Qarşılıqlı etimadın təntənəsi

Bakı:

24 °C

60 %

5 m/s

Əlaqə

AZ RU EN

Ana səhifə / Arxiv / Qarşılıqlı etimadın təntənəsi

Qarşılıqlı etimadın təntənəsi

14.05.2025 [14:35]

Meydanəli Yolçiyev,

YAP Daşkəsən rayon təşkilatının sədri

Mayın 7-də Vyetnam Sosialist Respublikası Kommunist Partiyasının Mərkəzi Komitəsinin Baş katibi To Lamın Azərbaycana səfəri iki ölkə arasında münasibətlərin yeni mərhələyə qədəm qoyduğunu təsdiqləyir. Prezident İlham Əliyevin mətbuata verdiyi bəyanatda səsləndirdiyi fikirlər səfərin mühüm nəticələrini və gələcək perspektivlərini aydın şəkildə ortaya qoyur.

Səfər çərçivəsində imzalanmış “Azərbaycan Respublikası ilə Vyetnam Sosialist Respublikası arasında Strateji Tərəfdaşlığın qurulması haqqında Birgə Bəyanat” iki ölkə arasında münasibətlərin ən yüksək səviyyəyə yüksəldiyini göstərir. Prezident İlham Əliyevin qeyd etdiyi kimi, bu, çox ciddi siyasi sənəddir: “Bu, əslində, Vyetnam-Azərbaycan əlaqələrini daha yüksək pilləyə qaldıran bir sənəddir. Əminəm ki, artıq bu yüksəksəviyyəli münasibətlər gələcək ikitərəfli əməkdaşlıq üçün də ən vacib rol oynayacaqdır”.

Ticarət, energetika və sərmayə sahələrində əməkdaşlıq geniş perspektivlər vəd edir. Xüsusilə energetika sahəsində imzalanmış Anlaşma Memorandumu, SOCAR ilə PetroVietnam arasında əldə olunmuş razılaşmalar, eləcə də “SOCAR Trading Singapore PTE LTD” ilə “Binh Son Refining and Petrochemical JSC” arasında imzalanmış əməkdaşlıq sənədi bu istiqamətdə praktiki əməkdaşlığın başlanğıcı oldu.

Bərpaolunan enerji sahəsində ölkəmizdə həyata keçirilən irimiqyaslı layihələr, xüsusilə qarşıdakı beş il ərzində 6500 meqavat gücündə təmiz enerji istehsalı üzrə planlar Vyetnam üçün də cəlbedici imkanlar yaradır. Hər iki tərəf bu sahədə qarşılıqlı sərmayə qoyuluşuna maraq göstərir.

Bununla yanaşı, elm, texnologiya, innovasiya və rəqəmsal inkişaf sahəsində əməkdaşlığa dair imzalanmış Anlaşma Memorandumu gələcək texnoloji tərəfdaşlığın möhkəmləndirilməsi baxımından mühüm əhəmiyyət kəsb edir.

Müdafiə sənayesi sahəsində də əməkdaşlığın genişləndirilməsi nəzərdə tutulur. Hər iki tərəfdə bu sahənin inkişafı birgə müəssisələrin yaradılmasına və texnoloji təcrübə mübadiləsinə şərait yaradır. Bu xüsusda imzalanmış Anlaşma Memorandumu tərəfdaşlığın möhkəm təməlini qoyur.

2025-2027-ci illəri əhatə edən ədliyyə sahəsində əməkdaşlıq proqramı hüquq-mühafizə orqanları və məhkəmə sistemləri arasında təcrübə mübadiləsinə töhfə verəcək.

Səfər zamanı mədəniyyət, arxiv işi və informasiya sahələrində də əməkdaşlığa dair sənədlər imzalanıb. Mədəniyyət sahəsində Anlaşma Memorandumu və iki ölkənin informasiya agentlikləri arasında bağlanmış saziş humanitar əlaqələrin genişlənməsinə zəmin yaradacaq.

Kiçik və Orta Biznesin İnkişafı Agentliyi ilə Vyetnamın Milli Sahibkarlıq Assosiasiyası arasında Birgə Biznes Şurasının yaradılması barədə razılaşma sahibkarlıq mühitində dinamikanı artıracaq və işgüzar dairələr arasında əlaqələri gücləndirəcək.

Prezident İlham Əliyev beynəlxalq təşkilatlarda nümayiş etdirilən dəstəyi yüksək qiymətləndirərək Vyetnamın BMT Təhlükəsizlik Şurasında Azərbaycanın mövqeyini dəstəkləməsini xüsusi qeyd edib. Hər iki ölkə Qoşulmama Hərəkatı çərçivəsində fəal əməkdaşlıq edir və beynəlxalq hüququn aliliyi, ərazi bütövlüyü və sərhədlərin toxunulmazlığı prinsiplərinə sadiqliyini nümayiş etdirir.

Nəqliyyat sahəsində əməkdaşlıq məsələləri də diqqət mərkəzində olub. Şimal-Cənub və Şərq-Qərb nəqliyyat dəhlizləri çərçivəsində malların hərəkətinin sürətləndirilməsi və strateji logistik platformaların yaradılması mümkün əməkdaşlıq istiqamətləri kimi qiymətləndirilib.

To Lamın Azərbaycana ilk dövlət səfəri məzmun baxımından son dərəcə zəngin və məhsuldar olub. İmzalanmış sənədlər və əldə olunmuş razılaşmalar bir daha göstərir ki, iki ölkə qarşılıqlı etimada əsaslanan strateji tərəfdaşlıq əsasında gələcək münasibətlərini daha da dərinləşdirəcək. Bu səfər Azərbaycan-Vyetnam əməkdaşlığını siyasi, iqtisadi, texnoloji və humanitar sahələrdə yeni mərhələyə daşıyacaqdır.

Paylaş:

Baxılıb: 523 dəfə