Abituriyentlərə ŞAD xəbər

Bakı:

14 °C

72 %

3 m/s

Əlaqə

AZ RU EN

Ana səhifə / Xəbər lenti / Abituriyentlərə ŞAD xəbər

Abituriyentlərə ŞAD xəbər

04.08.2022 [10:40]

Yeganə BAYRAMOVA

Dövlət İmtahan Mərkəzi (DİM) Nazirlər Kabinetinin “Dövlət İmtahan Mərkəzi tərəfindən göstərilən bir sıra ödənişli xidmətlərin istifadəçilərinə güzəştlərin edilməsi barədə” qərarı ilə bağlı açıqlama yayıb. Mərkəzdən bildirilib ki, Nazirlər Kabinetinin qərarına əsasən xidmət haqları dövlət büdcəsindən maliyyələşdirilməyən Azərbaycan vətəndaşları üçün imtahanlar güzəştli tariflərlə keçiriləcək.

Qeyd olunub ki, yaranan fərq dövlət büdcəsi hesabına qarşılanacaq. Belə ki, abituriyentlərə 2023-2024-cü illərdə keçiriləcək imtahanlarda aşağıdakı məbləğdə güzəştlər müəyyən edilib:

1. ali təhsil müəssisələrinin qabiliyyət imtahanı üzrə 10 manat;

2. kolleclərin qabiliyyət imtahanı üzrə 20 manat;

3. Azərbaycan dili (dövlət dili kimi) imtahanı üzrə 20 manat;

4. ümumi orta (9 illik) təhsil bazasında kolleclərə qəbul imtahanı üzrə 25 manat;

5. tam orta (11 illik) təhsil bazasında kolleclərə qəbul imtahanı və I, II, III və IV qruplar üzrə ali təhsil müəssisələrinə qəbul imtahanının I mərhələsi üzrə 25 manat;

6. I, II, III və IV qruplar üzrə ali təhsil müəssisələrinə qəbul imtahanının II mərhələsi üzrə 10 manat;

7. əlavə fənn (lər) imtahanı üzrə 20 manat.

Xatırladaq ki, Azərbaycan Respublikası Prezidentinin 2017-ci il 24 fevral tarixli Sərəncamına əsasən ilk dəfə ümumi və tam orta təhsil səviyyələri üzrə orta ixtisas təhsili müəssisələrinə, ilk dəfə ali təhsilin bakalavriat səviyyəsinə tələbə qəbulu imtahanında (həm 1-ci, həm də 2-ci mərhələ), ilk dəfə ali və orta ixtisas təhsili müəssisələrinin xüsusi qabiliyyət tələb edən ixtisasları üzrə qabiliyyət imtahanında abituriyentlərin iştirakı dövlət büdcəsinin vəsaiti hesabına həyata keçirilir.

Bundan əlavə, “Azərbaycan Respublikasında ali və orta ixtisas təhsili müəssisələrinə tələbə qəbulu imtahanlarının təşkilinin tənzimlənməsi ilə bağlı əlavə tədbirlər haqqında” Azərbaycan Respublikası Prezidentinin 2017-ci il 24 fevral tarixli Sərəncamına 2021-ci il 7 may tarixində edilmiş dəyişikliyə əsasən əvvəlki və cari ilin məzunu olmasından və imtahanlarda (ali təhsil müəssisələrinin bakalavriat səviyyəsi və orta ixtisas təhsili müəssisələrinə qəbul) neçənci dəfə iştirak etməsindən asılı olmayaraq, Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları, şəhid ailəsinin üzvləri, valideynlərini itirmiş və valideyn himayəsindən məhrum olmuş uşaqlar, məcburi köçkün statusu olan şəxslər, I və II dərəcə əlilliyi müəyyən edilmiş şəxslər, o cümlədən sağlamlıq imkanları məhdud 18 yaşınadək uşaqların qeyd olunan imtahanlarda iştirakı dövlət büdcəsinin vəsaiti hesabına həyata keçirilir.

Nazirlər Kabinetinin yeni qərarı ilə bağlı “Yeni Azərbaycan”a açıqlama verən təhsil üzrə ekspert Elçin Əfəndi bildirib ki, bir sıra ödənişli xidmətlərin istifadəçilərinə güzəştlərin edilməsi olduqca mütərəqqi bir haldır: “Nazirlər Kabinetinin qərarına əsasən artıq DİM, eyni zamanda Taarif Şurası tərəfindən keçiriləcək imtahanlarla bağlı təyin olunan qiymətlərdə xüsusi güzəştlər nəzərə alındı. Bu güzəştlər imtahan verən şəxslər üçün həm təhsilin əlçatanlığı, eyni zamanda imtahanda iştirak edə bilmək baxımından olduqca mühüm əhəmiyyət kəs bedir. Elə abituriyentlər var idi ki, onlar ümumiyyətlə ödəniş edə bilmədikləri üçün müsabiqədə iştirak edə bilmirdilər. Həmin şəxslərə isə belə bir imkan yaradıldığı üçün imtahanda asanlıqla iştirak edə biləcəklər. Bununla paralel olaraq əhalinin sosial qayğıya və həssas qrupuna daxil olan şəxslər var ki, onlar da təhsil haqqından azaddırlar. Bura şəhid ailə üzvləri, məcburi köçkünlər, 1-ci və 2-ci qrup əlilliyi olan şəxslər və onların övladları, sağlamlığı məhdud olan digər şəxslər daxildir. Bir sözlə sosial qayğıya ehtiyacı olan vətəndaşlar ödəniş etmədən ümumi müsabiqədə iştirak edə bilərlər. Taarif Şurasının müəyyən etdiyi sonuncu dəyişikliklərdə artım nəzərə çarpsa da, Nazilər Kabinetinin etdiyi güzəştlər tam yerindədir və bu güzəştlərin də müəyyən qismi dövlət büdcəsi hesabına qarşılanacaq”.

Paylaş:

Baxılıb: 601 dəfə