Ermənistan parlamentində Qubadlı söhbəti...

Bakı:

29 °C

58 %

11 m/s

Əlaqə

AZ RU EN

Ana səhifə / Xəbər lenti / Ermənistan parlamentində Qubadlı söhbəti...

Ermənistan parlamentində Qubadlı söhbəti...

04.03.2022 [10:15]

Paşinyan erməni müxalifətçilərini yenə pərişan etdi

Nardar BAYRAMLI

Ermənistan parlamentində “hökumət saatı” zamanı çıxış edən baş nazir Nikol Paşinyan müxalifət deputatlarının ittihamları ilə üzləşib. Amma Paşinyan müxalifətin “Dağlıq Qarabağ ərazisinin 75 faizini Azərbaycana təhvil verdiniz” ittihamlarını rədd edib. O deyib ki, bu rəvayət 44 günlük müharibədən sonra hakimiyyətin əleyhdarlarının çıxışlarında daim səsləndirilir. Paşinyan parlamentdə “Hayastan” blokunun deputatı Ripsime Stambulyanın iradına cavab olaraq, müxalifət qruplarından Qubadlı şəhərinin onlar üçün “Qubadlı” və ya “Sanasar” olduğunu açıqlamağı tələb edib. “Əgər bu, Qubadlı yox, Sanasardırsa, bəs niyə sizin liderləriniz (Robert Köçəryan və Serj Sarkisyan - red.) 20 il ərzində bu ərazilərin təhvil verilməsi ilə bağlı danışıqlar aparıblar? Və bunu açıq şəkildə ediblər. Sizin qəbul etdiyiniz “Madrid prinsipləri”ndə yeddi rayonun Azərbaycana qaytarılması ilə bağlı yazılıb. İndi mənə deyin, satqınlar, niyə öz vətəninizlə “bazarlıq” edirdiniz?! Orada taxıl əkmək üçün? Rəsmi şəkildə cavab verin”,-deyə Ermənistanın baş naziri müxalif deputatlara qəzəblənib. Paşinyan hesab edir ki, müxalifət qrupları Qubadlını “Sanasar” olaraq rəsmən “erməni torpağı” kimi tanıyırsa, o zaman onların liderləri dövlətə xəyanətdə mühakimə edilməlidir. Baş nazir rəqiblərini “timsah göz yaşları” tökməyi dayandırmağa çağırıb.

Paşinyanın bu fikirləri Ermənistanın reallıqlarla barışması deməkdirmi? Mövzu ilə bağlı Milli Məclisin deputatı Elman Məmmədov qəzetimizə açıqlamasında bildirib ki, Paşinyan hələ “44 günlük müharibənin kökləri’’ adlı məqaləsində Ermənistan diplomatiyasının, ordusunun məğlubiyyətinin səbəbləri, Ermənistanı hazırkı acınacaqlı vəziyyətə aparan yol barədə yazıb. Onun sözlərinə görə, həmin məqalədə mövcud vəziyyətin əsas səbəbkarlarının Koçaryan-Sarkisyan cütlüyü olduğu deyilirdi: “Paşinyan, eyni zamanda uzun illər danışıqların imitasiya xatirinə aparıldığını da etiraf edib. Məqalədə Prezident İlham Əliyevin rəhbərliyi ilə Azərbaycanın məqsədyönlü diplomatiya həyata keçirdiyi və faktiki olaraq Ermənistanı və onun tərəfdarlarını mürəkkəb vəziyyətə saldığı etiraf olunurdu. Paşinyan etiraf edirdi ki, Azərbaycan Prezidenti bütün danışıqlarda qətiyyətli, prinsipial mövqe nümayiş etdirib və mövqeyini getdikcə daha da möhkəmləndirib. 2007-ci ildən masada olan Madrid prinsiplərində 7 rayonun Azərbaycana qaytarılması da nəzərdə tutulurdu. Özündən əvvəlki hakimiyyətdə olanları ittiham edən Paşinyan bildirir ki, atəşkəsin qüvvəyə mindiyi 1994-cü ilin mayından bu yana aparılan bütün danışıqlar prosesində Ermənistan bir dəfə də olsun uğur qazana bilməyib. O, Köçəryan və Sarkisyanın tərəfdarlarına bütün bunları xatırladır, onlardan cavab tələb edir. Amma həmin deputatlar da Paşinyana tutarlı cavab verə bilmirlər. Ermənilər həm işğal, həm də işğaldan sonrakı dövrdə də belə fikirlər səsləndirirlər ki, əgər o ərazilər bizim idisə, niyə orada daşı-daş üstündə qoymurdunuz, niyə orada bir bina tikmirdiniz, niyə bir ağac əkmirdiniz? Əksinə viran qoyurdunuz, sökürdünüz, talayırdınız, vəhşilik edirdiniz. Hətta, qəbirləri, məscidləri də talayırdınız. Demək, siz dərk edirdiniz ki, bu torpaqlar sizinki deyil. Bilirdiniz ki, nə vaxtsa, buranın sahibləri gələcəklər. Ona görə də, belə vəhşiliyə əl atırdınız. Paşinyan da bunları deyir. Erməni baş nazir həmin fikirləri ilə başa salır ki, o torpaqlar ermənilərin deyil. Bu reallığı həm iqtidar, həm də müxalifət bilir. Sadəcə, siyasi mübarizə apardıqları üçün belə söhbətlər var”.

Paylaş:

Baxılıb: 743 dəfə