Britaniya nümayəndəsi: Azərbaycan müxtəlifliyi ilə seçilən və sürətlə inkişaf edən iqtisadiyyata malik bir ölkədir

Bakı:

13 °C

76 %

4 m/s

AZ RU EN

Ana səhifə / İqtisadiyyat / Britaniya nümayəndəsi: Azərbaycan müxtəlifliyi ilə seçilən və sürətlə inkişaf edən iqtisadiyyata malik bir ölkədir

Britaniya nümayəndəsi: Azərbaycan müxtəlifliyi ilə seçilən və sürətlə inkişaf edən iqtisadiyyata malik bir ölkədir

10.07.2015 [10:00]

Azərbaycan Respublikası Dövlət Neft Şirkəti ( SOCAR), Britaniya Dövlət Ticarət və İnvestisiya Departamenti (UKTİ) ilə birgə Londonda “Azərbaycanın neft və qaz imkanları” mövzusunda brifinq keçirib.
Tədbiri açan “Shell” şirkətinin regional direktoru Campbell Keir Azərbaycanda ticarət və investisiya imkanları haqqında məlumat verib. Qeyd edilib ki, ölkəmiz sürətlə inkişaf edir və xarici investisiyaları özünə sürətlə cəlb edir. Birləşmiş Krallıq hazırda Azərbaycana ən böyük sərmayə qoyan ölkədir. Dünyanın qabaqcıl şirkətləri Azərbaycana sərmayə yatırır, bu ölkə ilə qurulan geniş ticarət əlaqələri Avropa iqtisadiyyatı üçün də böyük əhəmiyyət kəsb edir.
Azərbaycanın Böyük Britaniyadakı səfiri Tahir Tağızadə tədbirin əhəmiyyətini vurğulayaraq təşkilatçılara təşəkkürünü bildirib. Azərbaycanın coğrafi mövqeyindən bəhs edən səfir, ölkəmizin Şərq ilə Qərbin qovşağında, strateji cəhətdən əhəmiyyətli bir bölgədə yerləşdiyini qeyd edib.
Azərbaycan-Britaniya münasibətlərinə toxunan diplomat, ikitərəfli münasibətlərimizin sürətlə inkişaf etdiyini diqqətə çatdırıb. Qeyd edilib ki, əməkdaşlığımız sadəcə enerji sahəsində deyil, siyasi, iqtisadi, sosial sahələrdə də sürətlə inkişaf etməkdə davam edir.
Azərbaycanın enerji siyasəti haqqında məlumat verən T.Tağızadə Ümummilli lider Heydər Əliyevin uzaqgörən siyasəti nəticəsində imzalanan “Əsrin müqaviləsi”ndən bəhs edib. Diplomat, “Şahdəniz”, TANAP, TAP layihələri, ümumiyyətlə neft və qaz sahəsində xüsusilə son illərdə əldə edilən nailiyyətlər haqqında məlumat verib.
SOCAR-ın Böyük Britaniya nümayəndəliyinin rəhbəri Rüfət Əfəndiyev təqdimatla çıxış edərək təmsil etdiyi şirkətin hazırkı fəaliyyəti və layihələri haqqında məlumat verib. Britaniya şirkətləri ilə qurulan qarşılıqlı əməkdaşlıqdan bəhs edən R.Əfəndiyev bp-nin Azərbaycana sərmayə qoyan başlıca şirkət olduğunu vurğulayıb, Azərbaycanın enerji sahəsindəki gələcək planları və yeni layihələr haqqında məlumat verib.
UKTI-nin təmsilçisi xanım Jacqui Mullen ötən günlərdə “Bakı-2015” birinci Avropa Oyunlarının uğurla başa çatması və yüksək səviyyəli təşkilatçılığa görə ölkəmizi təbrik edib.
J.Mullen Azərbaycanın müxtəlifliyi ilə seçilən, sürətlə inkişaf edən və böyüyən iqtisadiyyata malik bir ölkə olduğunu bildirib. Təqdimatında, ölkəmizdə xarici şirkətlər və iş adamları üçün ticarət və biznes əlaqələrinin qurulmasının yollarından bəhs edib, Azərbaycanın ticarət və biznes qanunları haqqında məlumat verib. “Azərbaycan 2020: İnkişaf strategiyası”na da toxunan UKTİ rəsmisi, ölkənin davamlı inkişafının təmin edilməsi baxımından konsepsiyanın böyük əhəmiyyət kəsb etdiyini vurğulayıb. Bütün bunların Birləşmiş Krallıq şirkətləri üçün də böyük fürsət olduğunu bildirən J.Mullen, Britaniyanın Azərbaycanda ən böyük sərmayədar ölkə olduğunu və bu mövqeyi qoruyub saxlamaq niyyətində olduğunu vurğulayıb.
Daha sonra çıxış edənlər ölkəmizdə neft və qaz sahəsində aparılan işlər, xarici şirkətlər və biznesmenlər üçün yaradılan fürsətlər haqqında məlumat veriblər.
Sonda iştirakçıların sualları cavablandırılıb.

Paylaş:

Baxılıb: 981 dəfə