İşığımız bol olacaq...

Bakı:

10°C

93%

1m/s

Əlaqə

AZ RU EN

Ana səhifə / İqtisadiyyat / İşığımız bol olacaq...

İşığımız bol olacaq...

15.03.2022 [10:19]

Günəş, külək, su enerjiyə çevriləndə

Hazırda “yaşıl iqtisadiyyat”a, o cümlədən də bərpa olunan enerjiyə keçid dünya üzrə əsas çağırışlardan birinə çevrilib. Müasirləşməni strateji inkişaf kursu kimi müəyyənləşdirən və hər sahədə yüksək standartlar tətbiq edən Azərbaycan da sıfır emissiyasız istehsalı hədəfləyən ölkələr sırasında yer alır. Xüsusilə respublikamızda “yaşıl enerji”yə daim “yaşıl işıq” yandırılır və son illərdə bu sahədə bir sıra diqqətəlayiq uğurlar qazanılıb. Energetika Nazirliyi və “Azərenerji” ASC ilə Birləşmiş Ərəb Əmirliklərinin (BƏƏ) “Masdar” şirkəti arasında imzalanan sənədlər əsasında respublikamızda yeni günəş enerji parkının yaradılmasına start verilməsi bu istiqamətdə atılan növbəti addımdır.

Mübariz ABDULLAYEV

Ölkənin zəngin bərpa olunan enerji potensialı

Azərbaycan dövlətinin ölkənin enerji müstəqilliyini bərpa olunan mənbələr hesabına möhkəmləndirilməsinə güclü siyasi iradə göstərməsi heç də təsadüfi deyildir. Ölkə ərazisi, xüsusən də Abşeron yarımadası, Vətən müharibəsində işğaldan azad edilmiş ərazilər bərpa olunan enerji mənbələri ilə kifayət qədər zəngindir. Bu mənbələrdən səmərəli istifadə olunması isə yeni enerji gücləri deməkdir. Respublikamızda bərpa olunan enerji mənbələrinin potensialı 26 940 MVt, o cümlədən külək enerjisi üzrə 3 000 MVt, günəş enerjisi üzrə 23 040 MVt, bioenerji potensialı 380 MVt, dağ çaylarının potensialı 520 MVt həcmində qiymətləndirilir. Hazırda bərpa olunan enerji mənbələri üzrə elektrik stansiyalarının gücü 1300,7 MVt-dır ki, bu da ölkənin ümumi elektrik enerjisi istehsalı gücünün təxminən 17,3%-ni təşkil edir. Qarşıya qoyulan hədəf isə 2030-cu ilədək olan dövrü əhatə edən strateji mərhələdə ölkənin elektrik enerjisinin istehsal gücündə bərpa olunan enerji mənbələrinin payının 30%-ə çatdırılmasıdır.

İldə 500 milyon kVt/saat elektrik enerjisinin istehsalı imkanları

Bir tərəfdən əlverişli investisiya mühiti, digər tərəfdən isə alternativ enerji mənbələrinin zənginliyi bu sahədə fəaliyyət göstərən transmilli şirkətləri ölkəmizə sərmayələr yönəltməyə sövq edir. BƏƏ-ni təmsil edən “Masdar” d belə şirkətlər sırasında yer alır.

“Masdar” bərpa olunan enerji sektorunda dünyada məşhur olan şirkətlərdən biridir. Azərbaycanın müvafiq qurumları ilə “Masdar” arasında əməkdaşlığın təməli də şirkətin beynəlxalq səviyyədə fəaliyyəti ciddi şəkildə araşdırıldıqdan sonra qoyulub. Belə ki, yüksək rəqabət və şəffaflıq mühitində üç mərhələdə seçim prosesi həyata keçirilib. Seçim prosesinin nəticəsinə müvafiq olaraq Səudiyyə Ərəbistanı Krallığının “ACWA Power” və BƏƏ-nin “Masdar” şirkətləri ilə 2020-ci ilin 9 yanvar tarixində bərpa olunan enerji üzrə pilot layihələrin həyata keçirilməsi ilə bağlı İcra müqavilələri imzalanıb. Ötən il aprelin 6-da isə Energetika Nazirliyi və “Azərenerji” ASC “Masdar”la 230 MVt gücündə günəş elektrik stansiyası (GES) layihəsi üzrə “İnvestisiya müqaviləsi”, “Enerji alqı-satqı müqaviləsi” və “Ötürücü şəbəkəyə qoşulma müqaviləsi” imzalayıb.

“Masdar” tərəfindən qurulacaq GES ildə 500 milyon kVt/saat elektrik enerjisinin istehsal olunmasına, 110 milyon kubmetr təbii qaza qənaət edilməsinə, 200 min ton karbon emissiyasının azaldılmasına, yeni iş yerlərinin yaradılmasına imkan yaradacaq. Layihənin dəyəri 200 mln. ABŞ dollarıdır. Stansiya “Cənub” yarımstansiyasına qoşulmaqla enerji sisteminə inteqrasiya olunacaq.

Paylaş:

Baxılıb: 664 dəfə