Yeni viruslar yayılıb…

Bakı:

26 °C

44 %

7 m/s

Əlaqə

AZ RU EN

Ana səhifə / Xəbər lenti / Yeni viruslar yayılıb…

Yeni viruslar yayılıb…

27.10.2023 [10:07]

Nələrə diqqət etməliyik?

Y.BAYRAMOVA

Son günlər əhali arasında yeni virus yayılıb. Qeyd edək ki, bu virusdan həm uşaqlar, həm də böyüklər əziyyət çəkir. İnsanlar demək olar ki, eyni simptomlardan şikayət edirlər. Belə ki, yüksək hərarət, səsin batması, bədənin müəyyən hissələrində, xüsusilə beldə yaranan ağrılar xəstəliyin əsas əlamətləridir.

Mütəxəssislər bildirir ki, artıq ev şəraitində yeni virus xəstəliklərinin müalicəsini aparmaqla xəstəlikdən qurtulmaq demək olar ki, mümkünsüzdür. Həkimlər eyni zamanda qrip əleyhinə vaksinlərdən istifadə etməyin məqsədəuyğun olduğunu düşünürlər.

Rinovirus, adenovirus, paraqrip…

Terapevt-həkim Şahvələd Məmmədov “Yeni Azərbaycan”a açıqlamasında bildirdi ki, əvvəllər virus mənşəli mövsümi xəstəliklər yalnız qrip virusunun törətdiyi xəstəlik kimi qiymətləndirilirdi. İndi isə virus xəstəlikləri təkcə qrip yox, bir neçə virusların kompleks şəkildə törətdiyi xəstəliklər şəklində müşahidə olunur. Bu viruslara misal olaraq, rinovirus, adenovirus, paraqrip, respirator sintisial virusları qeyd edə bilərik. Eyni zamanda koronavirusun mutasiyaya uğramış müxtəlif varinatları da bu qruplara daxildir.

Antibiotiklərdən uzaq durun…

Ş.Məmmədov son zamanlar geniş yayılan virus infeksiyalarına qalib gəlmək üçün əksər insanların kortəbii şəkildə antibiotiklərdən istifadə etdiyini vurğuladı. Həkim bu addımın yanlış olduğunu da diqqətə çatdırıb: “Ümumiyyətlə, hansısa virus xəstəliklərinə yoluxan zaman antibiotiklərin istifadəsinə tələsmək lazım deyil. Virusların antibiotiklərə qarşı həssaslığı çox zəifdir və yaxud da heç yoxdur. İnsanların özbaşına antibiotic qəbul etməkləri tamamilə yanlış, bir o qədər də təhlükəli haldır. Ümumiyyətlə, ehtiyac oldu-olmadı antibiotic qəbulu məsləhət görülmür. Çünki orqanizm əks-reaksiya verərək, ciddi fəsadlara yola aça bilər”.

Viruslardan necə qorunaq?

Ş.Məmmədovun sözlərinə görə, viruslarla mübarizə aparmaq üçün ən vacib addımlardan biri qida rasionuna ciddi fikir verməkdir: “Eyni zamanda bol maye içmək və təmiz hava qəbulu vacib şərtlərdən biridir. Bundan başqa, hərarətsalıcı preparatların qəbulu məqbul sayılır. Virus əleyhinə vaksinlərdən də istifadə etməklə orqanizmin xəstəliklərə qarşı dözümlülüyünü artırmaq mümkündür”.

Terapevt onu da qeyd etdi ki, infeksion xəstəliyə yoluxanlar mütləq həkimə müraciət etməlidirlər: “Məlumdur ki, artıq yeni viruslardan ev şəraitində qurtulmaq demək olar ki, mümkünsüz hala çevrilib. Ona görə də xəstəliyə yoluxanların həkim nəzarəti ilə müalicə alması daha məsləhətlidir”.

Paylaş:

Baxılıb: 613 dəfə