Novruz süfrəsi neçəyə başa gələcək?

Bakı:

15°C

88%

1m/s

Əlaqə

AZ RU EN

Ana səhifə / Xəbər lenti / Novruz süfrəsi neçəyə başa gələcək?

Novruz süfrəsi neçəyə başa gələcək?

19.03.2022 [00:29]

MÜŞFİQƏ

Yurdumuza Novruz gəlir. Azərbaycan xalqının qədim bayramlarından olan Novruz xeyirxahlıq, mehribanlıq və qonaqpərvərlik kimi gözəl hissləri tərənnüm edir. Yaz bayramının vacib sayılan atributlarından biri də xonçadır. Deyilənə görə, xonçada “s” hərfi ilə başlayan 7 nemətin olması mütləqdir.

Görəsən, Novruz xonçasını hazırlamaq neçəyə başa gələcək? Bayram özü ilə nə qədər sevinc gətirsə də, əhalinin aztəminatlı hissəsi bazarlardakı bahalaşma səbəbindən süfrəyə lazım olan təamları düzə bilməməyin kədərini yaşayır. 300 manata yaxın maaşı olan orta statistik Azərbaycan vətəndaşı evin Novruz bayramı üçün nə qədər xərc çəkməlidir? Bazarlara və marketlərə baş çəkərək bu sualımıza cavab axtarmağa çalışdıq.

Novruzun əsas simvolu hesab olunan səməninin qiyməti ölçüsündən asılı olaraq 1-9 manat arası dəyişir.

Xonçanın bəzənməsi üçün çərəzlərə gəlincə isə qiymətlər bu cür idi: fındıq 6 manat, ləpə fındıq 11-16 manat, sarı kişmiş 6-14 manat, qara kişmiş 10-23 manat, qaysı 9,5-17 manat, badam 20 manat - 30 manat arası, qovurulmuş fındıq 23 manat 25 qəpik, püstə 21-27 manat arası, iydə 7 manat 50 qəpik, xurma 2 manat 60 qəpik - 7 manat, yerfıstığı 4 manat, hind qozu 33 manat, innab 11 manat, şabalıd 7 manat, tumsuz qara gavalı 8 manata satılırdı.

Meyvələrdən alma 1 manat - 1 manat 70 qəpik arası, armud 4 manat 50 qəpik, banan 2 manat 80 qəpik, ananas 6 manat 50 qəpik, mandarin 2 manat 70 qəpik, portağal 1 manat 90 qəpik, kivi 2 manat 80 qəpik, greyfrut 2 manat 80 qəpik, heyva 1 manat 90 qəpik, mango 15 manat idi.

Süfrəsini yeməklərin şahı sayılan plovla bəzəmək istəyənlər isə xeyli pul xərcləməli olacaqlar. Belə ki, düyülərin qiyməti 1 manat 90 qəpik, ikikiloluq düyülər 6 manat 89 qəpik, 5 kiloluq torbada olan düyülər isə 18 manat 19 qəpik arasında idi.

Novruz süfrəsinin ən vacib təamlarından bir də balıqdır. 1 kq balığın qiyməti isə orta hesabla 10 manatdır.

Tərəvəzlərin qiymətinə gəlincə, kapya bibər 5 manat, uzun bibər 4 manat, dolmalıq bibər 4 manat, Zirə pomidoru 4 manat, badımcan 4 manat, qırmızı kələm 1 manat 40 qəpik, kök 1 manat, qırmızı soğan 89 qəpik, sarımsaq 5 manat, rəngli bibər 5 manat, çuğundur 70 qəpik, soğan 89 qəpik, kartof 1 manat 19 qəpik, xiyar 4-5 manat arasıdır. Göyərtilərin 5 dəstəsini isə 1 manata almaq mümkündür.

Mayonezlər 1 manat 29 qəpikdən başlayıb - 5 manat arasında dəyişirdi. Yaşıl noxudun qiyməti isə 4 manat 25 qəpiyə qədər satılırdı. Turşu xiyarlar çəkisinə görə 2 manat 99 qəpik və 6 manat 70 qəpik arasında idi.

Süfrəyə düzülən noğul və konfetlərin qiymətləri isə 2 manatdan 15 manata qədər dəyişirdi.

Qeyd edək ki, təqdim etdiyimiz qiymətlər müxtəlif bazar və marketlərdə olan qiymətlərdi.

Paylaş:

Baxılıb: 633 dəfə