22 İyul – Milli Mətbuat Günü: Güclü dövlətin inkişafında azad və məsuliyyətli medianın rolu

Bakı:

26 °C

53 %

3 m/s

Əlaqə

AZ RU EN

Ana səhifə / Arxiv / 22 İyul – Milli Mətbuat Günü: Güclü dövlətin inkişafında azad və məsuliyyətli medianın rolu

22 İyul – Milli Mətbuat Günü: Güclü dövlətin inkişafında azad və məsuliyyətli medianın rolu

21.07.2026 [14:25]

Hər il 22 iyul tarixinin Azərbaycanda Milli Mətbuat Günü kimi qeyd olunması milli jurnalistikamızın zəngin tarixinə, cəmiyyətin maariflənməsində və dövlətçilik ənənələrinin möhkəmləndirilməsində göstərdiyi misilsiz xidmətlərə verilən yüksək qiymətin ifadəsidir. Bu əlamətdar günün əsasında 1875-ci il iyulun 22-də böyük maarifçi Həsən bəy Zərdabinin nəşr etdirdiyi “Əkinçi” qəzeti dayanır. Cəmi iki il fəaliyyət göstərməsinə baxmayaraq, “Əkinçi” milli mətbuatımızın bünövrəsini qoymuş, xalqın maariflənməsinə, ana dilinin inkişafına, milli şüurun formalaşmasına və ictimai fikrin oyanışına mühüm töhfələr vermişdir.

Ötən 151 il ərzində Azərbaycan mətbuatı mürəkkəb, eyni zamanda şərəfli inkişaf yolu keçmişdir. Müxtəlif ictimai-siyasi dövrlərdə fəaliyyət göstərən qəzet və jurnallar xalqın milli maraqlarının müdafiəsində, azadlıq ideyalarının təbliğində, milli-mənəvi dəyərlərin qorunmasında və maarifçilik hərəkatının genişlənməsində mühüm rol oynamışdır. Azərbaycan ziyalılarının formalaşmasında, ictimai düşüncənin inkişafında və milli kimliyin möhkəmlənməsində mətbuatın xidmətləri danılmazdır.

Müstəqilliyini bərpa etdikdən sonra Azərbaycan mediasının qarşısında yeni imkanlar və yeni vəzifələr yarandı. Ölkədə demokratik institutların formalaşması, söz və fikir azadlığının təmin olunması, müasir informasiya mühitinin yaradılması istiqamətində mühüm addımlar atıldı. Xüsusilə Ümummilli Lider Heydər Əliyevin rəhbərliyi dövründə mətbuatın inkişafı dövlət siyasətinin prioritet istiqamətlərindən birinə çevrildi. 1998-ci ildə senzuranın ləğv edilməsi Azərbaycanın demokratik inkişaf tarixində mühüm hadisə olmaqla yanaşı, milli mətbuatın sərbəst fəaliyyətinə geniş imkanlar yaratdı. Bu qərar media tariximizin ən mühüm mərhələlərindən biri kimi qiymətləndirilir.

Bu gün Prezident İlham Əliyevin rəhbərliyi ilə media sahəsində həyata keçirilən ardıcıl islahatlar Azərbaycanın informasiya məkanının daha da inkişaf etməsinə xidmət edir. Medianın hüquqi bazasının müasirləşdirilməsi, jurnalistlərin peşəkarlığının artırılması, rəqəmsal transformasiya prosesinin sürətləndirilməsi və sağlam media mühitinin formalaşdırılması istiqamətində görülən işlər ölkəmizdə müasir jurnalistikanın inkişafına mühüm təkan verir. Medianın İnkişafı Agentliyinin fəaliyyəti də peşəkar medianın gücləndirilməsi, informasiya təhlükəsizliyinin təmin olunması və jurnalistika sahəsində yeni yanaşmaların tətbiqi baxımından əhəmiyyətli rol oynayır.

