Ermənistanda tətil və kütləvi itaətsizlik aksiyaları yeni mərhələyə qədəm qoyub

Bakı:

25 °C

48 %

4 m/s

Əlaqə

AZ RU EN

Ana səhifə / Dünya / Ermənistanda tətil və kütləvi itaətsizlik aksiyaları yeni mərhələyə qədəm qoyub

Ermənistanda tətil və kütləvi itaətsizlik aksiyaları yeni mərhələyə qədəm qoyub

22.12.2020 [09:38]

Regionlarda Paşinyana qarşı çıxanların açıq şəkildə cəzalandırılmasına başlanılıb
İşğalçı Ermənistan tarixinin ən gərgin günlərini yaşayır. Paytaxtda və ölkənin müxtəlif regionlarında vətəndaş itaətsizliyi aksiyaları baş alıb gedir, dekabrın 22-dən isə kütləvi tətillər elan edilib. Hakimiyyət ölkəyə nəzarəti, demək olar ki, itirib, siyasi böhran, qarşıdurma və xaos hökm sürür. Belə ki, hər gün ölkənin regionlarında hökumət binalarına hücumlar olur, əsas magistral yollar bağlanır. Paşinyanın komandasında və yerlərdə istefalar davam edir.
“News.am” yazır ki, şənbə günü etiraz aksiyalarının iştirakçıları olan narazı kütlə Yerevandakı “Yerablur” hərbi qəbiristanlığına doğru yürüş edib və Paşinyanın ora gəlməsinə imkan verməyəcəkləri barədə fikir səsləndiriblər. Buna baxmayaraq, baş nazir və parlamentin sədrinin matəm yürüşünə qoşulması aksiya iştirakçılarının qəzəbinə səbəb olub. Eyni zamanda, Paşinyanın tərəfdarları və əleyhdarları arasında toqquşma baş verib. Yerli ekspertlərin fikrincə, baş nazir bilərəkdən belə bir qarşıdurmaya rəvac verib. Belə ki, onun tərəfdarları əvvəlcədən həmin əraziyə yerləşdirilib. Saytın yazdığına görə, yürüş zamanı Ermənistan parlamentinin sədri A.Mirzoyanın səhhəti qəfildən pisləşdiyindən hərbi panteona çatmayıb. Lakin Paşinyan daşqalaq edilsə də, qəbiristanlığa gedib çata bilib.
“Aysor.am” yazır ki, şənbə və bazar günləri Yerevanın mərkəzində kütləvi etiraz aksiyaları keçirilib. Erməni müxalifət partiyalarının nümayəndələri gələcək planlarını açıqlayıblar. “Daşnaksutyun” partiyasından olan İşxan Saqatelyan çıxışında həmvətənlərini çərşənbə axşamına planlaşdırılan ümumerməni tətilini dəstəkləməyə çağırıb: “22 dekabrda saat 12:00-da mitinq üçün Respublika meydanında toplaşacağıq, paralel olaraq hökumətin və digər nazirliklərin binalarını mühasirəyə alacağıq. Ermənistan ərazisində tətil və kütləvi itaətsizlik aksiyaları elan edirik. Çünki bu hökumətin fəaliyyəti yalnız fəlakət gətirir, dövlət əleyhinə, xalq əleyhinədir”.
Onun sözlərinə görə, matəm elan edən Nikol ondan da öz siyasi maraqları üçün istifadə edib: “Paşinyan kürsüsünü qorumaq üçün yenidən ölkəni qarşıdurmaya və böhrana aparır. Vətənin xilası naminə baş nazir vəzifəsindən uzaqlaşdırılmalıdır”. Bu arada “Aysor.am” yazır ki, dekabrın 21-də də Yerevanın mərkəzində mitinq-yürüşlər davam edib. Kütləvi aksiyada iştirak edənlər metronun işini pozublar. Regionlara gəlincə, bütün bölgələrdə vətəndaş itaətsizliyi aksiyaları davam edir.
Yeri gəlmişkən qeyd edək ki, regionlarda Paşinyana qarşı çıxanların açıq şəkildə cəzalandırılmasına başlanılıb. Belə ki, baş nazirə qarşı çıxış edən Gorusun meri Aruş Aruşanyan həsb edilib. Paşinyanın dekabrın 21-də Sünik vilayətinə səfəri ərəfəsində merin həbs edilməsi onun artıq əleyhdarlarına qarşı bütün səviyyələrdə amansız olacağını göstərir. “News.am” yazır ki, Paşinyanın Sünik səfəri zamanı da etiraz əlaməti olaraq vətəndaşlar yolları bağlayıblar.
“Panorama.am” yazır ki, ölkədə mövcud olan vəziyyəti dəyərləndirən beynəlxalq məsələlər üzrə mütəxəssis Suren Sarkisyan deyib ki, Ermənistan daxili, xarici, iqtisadi sahələrdə, hətta mənəvi və psixoloji cəhətdən də böhran dövrünü yaşayır: “Daxili siyasi böhran onsuz da mövcuddur. Zamanla dərinləşəcək və güclənəcək. “Vətəndaş müharibəsi” ifadəsindən çəkinirəm, amma tariximizdə cəmiyyətdə belə bir nifrət və dözümsüzlük həddinin olduğunu xatırlamıram. Ən azı qarşıdurmalar və iğtişaşlar baş verəcək”.
Onun sözlərinə görə bütün bunların qarşısını almaq üçün səriştəsiz hakimiyyət getməli və bütün sahələrə ixtisaslı kadrlar cəlb edilməlidir.
Göründüyü kimi, məğlub Ermənistanda vəziyyət gərginləşməkdə davam edir. Bir tərəfdən ona qarşı çıxanları həbs etdirən Paşinyanın digər tərəfdən öz tərəfdarlarını küçəyə çıxarması açıq şəkildə qarşıdurmaya rəvac verdiyini göstərir. Bu durum isə yaxın günlərdə vətəndaş müharibəsinə aparan qarşıdurmalar və iğtişaşların genişlənəcəyindən xəbər verir.
Qaşqay ZİYƏDDİNOĞLU

Paylaş:

Baxılıb: 919 dəfə