Azərbaycanın Energetika Nazirliyi ilə Meksikanın Energetika Nazirliyinin əməkdaşlığına dair saziş layihəsi müzakirə edilib

Bakı:

28 °C

56 %

9 m/s

AZ RU EN

Ana səhifə / İqtisadiyyat / Azərbaycanın Energetika Nazirliyi ilə Meksikanın Energetika Nazirliyinin əməkdaşlığına dair saziş layihəsi müzakirə edilib

Azərbaycanın Energetika Nazirliyi ilə Meksikanın Energetika Nazirliyinin əməkdaşlığına dair saziş layihəsi müzakirə edilib

27.10.2018 [10:33]

Azərbaycanın Energetika Nazirliyi və Meksikanın Energetika Nazirliyi arasında əməkdaşlığa dair saziş layihəsi üzrə müzakirələr aparılıb.
Energetika Nazirliyindən AZƏRTAC-a bildirilib ki, energetika naziri Pərviz Şahbazov VI Bakı Beynəlxalq Humanitar Forumu çərçivəsində Bakıda səfərdə olan Parlamentlərarası İttifaqın prezidenti, Meksika parlamentinin deputatı xanım Qabriela Baronla görüşüb.
Azərbaycanın beynəlxalq tədbirlərə ev sahibliyi edən məkan kimi tanındığını vurğulayan energetika naziri genişmiqyaslı forum və konfransların müxtəlif sahələrdə ölkələrarası əməkdaşlığın inkişafına da töhfə verdiyini deyib.
Nazir Azərbaycanın neft-qaz ölkəsi kimi keçdiyi inkişaf yolundan bəhs edib. Beynəlxalq neft-qaz şirkətləri ilə “Əsrin müqaviləsi”nin imzalanması ilə başlayan əməkdaşlığın karbohidrogen resurslarının işlənməsi və beynəlxalq bazarlara çıxarılması, qlobal enerji layihələrinin həyata keçirilməsində rolundan danışıb. Bildirilib ki, Azərbaycan həmişə enerji sahəsində əməkdaşlığa açıq olub, yaradılmış əlverişli mühit ölkəmizi etibarlı və uzunmüddətli tərəfdaşa çevirib. “Cənub Qaz Dəhlizi” layihəsinin reallaşması isə Avropanın enerji təhlükəsizliyinin təminatında ölkəmizin əhəmiyyətini artırır.
Görüşdə elektroenergetika sektorunda aparılan islahatlar, bərpaolunan enerji mənbələrindən istifadə istiqamətində planlaşdırılan tədbirlər, Gürcüstan və Türkiyə kimi ölkələrdə həyata keçirilən layihələr, qoyulan sərmayələrlə bağlı məlumatlar da qonağın diqqətinə çatdırılıb.
Xanım Qabriela Baron isə Parlamentlərarası İttifaqın bu ilin dekabrında Azərbaycanda Gənc Parlamentarilərin V Qlobal Konfransının keçiriləcəyi barədə məlumat verib. Ölkəsinin enerji sektorunda həyata keçirilən tədbirlərdən, bu sahənin iqlim dəyişiklikləri kimi qlobal çağırışlardan irəli gələn tələblərə uyğun inkişaf etdirilməsindən danışıb, Azərbaycanın nefti insan kapitalına çevirmək siyasəti ilə maraqlanıb.
Söhbət zamanı iki ölkə arasında enerji sahəsində əməkdaşlıq imkanları nəzərdən keçirilib. “Azərbaycan Respublikasının Energetika Nazirliyi və Meksika Birləşmiş Ştatlarının Energetika Nazirliyi arasında əməkdaşlıq haqqında” Saziş layihəsi üzrə müzakirələr aparılıb.

Paylaş:

Baxılıb: 979 dəfə