İcma etiraz edir

Bakı:

13 °C

76 %

2 m/s

Əlaqə

AZ RU EN

Ana səhifə / Xəbər lenti / İcma etiraz edir

İcma etiraz edir

19.03.2024 [10:45]

Avropa Parlamentinin saxtakar deputatları...

N.BAYRAMLI

Avropa Parlamentinin Azərbaycana qarşı qərəzi davam edir. Məlumdur ki, martın 13-də təşkilatın “Avropa İttifaqı və Ermənistan arasında daha yaxın əlaqələr və Azərbaycanla Ermənistan arasında sülh sazişinə ehtiyac” adlı qətnamə qəbul etmişdi. Bunun ardınca isə, təşkilatın bir qrup üzvü Qarabağda “erməni irsi” ilə bağlı yalan, qərəz dolu müraciət qəbul ediblər. Əslində, Avropa Parlamentinin belə bir mövqeyi təəccüblü deyil. Çünki qurumun “erməni sevgisi” o qədər güclüdür ki, indiyə kimi bu tipli, Azərbaycanın əleyhinə dəfələrlə qətnamələr, qərarlar qəbul ediblər.

Görünən odur ki, Azərbaycanın öz ərazi bütövlüyünü və suverenliyini bərpa etməsi islamafobiyanın, türkfobiyanın, irqçiliyinin məkanına çevrilmiş Avropa Parlamentinə rahatlıq vermir. Çünki onlar erməni lobbisinin və diasporunun əlində alətə çevrilmiş, siyasi korrupsiyaya uğramış siyasətçilərdir. Təşkilatın bir sıra nümayəndələrinə korrupsiya ittihamı irəli sürülməsi də hər kəsə məlumdur. 30 il işğalçı siyasət yürütmüş, yüzminlərlə azərbaycanlının doğma torpağında yaşamaq hüququnu pozmuş Ermənistanın Avropa İttifaqının üzvlüyünə təşviq edilməsi də acınacaqlı haldır. Bunu təşviq edən isə məhz Avropa Parlamentidir.

Avropa xalqlarının problemləri, qarşılaşdıqları çağırışlarla məşğul olmaq əvəzinə Avropa Parlamenti artıq tam şəkildə erməni lobbisinin, Azərbaycanofob, islamofob, şovinist və irqçi qüvvələrin qanuni təmsilçisinə çevrilib. Avropa Parlamentinin ötən illər ərzində Azərbaycanın ərazi bütövlüyünü və suverenliyini sözdə belə olsa tanımaqdan, dəstəkləməkdən inadla imtina etməsinin dəfələrlə şahidi olmuşuq. Lakin ölkəmizin ərazi bütövlüyü və suverenliyinə qarşı aparılan indiki kampaniya Avropa Parlamentinin artıq riyakarlığı və ikiüzlülüyü də bir kənara qoyaraq, Azərbaycana qarşı birmənalı şəkildə hücuma keçdiyini göstərir. Lakin bu qüvvələr unutmamalıdır ki, Azərbaycan güclü dövlətdir və bu cür qətnamələrlə ölkəmizə hansısa təzyiq etmək mümkün deyil. Əslində, Avropa Parlamentinin son qətnaməsi, eləcə də sözügedən müraciət kağız parçasından başqa bir şey deyil.

Təbii ki, onların böhtanları cavabsız qalmır, dövlətimiz təşkilatın bu qərəzinə qarşı öz mövqeyini ifadə edir. Bundan başqa, ictimai təşkilatlar da öz mövqelərini ifadə edirlər. Yeri gəlmişkən, Qərbi Azərbaycan İcmasının təşkilatın üzvlərinin davranışları ilə bağlı bəyanat verib. Bəyanatda bildirilib ki, Avropa Parlamentinin bir qrup korrupsioner və irqçi deputatı mədəni irsin qorunması bəhanəsilə Azərbaycana şər atıb və onun daxili işlərinə qarışmağa cəhd edib. Parlamentarilər öz müraciətlərində bütün xalqların irsini ehtiva edən “ümumdünya mədəni irsi” kimi universal ifadələrdən deyil, dini xətlər üzrə ayırıcı ifadələrdən istifadə edib və müstəsna olaraq, erməni irsindən danışıb. “Hamıya məlumdur ki, Ermənistan öz ərazisində və vaxtilə işğal etdiyi Azərbaycan ərazilərində azərbaycanlılara məxsus mədəni irsi sistematik və kütləvi şəkildə dağıdıb. Ermənistan ərazisində 300 məscid, yüzlərlə məzarlıq, çoxsaylı digər mədəni abidə yer üzündən silinib. Ermənistan oradakı Azərbaycan mədəni irsinin vəziyyətinin monitorinqi məqsədilə UNESCO missiyasının səfərinə imkan vermir”-, deyə bəyanatda qeyd olunub.

Vurğulanıb ki, Avropa Parlamentinin saxtakar deputatları Azərbaycana qara yaxmaq və dini əsaslarda nifaq yaratmaq əvəzinə, UNESCO missiyasının Ermənistana səfərinin həyata keçirilməsi, oradakı Azərbaycan mədəni irsinin dağıdılmasının dayandırılması və dağıdılmış olanların bərpası üçün səylər göstərməli və ən əsası, Ermənistandan qovulmuş 300 min Qərbi azərbaycanlının öz yurdlarına qayıtmasına dəstək verməlidir.

Paylaş:

Baxılıb: 522 dəfə