Azərbaycan Respublikası Hesablama Palatasının nümayəndə heyəti Küveytdə səfərdə olub

Bakı:

25 °C

67 %

13 m/s

Əlaqə

AZ RU EN

Ana səhifə / İqtisadiyyat / Azərbaycan Respublikası Hesablama Palatasının nümayəndə heyəti Küveytdə səfərdə olub

Azərbaycan Respublikası Hesablama Palatasının nümayəndə heyəti Küveytdə səfərdə olub

14.02.2019 [10:01]

Hesablama Palatası və Küveyt Dövlət Audit Bürosu arasında əməkdaşlığa dair ikitərəfli saziş yenilənərək imzalanıb
Fevralın 12-13-də Hesablama Palatasının sədri Vüqar Gülməmmədovun rəhbərliyi ilə nümayəndə heyəti Küveyt Dövlət Auditi Bürosunun (DAB) prezidentinin vəzifəsini icra edən Adel Al-Saravinin dəvəti ilə Küveytə səfər edib.
Palatadan AZƏRTAC-a bildirilib ki, səfər Azərbaycan Respublikası Hesablama Palatası və Küveyt Dövlət Auditi Bürosu arasında əməkdaşlığın hər iki ali audit qurumu (AAQ) üçün aktual sahələr üzrə daha da genişləndirilməsi məqsədi daşıyıb.
Küveyt Dövlət Auditi Bürosunun inzibati binasında keçirilən görüş Hesablama Palatasının nümayəndə heyətini qəbul edən tərəf adından Adel Al-Saravinin salamlama nitqi və iştirak edən nümayəndələrin təqdim olunması ilə başlayıb. Küveyt tərəfi DAB-ın ali idarəetmə heyətinin üzvləri və görüş üçün müəyyən edilmiş müzakirə mövzuları üzrə məsul rəhbər şəxslərlə təmsil olunub.
Müzakirələrin əvvəlində A.Saravi Hesablama Palatası və DAB arasında mövcud münasibətlər, DAB-ın Azərbaycan AAQ-ı tərəfindən təşkil edilən beynəlxalq tədbirlərdə iştirakı haqqında ümumi məlumat verib və cari görüşün hər iki qurumun potensialının artırılması istiqamətində verəcəyi töhfəyə əmin olduğunu bildirib. Daha sonra Azərbaycan nümayəndə heyətinin rəhbəri V.Gülməmmədov küveytli həmkarlarının dəvəti üçün minnətdarlığını bildirib və Azərbaycanın dövlət maliyyə idarəetmə sistemi, Hesablama Palatasının fəaliyyətini tənzimləyən qanunvericiliyin formalaşma tarixçəsi və Azərbaycan AAQ-ı qarşısında duran hədəf və çağırışları diqqətə çatdırıb.
Təsdiq edilmiş proqrama əsasən görüşün hər iki tərəfin təqdimatları formatında olması nəzərdə tutulub. Küveyt AAQ-nın təmsilçiləri auditin idarə edilməsinin elektron sistemi, illik təlim planı, 2018-ci il üzrə vətəndaş hesabatı, dövlət vəsaitlərinin qorunmasında Küveyt AAQ-nın heyəti tərəfindən bilik mübadiləsinin paylaşımında və auditlərdə informasiya texnologiyalarının rolu mövzularında çıxış edib. Çıxışları müşayiət edən intensiv müzakirələr zamanı Hesablama Palatasının nümayəndə heyətinin rəhbəri və üzvləri qeyd edilən sahələr üzrə analoji təcrübələrin mövcudluğu, həmçinin bununla əlaqəli görülmüş işlər barədə qarşı tərəfi məlumatlandırıb.
Görüşün növbəti hissəsində Hesablama Palatasının nümayəndə heyəti qurumun fəaliyyəti, həmçinin beynəlxalq əməkdaşlıq çərçivəsi və həyata keçirilən tvinninq layihəsinə dair təqdimatlar ilə çıxış edib. Azərbaycan AAQ-nın dövlət büdcəsinin layihəsinə dair verdiyi Rəy və onun hazırlanması metodologiyası Küveyt tərəfinin xüsusi marağına səbəb olub. Görüşdə iştirak edən Küveyt DAB-ın rəhbərliyi sözügedən sahə üzrə Azərbaycan təcrübəsinin tətbiq etmək niyyətini və bununla əlaqədar əlavə müzakirə, görüşlərin keçirilməsinin vacibliyini vurğulayıb.
Daha sonra V.Gülməmmədov Küveyt Dövlət Auditi Bürosunun qonaq kitabında xatirə qeydlərini edib və bu qurumun inzibati binası ilə tanışlıq ekskursiyasında iştirak edib. Hesablama Palatasının nümayəndə heyətini DAB-ın informasiya mərkəzi, onun fəaliyyəti və texniki bazası ilə tanış ediblər.
Səfərin ilk gününün sonunda Azərbaycan AAQ-nın nümayəndə heyətini Küveytin Milli Assambleyasının (Parlamentinin) spikeri Marzuq Ali Al-Qanim qəbul edib. Görüş zamanı M.Qanim Azərbaycan və Küveyt arasında ölkə və qurumlar səviyyəsində dostluq münasibətlərinin cari vəziyyəti, onların daha da inkişaf etdirilməsinin əhəmiyyəti barədə fikirlərini bölüşüb.
V.Gülməmmədov Milli Assambleyanın spikerinə rəhbərlik etdiyi qurumda baş tutmuş görüş üçün təşəkkürünü bildirib və iki ölkənin AAQ-ı arasında münasibətlərinin inkişaf etdirilməsi üçün nəzərdə tutulmuş tədbirlər barədə məlumat verib.
Proqramın ikinci günü Azərbaycan Respublikası Hesablama Palatası və Küveyt Dövlət Audit Bürosu arasında 2020-2023-cü illəri əhatə edən dövrdə əməkdaşlıq çərçivəsini müəyyən edəcək İş planının müzakirəsi ilə başlayıb. İş planına illik bölgü əsasında ekoloji audit, dövlət borcunun auditi, dövlət satınalmalarının auditi və informasiya texnologiyalarının auditi kimi mövzuları əhatə edən silsilə tədbirlər daxil edilib.
Fevralın 13-də ikigünlük səfərin yekunu olaraq Azərbaycan Respublikası Hesablama Palatası və Küveyt Dövlət Audit Bürosu arasında 2006-cı ildə bağlanılmış əməkdaşlığa dair ikitərəfli saziş yenilənərək imzalanıb.

Paylaş:

Baxılıb: 974 dəfə