Müasir dövrdə informasiya yalnız xəbərin ötürülməsi vasitəsi deyil, həm də dövlətlərin milli təhlükəsizliyinə, beynəlxalq nüfuzuna və ictimai sabitliyinə təsir göstərən strateji amildir. İnformasiya müharibələrinin geniş vüsət aldığı bir zamanda obyektiv, operativ və məsuliyyətli medianın rolu daha da artır. Peşəkar jurnalistika cəmiyyətin düzgün məlumatlandırılmasına, dezinformasiyanın qarşısının alınmasına və ictimai etimadın qorunmasına xidmət edir. Bu baxımdan media nümayəndələrinin yüksək peşəkarlığı, etik prinsiplərə sadiqliyi və milli maraqları üstün tutması xüsusi əhəmiyyət daşıyır.

Azərbaycan mediası 44 günlük Vətən müharibəsi dövründə informasiya cəbhəsində böyük peşəkarlıq nümayiş etdirdi. Yerli jurnalistlər, informasiya agentlikləri və televiziya kanalları cəbhədə baş verən hadisələri operativ şəkildə işıqlandıraraq Azərbaycanın haqlı mövqeyini dünya ictimaiyyətinə çatdırdılar. Ermənistan tərəfindən aparılan dezinformasiya kampaniyalarının ifşasında, beynəlxalq auditoriyanın obyektiv məlumatlandırılmasında və tarixi həqiqətlərin dünyaya təqdim edilməsində Azərbaycan mediasının fəaliyyəti yüksək qiymətləndirildi. Bu təcrübə göstərdi ki, müasir dövrdə informasiya cəbhəsində qazanılan uğur da ən azı hərbi uğurlar qədər mühüm əhəmiyyət daşıyır.

Bu gün işğaldan azad edilmiş ərazilərdə həyata keçirilən genişmiqyaslı bərpa və quruculuq işləri, “Böyük Qayıdış” proqramı çərçivəsində görülən tədbirlər, yeni yaşayış məntəqələrinin salınması, müasir infrastruktur layihələrinin reallaşdırılması da media tərəfindən geniş şəkildə işıqlandırılır. Jurnalistlər Qarabağ və Şərqi Zəngəzurun dirçəlişini, regionda formalaşan yeni reallıqları və Azərbaycanın inkişaf strategiyasını ölkə və dünya ictimaiyyətinə çatdırmaqla mühüm missiya yerinə yetirirlər.

Rəqəmsal texnologiyaların sürətli inkişafı media sahəsində də yeni mərhələ yaradıb. İnternet media platformalarının, sosial şəbəkələrin və rəqəmsal kommunikasiya vasitələrinin geniş yayılması xəbərin yayılma sürətini əhəmiyyətli dərəcədə artırıb. Bununla yanaşı, saxta xəbərlər və informasiya manipulyasiyaları kimi çağırışlar da meydana çıxıb. Belə şəraitdə peşəkar media prinsiplərinə sadiqlik, faktların dəqiqləşdirilməsi və obyektivlik jurnalistikanın əsas meyarı olaraq qalır.

Milli mətbuat cəmiyyətin inkişafına töhfə verən, dövlətlə vətəndaş arasında sağlam informasiya körpüsü yaradan, ictimai məsuliyyət daşıyan mühüm təsisatdır. Güclü dövlət, güclü vətəndaş cəmiyyəti və sağlam informasiya məkanı arasında qarşılıqlı əlaqə ölkənin davamlı inkişafının əsas şərtlərindən biridir. Azərbaycan mediası da bu missiyanı uğurla yerinə yetirərək dövlətçilik maraqlarının qorunmasına, milli həmrəyliyin möhkəmlənməsinə və cəmiyyətin maariflənməsinə xidmət edir.

22 İyul – Milli Mətbuat Günü münasibətilə bütün jurnalistləri, media əməkdaşlarını və informasiya sahəsində çalışan hər kəsi ürəkdən təbrik edir, onlara möhkəm cansağlığı, peşə fəaliyyətlərində uğurlar, obyektivlik, qərəzsizlik və yeni yaradıcılıq nailiyyətləri arzulayırıq. İnanırıq ki, Azərbaycan milli mətbuatı öz zəngin ənənələrinə sadiq qalaraq bundan sonra da ölkəmizin tərəqqisinə, milli maraqların müdafiəsinə və həqiqətlərin dünyaya çatdırılmasına layiqli töhfələr verməyə davam edəcək.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 25 dəfə