Sığortaya marağı necə artırmalı?

Bakı:

17°C

82%

4m/s

Əlaqə

AZ RU EN

Ana səhifə / İqtisadiyyat / Sığortaya marağı necə artırmalı?

Sığortaya marağı necə artırmalı?

18.07.2023 [11:15]

Yeni marketinq vasitələrindən, KİV-in imkanlarından istifadə olunmalıdır

Azərbaycanda maliyyə xidmətlərinin inkişafına dair Strateji yol xəritəsində sığorta sahəsinin inkişaf etdirilməsi ilə bağlı məqamlar qeyd edilib. Sığorta sektorunun ölkə ÜDM-nə nisbətinin 0.7%-nə yaxın olması bu sahənin inkişaf etdirilməsi ilə bağlı addımların zəruriliyini göstərir. Sığorta sahəsinin inkişaf etdirilməsi, aşağı məbləğli sığorta məhsullarının olması sığorta bazarının genişlənməsinə, aşağı gəlirli insanların da sığorta vasitəsi ilə təminat əldə etməsinə əsaslı zəmin yaradır. Bu isə öz növbəsində iqtisadiyyatın inkişaf etdirilməsi baxımından önəmli əhəmiyyətə malikdir. Həmçinin sığorta vasitəsi ilə insanlar tibbi xidmətlərdən də yararlana bilirlər. Bütün bunları nəzərə alaraq, vurğulaya bilərik ki, sığortanın inkişafı günümüzdə ölkəmiz və cəmiyyətimiz üçün çox aktualdır. Bu gün sığorta bazarının inkişaf etdirilməsi ən mühüm iqtisadi məsələlərdən sayılır.

Hazırda Azərbaycanda icbari sığorta sahəsində daha çox zəif inkişaf edən istiqamətlərdən biri mənzil və evlərin sığortasıdır. Ekspertlərin qiymətləndirmələrinə əsasən, təkcə Bakı şəhərindəki mənzil və evlərin qiyməti 50 milyard manata yaxındır. Azərbaycanda icbari sığortalara nəzarəti həyata keçirən qurumun - İcbari Sığorta Bürosunun açıqladığı məlumata görə, ötən ilin sonuna ölkədə, ümumilikdə, 151 min ev və mənzil sığortalanmış vəziyyətdə olub. Sığortalana bilən əmlakların potensial sayı 1 milyondur. Bu da əmlak sığortasında penetrasiyanın, yəni bazarın əhatə göstəricisinin 15 faiz olmasının təsdiqi deməkdir. Dəyişikliklərdən sonra isə bu rəqəmin azı 2 dəfə artırılması gözlənilir.

Sığorta bazarına inam

İqtisadçı-ekspert Eldəniz Əmirov “Yeni Azərbaycan”a açıqlamasında bildirib ki, ilk növbədə ölkədə iqtisadi aktivlik, qazanc imkanları, sığorta bazarına güvən daha da aktiv formada tənzimlənməlidir. Hər bir vətəndaş özü könüllü olaraq əmlakını sığortalamalıdır: “Biz əmlakımızı sığortalamaqda özümüz maraqlı olmalıyıq, bu, məcburi-icbari ola bilməz. İcbari sığorta kənar şəxsə dəyə biləcək zərərə görə ola bilər. Məsələn, avtomobillərin icbari sığortası zərər vurduğun avtomobilin zərərini qarşılayır”.

Ekspertin dediyinə görə, sığorta şirkətləri dövlətdən yardım gözləməməlidirlər: “Sığorta şirkətləri özləri cəlbediciliklərini artırmalıdırlar. Sığorta paketləri təqdim edilməlidir ki, insanlar bu işdə maraqlı olsunlar. Dünya təcrübəsində sahibkar ilkin olaraq vergi problemi ilə yanaşı, sığorta problemini də həll edir ki, bu kimi hallarda dəymiş ziyanın ödənilməsi mexanizmi yaransın. Azərbaycanda hazırda bunu etmək çox çətindir. Sığorta şirkətləri çalışırlar ki, bu, icbari qaydada olsun, dövlət qanun çıxarsın ki, hamı öz əmlakını sığortalasın. Bu isə sığorta məhsullarının cəlbediciliyini azaldır və insanlarda öhdəlik hissi yaradır. Bu günə qədər sığorta şirkətlərinin vətəndaşlarla işləmə mexanizmlərində bir sıra problemlər nəzərə çarpıb. Bu isə özlüyündə həm də müəyyən inamsızlıq mühiti yaradıb. Vətəndaşlar sığorta haqqına əlavə vergi yükü kimi baxırlar. Əslində, burada vətəndaşlar özləri maraqlı olmalıdırlar. Sığorta şirkətləri də yaxşı məhsullar təqdim etməlidirlər ki, vətəndaş özü müraciət edib müqavilə bağlasın. Ona görə burada dövlətdən yardım gözləməkdənsə, sığorta şirkətləri fəaliyyətlərinin daha da təkmilləşdirməsi haqqında düşünməldirlər və insanların inamını qazanacaq addımlar atmalıdırlar. Bu, ümumilikdə sığorta mədəniyyətini formalaşmasına səbəb olan faktora çevrilə bilər”.

