Azərbaycan Prezidenti İlham Əliyev Sabirabad rayonuna səfər edib

Bakı:

24 °C

66 %

3 m/s

Əlaqə

AZ RU EN

Ana səhifə / Gündəm / Azərbaycan Prezidenti İlham Əliyev Sabirabad rayonuna səfər edib

Azərbaycan Prezidenti İlham Əliyev Sabirabad rayonuna səfər edib

16.12.2014 [09:28]

Dekabrın 15-də Azərbaycan Respublikasının Prezidenti İlham Əliyev Sabirabad rayonuna səfərə gəlib.
Dövlətimizin başçısı rayonda bir sıra infrastruktur və sosial təyinatlı obyektlərin açılışında iştirak edib.
Prezident İlham Əliyev əvvəlcə Sabirabad şəhərinin mərkəzi meydanında Ulu öndər Heydər Əliyevin abidəsini ziyarət edərək önünə gül dəstəsi qoyub.
Rayon İcra Hakimiyyətinin başçısı Nazim İsmayılov dövlətimizin başçısına meydanda aparılan abadlıq işləri barədə məlumat verib.
Sonra Prezident İlham Əliyev Nizami-Əliləmbəyli-Azadkənd-Sarxanbəyli avtomobil yolunun açılışında iştirak edib.
Dövlətimizin başçısına yolun texniki-iqtisadi göstəriciləri barədə məlumat verilib. Bildirilib ki, 22 min nəfərin yaşadığı 12 yaşayış məntəqəsini birləşdirən bu yol ən müasir səviyyədə inşa edilib. Uzunluğu 46 kilometr olan yolun inşası zamanı 36 su keçidi tikilib, yol kənarlarında 900-ə yaxın yol nişanı və siqnal dirəyi, 12 dayanacaq quraşdırılıb.
Azərbaycan Prezidenti yolun rəmzi açılışını bildirən lenti kəsib.
Daha sonra Prezident İlham Əliyev Sabirabad şəhərində əsaslı şəkildə yenidən qurulan Mədəniyyət Evində yaradılan şəraitlə tanış olub.
Qeyd edilib ki, ikimərtəbəli bina ən yüksək səviyyədə, həm də müasir üslubda təmir edilib. Mədəniyyət Evinin 377 yerlik akt zalında Sabirabadın mədəni həyatında baş verən hadisələri qeyd etmək, həmçinin respublika və rayon əhəmiyyətli müxtəlif tədbirləri keçirmək üçün hərtərəfli şərait yaradılıb. Burada zəngin kitab fondu, oxu zalı və 20 yerlik konfrans zalı var.
Sabirabada səfəri çərçivəsində dövlətimizin başçısı Heydər Əliyev Fondunun təşəbbüsü ilə inşa olunan uşaq bağçasının açılışında da iştirak edib.
Prezident İlham Əliyev uşaq bağçasının rəmzi açılışını bildirən lenti kəsib.
Məlumat verilib ki, 100 yerlik uşaq bağçasında balacaların təlim-tərbiyəsi və gələcəyin sağlam vətəndaşı kimi yetişmələri üçün hərtərəfli şərait yaradılıb. Bağçada 3 yaşdan 6 yaşadək 80 uşaq 4 qrupda təlim-tərbiyə alacaq. Burada uşaqların intellektual, fiziki və əqli inkişafı, onların istedad və qabiliyyətlərinin üzə çıxarılması diqqət mərkəzində saxlanılır.
Sonra Azərbaycan Prezidenti İlham Əliyev Sabirabad şəhərinə içməli suyun verilməsi mərasimində iştirak edib.
