Zərdabi Mətbuat Mərkəzi və “KredAqro” Bank Olmayan Kredit Təşkilatı Bərdədə “dəyirmi masa” keçirib

Bakı:

11 °C

87 %

7 m/s

AZ RU EN

Ana səhifə / İqtisadiyyat / Zərdabi Mətbuat Mərkəzi və “KredAqro” Bank Olmayan Kredit Təşkilatı Bərdədə “dəyirmi masa” keçirib

Zərdabi Mətbuat Mərkəzi və “KredAqro” Bank Olmayan Kredit Təşkilatı Bərdədə “dəyirmi masa” keçirib

23.11.2013 [12:23]

Dünən “KredAqro” Bank Olmayan Kredit Təşkilatının Bərdə filialında “Bank-kredit məsələləri-regional KİV-lər və ictimaiyyət” mövzusunda “dəyirmi masa” keçirilib. Bank-kredit təşkilatlarının Bərdədə fəaliyyət göstərən yerli filiallarının, Bərdənin eyniadlı, Yevlaxın “Kür”, Tərtərin “Yeni Tərtər” qəzetlərinin təmsilçilərinin, həmçinin, ölkədə müntəzəm yayımlanan, ictimai fikrə təsir göstərən KİV-lərin regional müxbirlərinin və ictimaiyyət nümayəndələrinin iştirak etdikləri tədbiri Bərdə rayon İcra Hakimiyyəti başçısının müavini Fəqət Şadlinskaya açıb. O, tərəfləri bir araya gətirən layihənin region və bütövlükdə cəmiyyət üçün əhəmiyyət kəsb etdiyini vurğulayaraq mövzu ətrafında fəal diskussiyaların aparılacağına əminliyini bildirib.
Sonra çıxış edən Zərdabi Mətbuat Mərkəzinin sədri Rəhim Hüseynzadə deyib ki, bu tədbir hər iki qurumun “Azərbaycan paytaxtında və bölgələrində bank-kredit məsələləri və KİV: mövcud durum, peşəkarlığın artırılması və təcrübə mübadiləsi” layihəsi çərçivəsində reallaşdırılır: “Oxşar tərkibdə ilk toplantılarımız Şəki, Lənkəran və Qubada keçirilib. Bərdədə baş tutan isə sonuncu, dördüncü “dəyirmi masa” ilə regionlarda düzənlənən görüşlərə yekun vurulur”.
R.Hüseynzadə qeyd edib ki, əvvəlki tədbirlər hər üç rayonda medianın bank-kredit sektoru ilə əlaqələrinin genişlənməsinə yardımçı olduğundan özünü büruzə verən tendensiyalar layihənin gələn il də daha təkmil şəkildə davamını gündəmə gətirib. Bu baxımdan regional tədbir iştirakçılarının da məsələyə münasibətləri önəmlidir.
“KredAqro” BOKT-nin departament rəhbəri, layihənin eksperti Zaur Əliyev bildirib ki, təmsil etdiyi qurum “KredAqro”nun mikromaliyyə təşkilatı kimi 2000-ci ildə ABŞ-ın Beynəlxalq İnkişaf Agentliyinin Azərbaycanda Kənd Təsərrüfatının kreditləşdirilməsi layihəsi çərçivəsində ölkəmizin 9 regionunda sahibkarlara maliyyə xidmətlərinin göstərilməsi məqsədilə yaradılıb. Təşkilatın uğurlarında media ilə əməkdaşlıq xüsusi önəm kəsb edib. Zərdabi Mətbuat Mərkəzi ilə tərəfdaşlıq da bundan irəli gəlib.
Z.Əliyev sonra 2012-2013-cü illərdə ölkənin 31 KİV-də (24 qəzet, 7 informasiya agentliyi) aparılan monitorinqlərin nəticələri barədə məlumat verib.
“Kür” qəzetinin baş redaktoru Əminə Yusifqızı çıxışında rəhbəri olduğu mətbu nəşrin bank-kredit sektoru ilə əlaqələrindən söhbət açıb: “Kür” qəzetinin 7500 abunəçisi sırasında Yevlaxda fəaliyyət göstərən bank-kredit sektorunun əməkdaşları da az deyil. Əvvəllər həmin qurumlar rayon qəzeti ilə əməkdaşlığa həvəs göstərmirdilər. Biz özümüz onlara müraciət etdik. İndi elə bir bank-kredit təşkilatı yoxdur ki, fəaliyyəti işıqlandırılmasın. Mövzular rəngarəngdir: kreditlər necə verilir, hansı yeniliklər var, bir sözlə, maarifləndirici missiyanı yerinə yetiririk. Müxtəlif janrlarda yazılar təqdim edirik. Bu tədbirin əlaqələrin genişlənməsinə təsirsiz qalmayacağına əminəm”.
“Bərdə” qəzetinin baş redaktoru Elbrus Məmmədov və “Yeni Tərtər” qəzetinin baş redaktoru Tofiq Hüseynov isə öz növbəsində tədbirin yevlaxlı həmkarlarının təcrübələrindən faydalanmaq baxımından müsbət əhəmiyyət daşıdığını vurğulayıblar.
“Azərbaycan” qəzetinin bölgə müxbiri Lazım Quliyev bank-kredit sektorunun Azərbaycan kəndinin inkişafında oynadığı roldan danışıb. Bu sahədə hər iki cinahın maarifləndirici missiyasının davamını zəruri hesab edib.
ATV kanalının bölgə müxbiri Vicay Vəliyev özünü də bank müştərisi olduğunu diqqətə çatdırıb.
“Dəyirmi masa”da həmçinin, Kamil Abbasov (“Bank Respublika”), Vüqar Mustafayev (“Gəncəbank”), Vaqif Hüseynov (“Nikoil Bank”), Tural Cəlilli (“Finca Azərbaycan”), Ceyhun İsayev (“KredAqro” BOKT) çıxış edərək Bərdədə ilk dəfə keçirilən belə tədbirin tərəflər arasında əməkdaşlıq baxımından mühüm əhəmiyyətə malik olduğunu, fikir və mülahizələrin formalaşmasına xidmət etdiyini söyləyiblər.

Paylaş:

Baxılıb: 1512 dəfə