bir üzvü belə qalmayacaqdır. Eyni zamanda da Vətəndaş və İnkişaf Partiyasının əgər üzvləri varsa, təşəbbüs göstərərək bu xəstə ideologiyaya malik “lider”dən xilas olmalıdırlar.

Paylaş:

Baxılıb: 1152 dəfə