Unutmadıq, unutmarıq...

Bakı:

20°C

60%

7m/s

Əlaqə

AZ RU EN

Ana səhifə / Xəbər lenti / Unutmadıq, unutmarıq...

Unutmadıq, unutmarıq...

20.01.2022 [00:40]

20 Yanvar həmrəylik tariximiz olmaqla yanaşı, milli müstəqillik, azadlıq uğrunda mübarizənin və yenilməz iradənin rəmzinə çevrilib

Günel Abbas

Keçmişini unudan xalqın gələcəyi olmaz. Bəxtimiz onda gətirib ki, keçmişdə bizə yaşadılanlarla bağlı ən kiçik nüansı belə xatirimizdən silməmişik. Vaxt olub başımıza gətirilənlərin layiqincə cavabını verə bilmədiyimizə görə utanmışıq, lakin unutmamışıq. İndi utanmağın da, unutmağın da daşını birdəfəlik atmışıq. Artıq iki ildir, Şəhidlər Xiyabanına alnıaçıq, üzüağ millətin nümayəndələri kimi gedirik. Çünki xatirəsini daim uca tutduğumuz şəhidlərimizin ruhu şaddır. Müzəffər Ali Baş Komandan cənab İlham Əliyevin rəhbərliyi ilə qüdrətli ordumuzun rəşadəti, xalqın həmrəyliyi sayəsində 44 günlük Vətən müharibəsində qazandığımız tarixi Zəfəri ilə şəhidlərimizin intiqamı alındı və onların qanı yerdə qalmadı.

20 Yanvarda xüsusi hiss etdiyimiz iki duyğu var. Bu gün Azərbaycanın yeni tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub, milli müstəqillik, azadlıq uğrunda mübarizənin və yenilməz iradənin rəmzinə çevrilib.

Hadisələrin cərəyan etdiyi həmin dövrdə ümummilli liderimiz Heydər Əliyev siyasi iradə nümayiş etdirərək Moskvadakı Azərbaycan nümayəndəliyinə gələrək və SSRİ rəhbərliyinin törətdiyi bu cinayəti qətiyyətlə ittiham edərək kəskin bəyanatla çıxış etdi. Məhz Heydər Əliyevin təşəbbüsü ilə 1994-cu ilin yanvar ayında Milli Məclisdə faciəvi 20 Yanvar hadisələrinə siyasi-hüquqi qiymət verildi.

Zaman keçdikcə 20 Yanvar şəhidlərinin xatirəsinin əbədiləşdirilməsi istiqamətində böyük addımlar atıldı. Metronun “20 Yanvar” stansiyasının üzərindəki dairədə xatirə kompleksi yaradıldı, 2010-cu il yanvarın 20-də Bakının Yasamal rayonundakı “20 Yanvar” dairəsində memorial abidə kompleksinin açılışı oldu. Şəhidlərimizin ruhu, milli şüurumuz, genetikamız bizdən - hər bir azərbaycanlıdan müstəqil dövlətimizi qorumağı və inkişaf etdirməyi tələb edir.

Azərbaycan xalqı 1990-cı ilin yanvarında Azərbaycanın azadlığı uğrunda zirehli texnikanın qarşısına əliyalın çıxmış, Azərbaycanın müstəqilliyi uğrunda canlarından keçmiş oğul və qızlarını unutmur. Bu gün olduğu kimi, hər il yanvarın 20-si saat 12:00-da Azərbaycanın bütün ərazisində 20 Yanvar şəhidlərinin xatirəsi bir dəqiqəlik sükutla yad olunur, gəmilərdən, avtomobillərdən və qatarlardan səs siqnalları verilir, hüzn əlaməti olaraq dövlət bayraqları endirilir. Bu gün həmin tarixdən 32 il ötür. Böyük bir tarixi əhatə edən dünya üçün bu rəqəm kiçik görünə bilər. Amma xalqımız və dövlətimiz durduqca o qərib gecədə itirdiklərimizi 32 il yox, 332 il keçsə də, unutmayacaq, əziz ruhlarını daim ehtiramla yad edəcəyik.

Paylaş:

Baxılıb: 735 dəfə