“Azərsu” Açıq Səhmdar Cəmiyyətinin sədri Qorxmaz Hüseynov dövlətimizin başçısına məlumat verib ki, 2030-cu ilə qədər perspektiv inkişaf nəzərə alınmaqla Sabirabad şəhəri, Qalaqayın, Suqovuşan, Kürkənd, Əsədli, Bulaqlı, Balakənd kəndlərində 50 min nəfərdən artıq insanın su təchizatının yaxşılaşmasına hesablanan bu layihə çərçivəsində Kür sutəmizləyici qurğularından 62 kilometr uzunluğunda magistral su kəməri tikilib. Layihənin davamı olaraq Sabirabad şəhərində 135 kilometr uzunluğunda kanalizasiya şəbəkəsi inşa olunacaq, çirkab sutəmizləyici qurğu tikiləcək.
Prezident İlham Əliyev Sabirabad rayon ictimaiyyətinin nümayəndələri ilə görüşüb.
Dövlətimizin başçısı ölkə üçün indiyədək əsas problemlərdən biri olan içməli su məsələsinin həlli ilə bağlı genişmiqyaslı işlər görüldüyünü deyib. Bildirib ki, Sabirabadda icrası başa çatan içməli su layihəsi görülən işlərin davamlı olduğunun təsdiqidir. Prezident İlham Əliyev Sabirabad və Saatlı şəhərlərinin və bu rayonların 40 kəndinin keyfiyyətli içməli su ilə təchizatını təmin edən layihənin başa çatması münasibətilə sakinləri təbrik edib.
Azərbaycan Prezidenti ölkədə sosial məsələlərin əsas prioritet olduğunu deyərək bu sahədə Sabirabadda görülən işlərdən razılığını ifadə edib. Bildirib ki, dövlət bütün sosial layihələrin həyata keçirilməsinə bundan sonra da dəstək verəcək.
Dövlətimizin başçısı suyun verilməsini bildirən düyməni basıb.
Sonda xatirə şəkli çəkdirilib.
Daha sonra Prezident İlham Əliyev Vətəndaşlara Xidmət və Sosial İnnovasiyalar üzrə Dövlət Agentliyinin Sabirabad regional “ASAN xidmət” mərkəzinin açılışında iştirak edib.
Dövlətimizin başçısı binanın rəmzi açılışını bildirən lenti kəsib.
Məlumat verilib ki, dördmərtəbəli binanın tikintisi ən yüksək standartlara uyğun həyata keçirilib. Həyətdəki uşaq avtoşəhərciyində balacaların yol hərəkəti qaydalarını öyrənmələri və yol nişanlarını tanımaları üçün bütün şərait yaradılıb.
Prezident İlham Əliyev binada yaradılan şəraitlə tanış olarkən bildirilib ki, “ASAN xidmət” mərkəzinin fəaliyyətindən Sabirabad da daxil olmaqla Saatlı, İmişli, Kürdəmir, Hacıqabul, Salyan, Beyləqan rayonlarının və Şirvan şəhərinin 900 minə yaxın sakini yararlanacaq. Artıq “ASAN ödəniş” sisteminin tətbiqinə başlanılıb. Yaxın gələcəkdə ödəniş terminallarının ictimai yerlərdə quraşdırılmasına başlanacaq.
Prezident İlham Əliyevə “Google glass” - biometrik tanınma sistemi barədə də məlumat verilib.
Bildirilib ki, “ASAN xidmət” sistemində ilk dəfə burada miniatür tropik meşə layihəsinin tətbiqinə başlanıb ki, bu da bina daxilində havanın təmizlənməsini nəzərdə tutur.
Dövlətimizin başçısı səyyar “ASAN xidmət” avtobuslarında yaradılan şəraitlə də tanış olub. Ən müasir server və şəbəkə avadanlığının quraşdırıldığı bu avtobuslarla 2014-cü ildə 25 məntəqədə 30 rayonun əhalisinə səyyar xidmət göstərilib. Bu çərçivədə edilən 59 mindən çox müraciətin 90 faizə yaxını təmin olunub.
Qeyd edilib ki, mərkəzdə 50 avtomobil tutumu olan dayanacaq tikilib.