Çalınan “fit”, tərk edilən səhnə, yarımçıq qalan absurd fikirlər...

Bakı:

26 °C

69 %

5 m/s

Əlaqə

AZ RU EN

Ana səhifə / Xəbər lenti / Çalınan “fit”, tərk edilən səhnə, yarımçıq qalan absurd fikirlər...

Çalınan “fit”, tərk edilən səhnə, yarımçıq qalan absurd fikirlər...

27.09.2022 [10:31]

Yaxud qoca Pelosinin puç olan nağılları...

Ataların üçdən dediyini nəzərə alsaq, qoca Pelosi də son dövrlər atdığı “üçüncü” addımında oxunu daşa vurdu. Özünü hər dəfəsində “yuyulmamış çömçə” kimi ortaya atan, gah Tayvana səfər edib Çinin ərazi bütövlüyünə qarşı hədələr yağdıran, gah da İrəvanda qondarma “erməni soyqırımı” abidəsinin önündə “timsah göz yaşları” axıdan qoca Nensi üçüncü dəfəsində layiqli cavabını aldı. İlahi ədalət işin orasındadır ki, bu cavab ona elə amerikalılar tərəfindən verildi. Daha doğrusu...

Nensi Pelosi Nyu-Yorkda keçirilən Qlobal Vətəndaş Musiqi Festivalında tamaşaçılar tərəfindən fitə basılıb. Pelosi iqlim dəyişikliyi və karbon tullantılarının azaldılmasından danışmağa başlayan zaman tədbirə gələnlər fit çalıb hay-küy salmağa başlayıblar. ABŞ nəşrlərinin yazdığına görə, izdiham onun çıxışının bitəcəyinə və konsertin başlayacağına ümid edərək, “gedək” deyə qışqırıb.

Qoca siyasətçi ABŞ-ın tarixi iqlim qanunvericiliyini qəbul etdiyinə, oyun qaydalarının dəyişdirilməsinə və “uşaqlarımız üçün suyun və havanın keyfiyyətinin yaxşılaşdırılmasına” töhfə verdiyinə işarə edərək çıxışını davam etdirməyə çalışsa da, ictimaiyyət Pelosinin sözlərinə son dərəcə mənfi reaksiya verməyə davam edib. Sonda əlacsız qalan Konqresin Nümayəndələr Palatasının sədri nəvələrinin festivalda olduğunu qeyd edərək, tez çıxışını bitirib.

Qlobal Vətəndaş Musiqi Festivalı hər il keçirilir və ABŞ əhalisi arasında ifrat yoxsulluğa son qoymaq üçün fəaliyyət göstərən bir çox insana pulsuz biletlər təqdim edir. Hətta bu festival ötən il dünyanın bir sıra böyük şəhərlərində - Paris, Rio-de Jeneyra, Los Angelos, Sidney və başqa şəhərlərdə də baş tutub. Bu festivalın auditoriyası da sıradan auditoriya deyil. Yəni, Pelosini də Nyu-Yorkda “fitə basanlar” heç də adi, sıradan gənclik deyil. Onlar xeyriyyəçi insanlardır, tanınmış şəxslərdir. Hətta festivala bir sıra dünya ulduzları da dəvət alır. Belə bir publikanın Pelosini fitə basması, “gedək” deyə qışqırması isə sadəcə, musiqiyə başlanılması ilə bağlı ola bilməz.

Bəli, qoca Pelosinin “yay-payız nağılı” belə sona çatmalı idi və sona çatdı. Bu fitlər onun fəaliyyətinə verilən qiymətdi. Hətta bu fitlər onun üçün “son zəng” xarakteri də daşıya bilər. Yaxın zamanlarda baş tutacaq aralıq seçkilər üçün qollarını çırmayaraq gah Tayvana, gah İrəvana gedib separatizm meyillərini yaymağa çalışan, ermənipərəst lobbinin 25 milyonuna əvvəl ağız suyu, sonra isə göz yaşı axıdaraq Azərbaycana qarşı haqsız fikirlər söyləyən Pelosi bu fitlərlə seçkinin nəticələrini müəyyənləşdirə də bilər. Amerika cəmiyyəti bu “fit”lə boş-boş danışıqlara, yalanlara, qeyri-adekvat hərəkətlərə və qeyri-qanuni mahiyyət daşıyan, beynəlxalq normalara zidd olan fikirlərə etiraz bildirir. Pelosinin bütün sferalarda qızışdırıcı mövqeyi vaxtilə ABŞ-a dost kimi baxan dövlətləri ondan incik salıb. Pelosinin apardığı siyasi xətt ucbatından hazırki həssas dönəmdə həmin ölkələr Vaşinqtona etibar etmir, ona inanmır. Bu, qoca yaşda fitə basılacaq qədər az məsələ deyil.

Görək, qoca Pelosi indi hansı üzlə özünə haqq qazandıracaq? Amma hər bir halda haqq öz yerini tapdı. Çalınan “fit”, tərk edilən səhnə, yarımçıq qalan absurd fikirlər... Bu sizə nəyi xatırladır?

PƏRVİZ

Paylaş:

Baxılıb: 652 dəfə