Tolerantlıq nümunəsi...

Bakı:

23°C

56%

4m/s

Əlaqə

AZ RU EN

Ana səhifə / Arxiv / Tolerantlıq nümunəsi...

Tolerantlıq nümunəsi...

01.10.2025 [09:43]

Dini konfessiyaların rəhbərləri birgə bəyanat qəbul edib

Əsrlərdir ki, tolerantlıq nümunəsi sayılan Azərbaycan bu gün də öz dəyərlərinə sadiqlik nümayiş etdirir və bu amil istər qanunvericiliyimizdə, istərsə də gündəlik yaşamımızda öz əksini tapmaqdadır. Çoxmillətli və çoxkonfessiyalı ölkə sayılan Azərbaycanda bütün dinlərin və etnik qrupların nümayəndələri sülh və əmin-amanlıq şəraitində yaşayırlar. Yeri gəlmişkən, bir neçə gün öncə Qafqaz Müsəlmanları İdarəsində (QMİ) dini konfessiyaların rəhbərləri ilə görüş keçirilib. Görüş zamanı müxtəlif mövzular müzakirə olunub, həmçinin Azərbaycandakı dini konfessiyaların rəhbərləri 2025-ci ilin “Konstitusiya və Suverenlik ili” elan edilməsi və Böyük Qarabağ Zəfərinin 5-ci ildönümü ərəfəsində əldə olunan tarixi nailiyyətlərlə bağlı birgə bəyanat qəbul ediblər.

Hər dinə mənsub şəhidlərin dəfnində fərq qoymadan...

Tədbirdə çıxış edən QMİ sədri Şeyxülislam Allahşükür Paşazadə bildirib ki, Azərbaycan müxtəlif dinlərə mənsub şəhidlərin dəfnində fərq qoymadan iştirak edib: “Müxtəlif dinlərə mənsub şəhidlərin dəfn mərasimlərinə birgə qatıldıq, müsəlman, katolik, pravoslav, yəhudi - fərq qoymadan birlikdə iştirak etdik.

İstər Vətən müharibəsi günlərində, istərsə də mübarək Zəfərimizdən sonra biz, Azərbaycanda fəaliyyət göstərən dini konfessiya başçıları dəfələrlə onlayn və bilavasitə görüşərək II Qarabağ savaşının müqəddəs amalları barədə ətraflı bəhs etmiş, haqq mücadiləmiz barədə dünya ictimaiyyətinə geniş məlumatların çatdırılması yönündə əlimizdən gələni əsirgəməmişik. Erməni tərəfinin müharibə cinayətləri, xalqımıza qarşı həyata keçirdiyi qeyri-insani əməllər haqqında, yaydıqları dezinformasiyaları və məkrli ittihamları ifşa etmək üçün əməkdaşlıq etdiyimiz bütün dini mərkəz və beynəlxalq qurumlarla intensiv iş apardıq. Fəxarət doğurucu haldır ki, möhtərəm dövlət başçımız İlham Əliyev cənabları mədəniyyət paytaxtımız Şuşanın Cıdır düzündə etdiyi tarixi çıxışı zamanı Qarabağ Zəfərinə Azərbaycanın din xadimlərinin, dindarların töhfəsini xüsusi qeyd etdi, fəaliyyətimizi yüksək dəyərləndirdi. Bu gün də Azərbaycandakı katoliklər, pravoslavlar, yəhudilər, alban-udilər müsəlmanlarla bərabər Vətən şəhidlərinin ailələrini diqqət və qayğı ilə əhatə edirlər, onların xatirələrini layiqli şəkildə anırlar. Bizim bu birliyimiz heç şübhəsiz ki, Ulu Öndər Heydər Əliyevin Azərbaycançılıq məfkurəsinin ayrılmaz tərkib hissəsidir və multikultural ənənələrimiz sayəsində Azərbaycan dövlətinin qüdrəti hər zaman qələbələrlə davam edəcək.

Şuşada məscidlərlə yanaşı, kilsələr də bərpa edilir

A.Paşazadə qeyd edib ki, Bakının mərkəzində erməni kilsəsini qoruyub saxlayan dövlətimiz Şuşada məscidlərimizlə yanaşı pravoslav və erməni kilsəsini bərpa edir: “Bu, Azərbaycan xalqının, Azərbaycan dövlətinin multikultural siyasəti, mənəvi üstünlüyüdür. Uca Allahın köməyi və müdrik dövlət rəhbərimizin misilsiz səyləri ilə Füzuli, Zəngilan, Laçın hava limanları, Şuşaya aparan Zəfər yolu, Xankəndidə yenidənqurma, Böyük Qayıdış, Qarabağ torpaqlarının yeni, gözəl görkəmi, beynəlxalq zirvələrin keçirildiyi ənənəvi ünvana çevrilməsi bizim əminliyimizi, nikbinliyimizi artırır. Ali dini rəhbərlərlə azad Qarabağa səfər edərkən işğal dövründə törədilənləri əyani şəkildə nümayiş etdirməklə, habelə Ümumdünya Kilsələr Şurası ilə əməkdaşlıq edərək onları mütəmadi şəkildə Azərbaycan həqiqətləri ilə tanış etməklə biz erməni kilsəsinin anti-Azərbaycan təbliğatını, bugünədək davam etdirdikləri revanşizm ruhlu dezinformasiyalara qarşı tutarlı faktlar qoyuruq”.

QMİ sədri qeyd edib ki, dünya miqyasında yüksək nüfuza malik, ən böyük beynəlxalq dinlərarası sülh məramlı qurum olan “Dinlər Sülh Naminə” Təşkilatının həmprezidenti və Ümumdünya Şurasına üzv seçilməsini xatırladıb: “Ölkəmizin adı dünya miqyasında dinlərarası dialoqla yanaşı, İslamdaxili anlaşma müstəvisində örnək olaraq vurğulanır. İslamdaxili dialoqun üzləşdiyi problemlər və onların aradan qaldırılması yollarının araşdırılması məsələlərinə həsr olunmuş Bəhreyn tədbirində müstəqil Azərbaycanın timsalında məzhəblərarası anlaşma və qardaşlığın nadir nümunəsi bütün dünyaya model olaraq təqdim olunur. Bu, Azərbaycan dövlət başçısının yeritdiyi siyasətin daha bir uğurlu nəticəsidir”.

“Biz əcdadlarımıza minnətdar olmalıyıq ki”...

Dağ Yəhudiləri Dini İcmasının sədri Milix Yevdayev bildirib ki, torpaqlarımızı azad edəndən sonra ermənilərin bir qarış da torpağına göz dikmədik. O, qeyd edib ki, indi 100-dən çox regional müharibə gedir, amma nə üçün getdiyi bilinmir: “Dünya malı üçündürsə, hər şey bu cahanın, bu dünyanındır. Biz yəhudilər uzun illərdir Azərbaycanda yaşayırıq. Həmişə deyirəm biz əcdadlarımıza minnətdar olmalıyıq ki, belə məkanı bizə məskən seçiblər”.

Yeganə

Paylaş:

Baxılıb: 112 dəfə