Almaniya ilə Rusiya arasındakı gərginlik...

Bakı:

19°C

72%

7m/s

Əlaqə

AZ RU EN

Ana səhifə / Analitik / Almaniya ilə Rusiya arasındakı gərginlik...

Almaniya ilə Rusiya arasındakı gərginlik...

05.03.2024 [10:58]

Səfir XİN-ə çağırılıb

Son günlərin əsas müzakirə predmeti olan Almaniya ilə Rusiya arasında yaranan gərginlik səngimir. Belə ki, “Russia Today” Almaniya hərbi rəsmiləri ilə Ukrayna arasında “Taurus” qanadlı raketlərinin çatdırılması ilə bağlı danışıqların 38 dəqiqəlik səs yazısını yayımlayıb. Səs yazılarında raketlərin çatdırılması, eləcə də hərbi hədəflərin və Ukrayna əsgərlərinin təlimi ilə bağlı məsələlər müzakirə edilib. Səs yazılarında hədəflərdən birinin Rusiyanın ilhaq etdiyi Krımla Rusiya torpaqlarını birləşdirən Kerç körpüsü olduğu bildirilir. Simonyanın sözlərinə görə, alman zabitləri Krım körpüsünü necə vurmağı müzakirə edirlər. Bildirilib ki, müzakirə fevralın 19-da Bundesver Hərbi Hava Qüvvələri Komandanlığının əməliyyatlar və təlimlər şöbəsinin rəisi Qrefe, Hərbi Hava Qüvvələrinin inspektoru Gerhartz və Bundesver Kosmik Komandanlığının Hava Əməliyyatları Mərkəzinin əməkdaşları Fenske və Froştedt arasında baş tutub. Sənədə əsasən, alman zabitləri Ukraynaya “Taurus” uzaqmənzilli raketlərinin tədarükü imkanlarını da müzakirə ediblər. Qeyd edək ki, Dövlət Dumasının spikeri Vyaçeslav Volodin, Federasiya Şurasının vitse-spikeri Konstantin Kosaçev və Rusiya Xarici İşlər Nazirliyinin rəsmi nümayəndəsi Mariya Zaxarova Almaniya rəhbərliyindən səs yazısının ortaya çıxması ilə bağlı açıqlama tələb ediblər. “Suallara cavab verməkdən yayınma cəhdləri təqsirinin etirafı kimi qiymətləndiriləcək”, - deyə Zaxarova vurğulayıb. Rusiya KİV-nin yaydığı məlumata görə, Almaniya Müdafiə Nazirliyi Federal Hərbi Əks-Kəşfiyyat İdarəsinin hadisənin dəqiq səbəbini öyrənmək üçün “bütün lazımi tədbirlərə başladığı” bildirilir. Almaniyanın müdafiə naziri Boris Pistorius Almaniya Baş Prokurorluğunun sızma ilə bağlı cinayət işi aça biləcəyini də istisna etməyib.

Bununla yanaşı, alman mediası səs analizinə görə səs yazısının real olduğunu yazır və sızmanın arxasında isə Rusiya kəşfiyyatının olduğu iddia edilir. Almaniya kansleri Olaf Şolts da susqunluğunu pozub. Şolts Romaya səfəri zamanı verdiyi açıqlamada səs yazılarının sızmasının çox ciddi məsələ olduğunu bildirib, məsələnin çox diqqətlə, intensiv və sürətlə aydınlaşdırıldığını qeyd edib.

Məsələ ilə bağlı Almaniyanın Moskvadakı səfiri Aleksandr Lambsdorf Rusiya Xarici İşlər Nazirliyinə çağırılıb. Rusiya KİV-ində yayılan məlumata görə, diplomat çağırılma səbəbi ilə bağlı jurnalistlərin suallarını cavablandırmaqdan imtina edib. Bununla belə, səfirin Krım körpüsünə hücumlarla bağlı alman zabitləri arasında aparılan danışıqların yayılan səsyazısına görə çağırıldığı bəyan edilib.

Rusiya Təhlükəsizlik Şurasının sədr müavini Dmitri Medvedev alman ordusunun danışıqlarından məlumatların sızması ilə bağlı məlumatı şərh edərkən bildirib ki, Almaniya Rusiya ilə müharibəyə hazırlaşır. Medvedevin sözlərinə görə, Bundesver zabitlərinin söhbətini “raket və tank” oyunu kimi təqdim etmək cəhdləri bəd niyyətli yalanlardır. “Düşünürəm ki, Luftwaffe zabitlərinin söz-söhbətindən yaranan ictimai qəzəbi azaltmaq üçün Almaniyada hakim siyasi blokun öz nüfuzunun bərpası prosesi indi başlayacaq. Guya bütün bunlar hərbçilərin maxinasiyasıdır, belə söhbətləri xoşlayırlar, çörək verməsinlər, müharibədən sonra müharibə oynasınlar. Mülki siyasi rəhbərliyin isə bununla heç bir əlaqəsi yoxdur. Üstəlik, bu rəhbərliyin başında Banderalara uzaqmənzilli raketlər verməkdən imtina edən sülhsevər Şolts dayanır. Onun heç nədən xəbəri yoxdur və bununla məşğul olacaq”, - Medvedev “Telegram” kanalında yazıb.

SADİQ

Paylaş:

Baxılıb: 559 dəfə