Diş əti xəstəliyi ilə ürək ritm pozuntusu arasında yeni əlaqə aşkar edilib

Bakı:

27 °C

52 %

13 m/s

Əlaqə

AZ RU EN

Ana səhifə / Dünya / Diş əti xəstəliyi ilə ürək ritm pozuntusu arasında yeni əlaqə aşkar edilib - ARAŞDIRMA

Diş əti xəstəliyi ilə ürək ritm pozuntusu arasında yeni əlaqə aşkar edilib - ARAŞDIRMA

10.05.2025 [12:23]

Xirosima Universitetində aparılan yeni araşdırma ağız boşluğunda rast gəlinən Porphyromonas gingivalis (P. gingivalis) bakteriyasının qan dövranına keçərək ürək toxumasına yerləşə bildiyini və nəticədə ciddi ürək ritm pozuntusu olan atrial fibrilasiyaya (AFib) səbəb ola biləcəyini ortaya qoyub.

AZƏRTAC xəbər verir ki, araşdırmanın nəticələri “Circulation” jurnalında dərc olunub.

Tədqiqatın əsas müəllifi, Xirosima Universitetinin dosenti Şunsuke Miyauçi bildirib ki, pariodontit və AFib arasında səbəb-nəticə əlaqəsi hələ tam sübut olunmasa da, periodontal bakteriyaların qan vasitəsilə yayılması bu iki xəstəlik arasında potensial bağ qurur. Onun sözlərinə görə, P. gingivalis xüsusilə ağız boşluğundan kənarda yüksək dərəcədə patogenlik göstərir və sistemli xəstəliklərlə əlaqələndirilir.

Tədqiqat çərçivəsində alimlər bakteriyanın aqressiv W83 ştamından istifadə edərək siçan modeli üzərində təcrübələr aparıblar. Onlar P. gingivalis-i diş pulpasına yeritdikdən sonra infeksiyaya məruz qalan siçanların 18 həftə ərzində AFib riskində nəzarət qrupuna nisbətən altı dəfə artım müşahidə ediblər. Nəzarət qrupunda AFib induksiya dərəcəsi 5 faiz olduğu halda, yoluxmuş siçanlarda bu göstərici 30 faizə yüksəlib. Ürək toxuması üzərində aparılan histoloji analizlər göstərib ki, P. gingivalis bakteriyası sol atriuma daxil olaraq burada çapıq toxumasının (fibroz) yaranmasına səbəb olub. Tədqiqatçılar bakteriyaya aid genetik materialın varlığını təsdiq etmək üçün izotermik gücləndirmə üsulundan istifadə ediblər.

Araşdırmanın insan üzərində olan hissəsində isə ürək əməliyyatı keçirən 68 AFib xəstəsinin sol atrium toxuması analiz edilib. Nəticələr göstərib ki, P. gingivalis izlərinə daha çox ağır diş əti xəstəliyi olan şəxslərdə rast gəlinib. Bu, bakteriyanın təkcə heyvan modellərində deyil, insan ürəyində də mövcud ola biləcəyini göstərir. Bundan əlavə, infeksiyaya məruz qalan siçanlarda fibrozun biomarkeri olan galektin-3 və iltihabla əlaqəli Tgfb1 geninin ifadəsində əhəmiyyətli artım qeydə alınıb.

Araşdırma ağız gigiyenasının ürək sağlamlığı ilə sıx əlaqəli olduğunu bir daha ortaya qoyur. Gündəlik diş fırçalama, diş sapından istifadə və müntəzəm stomatoloji müayinələr təkcə ağız sağlamlığını deyil, həm də ürək ritm pozuntularından qorunmanı təmin edə bilər. Hazırda tədqiqat qrupu P. gingivalis-in ürək hüceyrələrinə təsir mexanizmlərini araşdırır və Xirosima prefekturasında tibbi-sanitariya modelini inkişaf etdirməyi hədəfləyir.

Paylaş:

Baxılıb: 488 dəfə