AMEA rəhbəri: Fundamental elmi ənənələrimizi qorumaqla akademiya yeniləşməlidir

Bakı:

24 °C

52 %

6 m/s

Əlaqə

AZ RU EN

Ana səhifə / Elm / AMEA rəhbəri: Fundamental elmi ənənələrimizi qorumaqla akademiya yeniləşməlidir

AMEA rəhbəri: Fundamental elmi ənənələrimizi qorumaqla akademiya yeniləşməlidir

28.11.2024 [19:15]

2025-ci ildə Azərbaycan Milli Elmlər Akademiyasının 80 illik yubileyi tamam olur. Hazırda AMEA-nın 80 illik yubileyi ilə bağlı hazırlıq işləri davam edir, bu çərçivədə bir sıra kitablar nəşr ediləcək.

AZƏRTAC xəbər verir ki, bu sözləri AMEA-nın prezidenti akademik İsa Həbibbəyli “AMEA-nın 2025-2030-cu illər üçün inkişaf konsepsiyası və yol xəritəsi”nin hazırlanması üzrə işçi qrupunun iclasında deyib.

Akademik İsa Həbibbəyli akademiyanın, eləcə də Azərbaycan alimlərinin ötən müddət ərzində bir çox uğurlara imza atdığını bildirib. O, akademiyanın istər sovet dövründə, istərsə də müstəqilliyin ilk illərində Ümummilli Lider Heydər Əliyevin diqqət və qayğısı ilə əhatə olunduğunu bildirib.

2022-ci ildən etibarən yeniləşən akademiyanın qurulması istiqamətində mühüm islahatlara başlanıldığını bildirən AMEA rəhbəri Elektron akademiya şöbəsinin yaradıldığını, AMEA-nın tarixində ilk dəfə olaraq beynəlxalq təşkilatlara - Beynəlxalq Akademiyalararası Əməkdaşlıq Təşkilatı, Beynəlxalq Elmi Şura, Asiya Elmlər Akademiyaları və Elmi Cəmiyyətləri Assosiasiyası və Akademiyalararası Tərəfdaşlıq Assosiasiyasına (IAP) səsvermə hüququna malik üzvü seçildiyini diqqətə çatdırıb. Akademik İsa Həbibbəyli AMEA-nın Asiya Elmlər Akademiyaları və Elmi Cəmiyyətləri Assosiasiyasına da üzv qəbul edildiyini deyib. Həmçinin AMEA-nın bir sıra institutlarında Asiya ölkələri, xüsusilə Çinlə elmi əlaqələrin genişləndirilməsi məqsədilə yeni şöbələrin yaradıldığını, əməkdaşlıq müqavilələrinin imzalandığını söyləyib.

Bundan əlavə, Azərbaycan Prezidenti İlham Əliyevin ölkə elmi qarşısında qoyduğu vəzifələrdən, müstəqil Azərbaycan dövlətinin maraqlarından və müasir dünya elminin çağırışlarından irəli gələrək AMEA-nın elmi müəssisə və təşkilatlarında daxili imkanlar hesabına 40-dan çox yeni strukturun yaradıldığını bildirib.

Bu gün müzakirəsi keçirilən “AMEA-nın 2025-2030-cu illər üçün inkişaf konsepsiyasi və yol xəritəsi”nin AMEA-da 2022-ci ildən etibarən həyata keçirilən geniş yeniləşmə islahatlarının tərkib hissəsi olduğunu deyən akademik İsa Həbibbəyli bu sənədin akademiyanın 80 illik yubileyinə mühüm töhfə olacağını və Elmlər Akademiyasının gələcək fəaliyyət istiqamətində xüsusi rol oynayacağını vurğulayıb.

“Fundamental elmi ənənələrimizi, elmi məktəblərimizi qorumaqla akademiya yeniləşməlidir. Apardığımız islahatlar, eyni zamanda, bizdən gördüyümüz işlərin mahiyyəti üçün maarifçilik tələb edir. Akademiyanın yeni yol xəritəsinin hazırlanmasında hər bir alimin iştirakını vacib hesab edirik və bu sənəd AMEA-nın elmi müəssisə və təşkilatlarında çalışan alimlərdən daxil olan təkliflər əsasında hazırlanacaq. Daha sonra AMEA-nın Rəyasət Heyətinin və AMEA-nın Ümumi yığıncağının müzakirəsinə çıxarılacaq”, - deyə akademik İsa Həbibbəyli bildirib.

Paylaş:

Baxılıb: 736 dəfə