Tarixi yenidən yazılan rayon

Bakı:

27 °C

48 %

6 m/s

Əlaqə

AZ RU EN

Ana səhifə / Xəbər lenti / Tarixi yenidən yazılan rayon

Tarixi yenidən yazılan rayon

28.10.2023 [11:09]

Zəngilanın işğalından 30 il ötmədi

G.QABİLQIZI

Keçmişini unudan xalqın gələcəyi olmaz deyiblər. 1990-cı illərdə itirdiyimiz torpaqlarımıza və şəhidlərimizə görə həmin illəri xatırlamaq hər nə qədər ağrılı da olsa, unuda bilmərik. Çünki millət yalnız unudanda məhv olur. Biz də unutmamışıq, başımıza gətirilən bəlaları, yurd-yuvamızdan didərgin düşdüyümüz tarixləri yaxşı xatırlayırıq.

Həmin tarixlərdən biri də Zəngilan rayonunun işğal edildiyi tarixdir.

Zəngilan rayonunun işğal altına düşməsi də, işğaldan azad olunması da məhz oktyabr ayına təsadüf edir. Rayonun mənfur düşmən tərəfindən işğalı 30 il bundan əvvəl - 1993-cü il 29 oktyabr tarixində baş vermişdi. Üç il bundan əvvəl - 2020-ci il oktyabrın 20-də isə rayon işğaldan azad edildi.

1988-ci ildən 1993-cü ilin noyabrınadək düşmənə baş əyməyən, yağı hücumlarına sinə gərən, yüzlərlə şəhid verən Zəngilan işğala məruz qalan ən sonuncu rayon olmuşdu. Qonşu Qubadlı və Cəbrayılın işğalı nəticəsində 67 gün mühasirəyə düşən rayon əhalisi çıxış yolunu Araz çayından İran ərazisinə keçməkdə görmüşdü. Əks təqdirdə ikinci bir Xocalı hadisəsinin baş verməsi qaçılmaz olacaqdı. 4 gün ərzində Zəngilan rayonunun əhalisi vuruşaraq 250-yə yaxın şəhid vermişdi. Rayonun 44 sakini itkin düşüb və onların taleyindən bugünədək xəbər yoxdur. Azərbaycanımızın ayrılmaz guşəsi olan Zəngilanın erməni hərbi birləşmələri tərəfindən işğal olunması rayonun 33 mindən çox əhalisinin doğma yurdlarından didərgin düşməsinə səbəb olmuşdu.

3 il əvvəl tarix yenidən yazıldığına görə, bu gün Zəngilanın işğalından 30 il ötmür. İndi işğal tarixindən yalnız hadisələrin bu üzünü unutmayaq, unutdurmayaq, deyə bəhs edirik. Bu gün cümləni bitirərkən feilin zamanını dəyişiriksə, bunu yalnız Azərbaycan Ordusuna borcluyuq. Çünki rəşadətli Azərbaycan Ordusu 44 günlük müharibədə tariximizin ən şərəfli səhifələrini yazdı. Vətən Müharibəsində müzəffər Ordumuzun qazandığı ən böyük uğurlardan biri də Zəngilan rayonunun düşmən tapdağından azad edilməsi idi. Vətən müharibəsi zamanı Zəngilan rayonundan şərqdə yerləşən Cəbrayıl rayonunda düşmən qüvvələrinə sarsıdıcı zərbə vurulması və 30-dan çox yaşayış məntəqəsinin işğaldan azad edilməsi, Azərbaycan Ordusunun Zəngilan rayonunun inzibati hüdudlarına çatmasına şərait yaratdı. Zəngilan döyüşləri Sərhəd Qoşunlarının Komandanlığı altında aparıldı və ordumuz Zəngilanın azad edilməsi uğrunda əməliyyata 18 oktyabr 2020-ci il tarixində başladı.

Bizi şanlı zəfərimizə bir addım daha da yaxınlaşdıran, sevincimizə sevinc qatan bu müjdəli xəbəri məhz Ali Baş Komandan, Prezident İlham Əliyev 20 oktyabr 2020-ci il tarixində xalqa müraciətində bildirmişdi. Bu tarixdə Zəngilan şəhəri ilə yanaşı rayonun Havalı, Zərnəli, Məmmədbəyli, Həkəri, Şərifan, Muğanlı kəndləri də azad olunmuşdu. II Qarabağ müharibəsinin gedişində isə Mincivan, Ağbənd, Bartaz qəsəbələri, Bartaz, Sığırt, Sükürataz və daha 5 adsız yüksəklikləri və 52 kəndi Ermənistan işğalından azad olunmuşdu. Rəşadətli ordumuz qısa bir müddətdə sadəcə şəhəri azad etməklə qalmamış, 132 kilometr Azərbaycan-İran sərhədini də bərpa etmişdi. Bununla həm də illərdir qəlblərdə alovlanan yurd həsrəti bitmiş, Cocuq Mərcanlıda olduğu kimi, Zəngilanda da həyat yenidən qaynamışdır. “Böyük Qayıdış”ın ilk addımlarının da məhz Zəngilanın Ağalı kəndində atılması, Zəngilanda Beynəlxalq Hava Limanının açılması bu torpaqların strateji əhəmiyyətindən xəbər verir. İndi smart kəndlər üzərində qurulan, müasir standartlara cavab verən Zəngilana hissə-hissə, addım-addım qayıdırıq və bu qayıdışımız əbədidir.

Paylaş:

Baxılıb: 559 dəfə