KİV-lə əlaqələr gücləndirməlidir

Ekspert bildirib ki, Azərbaycanda sığorta şirkətlərinin KİV vasitəsilə təbliğinə də böyük ehtiyac var: “KİV əhalinin məlumatlandırılmasında mühum rol oynadığı üçün burada yazılan xəbərlər əhalinin sığorta şirkətlərinə münasibətinin dəyişməsinə təsir göstərə bilər. Ümumiyyətlə sığorta sahəsi spesifik maliyyə fəaliyyəti olduğundan burada PR siyasətinin düşünülməsi və həyata keçirilməsi xüsusi yanaşma tələb edir. Hazırda müştərilərə təqdim edilən sığorta məhsullarına münasibət birmənalı deyil. Belə ki, onlar daha çox neqativ mülahizələrə meyilli görünür. Adətən, KİV nümayəndələri reytinq, diqqətiçəkmə baxımından sığorta şirkətləri ilə bağlı məlumatları paylaşmağa daha maraqlı olurlar. Burada isə müştəri ilə bağlı şikayət və ya şirkətin hansısa gəlirliyində azalmanın baş verməsi daha çox yer tutur. Bu tipli xəbərlərin əksəriyyəti yoxlanılmamış və təsdiqini tapmamış xəbər olur, çünki KİV nümayəndələri narazı müştərinin şikayətlərini nəzərə alarkən qarşı tərəfin mövqeyini adətən öyrənməlidir. Amma əksinə, KİV insanlar arasında sığorta məhsulları, sığorta qaydaları, sığorta hadisələrinin tənzimlənməsi, ödənişlər və s. ilə bağlı təbliğata daha çox yer verə bilər ki, bu da sığorta mədəniyyətinin və biliyinin artmasına təsir edəcək”.

Sığortada loyallıq

Ekspertin fikrincə, şirkətlərin məhsullarını alanların əsas kütləsini loyal (daimi) müştərilər təşkil edir: “Sığorta şirkətləri isə müştəriləri ilə ya sığorta hadisəsi baş verdiyində, ya da sığorta müqaviləsinin yenilənməsi lazım olduğunda əlaqə qururlar. Sığorta şirkətlərinin bu cür laqeyd münasibəti də nəticədə müştəri loyallığının azalmasına gətirib çıxara bilər. Sığorta şirkətlərində müştəri loyallığınnın azalmasının səbəbləri güvənsizlik, xidmətdəki keyfiyyət, xidmətdən narazılıq, bonus-malusun bəzi şirkətlərdə tətbiq edilməməsi və s. kimi hallardan yarana bilir. Sığorta şirkətləri cəlbediciliyi artırmaq üçün bir sıra populyar proqramlardan istifadə edə bilərlər. Məsələn, Azərbaycandakı şirkətlərin çoxu holdinq, bank tərkibində olurlar, belə olanda, bankdan istifadə edən müştəri sığorta haqlarında endirim əldə edə bilər. Sığorta şirkətləri öz loyal kart sistemini qura bilərlər. Bir-birləri ilə nisbətən bağlı olan sığorta məhsullarında müəyyən sığorta endirimlər müşahidə edilə bilər. Adətən şirkətlərin marketinq xərcləri daha çox müştəri cəlb etməsi ilə bağlı olur - buna baxmayaraq şirkətlərdəki satışların böyük qismi loyal müştərilər tərəfindən həyata keçirilir. Bu da loyal müştərilərin yaradılması üçün əsas səbəblərdəndir. Həmçinin loyal müştərilərin şirkət haqqındakı fikirlərinin müsbət olması, həmin şirkətin nüfuzunun loyal müştərilər vasitəsi ilə təbliğinə də təsir göstərir. Eyni zamanda, məhsulun, xidmətin keyfiyyəti də nəzərə alınmalıdır. Hər iki məqama diqqət yetirmək lazımdır”.

Günel ABBAS

Paylaş:

Baxılıb: 498 dəfə