Beynəlxalq siyasətin ikinci paraleli

Bakı:

14 °C

77 %

9 m/s

Əlaqə

AZ RU EN

Ana səhifə / MEDİA / Beynəlxalq siyasətin ikinci paraleli

Beynəlxalq siyasətin ikinci paraleli

29.02.2024 [10:35]

Diaspor əlaqələri genişləndirilir

Günel ABBAS

Müsair dövrün reallıqları diaspor anlayışının beynəlxalq münasibətlərin əsas aktoruna çevrildiyini göstərir. Azərbaycan da bu siyasətdən kənarda qalmır. Təsadüfi deyil ki, 46 ölkədə 417 cəmiyyət, assosiasiya, alyans və digər qurumları özündə birləşdirən və aktiv lobbiçilik fəaliyyətini formalaşdıran Diasporla İş üzrə Dövlət Komitəsi 4 ərazi şöbəsi vasitəsilə dünyadakı diasporla möhkəm əlaqə və əməkdaşlığa nail olub. Bu şöbələr Rusiyada 85, Gürcüstanda 48, Almaniyada 34, İsveçdə 31, ABŞ-da 25, Türkiyədə 23, Qazaxıstanda 21, Kanadada 16, Özbəkistanda 13, Niderlandda 11 və İsveçrədə 10 təşkilat olmaqla 11 ölkədə fəaliyyət göstərir. Məhz bu baxımdan lobbiçilik və onun hərəkətverici qüvvəsi olan diasporun əsasını üzvlərinin, dünya azərbaycanlılarının milli birliyi təşkil edir və dövlətimiz də bu faktora xüsusi əhəmiyyət verir.

Bu sahədə dövlət siyasətinin məqsədi xaricdə yaşayan soydaşlarımızın milli özünəməxsusluğunu qorumaq və inkişaf etdirmək, Azərbaycan ilə əlaqələrini genişləndirməkdir. Respublikamız tarixən müxtəlif ictimai-siyasi və mədəni proseslər nəticəsində dünyanın ayrı-ayrı ölkələrində məskunlaşmış soydaşlarımız üçün fəxarət, mənəvi dayaq və güvən yeri olub. Azərbaycan dövləti dünya azərbaycanlılarının potensial imkanlarını cəmləmək, müstəqil dövlət quruculuğu prosesində meydana çıxan müxtəlif problemlərin həllinə yönəltmək, daha sıx əlaqələr yaratmaq, milli birliyə nail olmaq və mütəşəkkil qüvvə təşkil etmək səylərinə xüsusi diqqət göstərir.

Azərbaycanlıların Avro-Atlantik Tərəfdaşlıq Şurası yaradılıb

Diaspor təşkilatlarının problemlərinin aradan qaldırılması istiqamətində fəaliyyət, onların fəaliyyətinin milli maraqlarımızın gerçəkləşdirilməsinə yönəldilməsi yönündə dövlət siyasəti xüsusilə təqdir olunmalıdır. Dünyada gedən sürətli inteqrasiya prosesləri, beynəlxalq məsələlərdə diaspor və lobbi təşkilatlarının rolunun artması bu sahəyə diqqətin daha da artırılmasını tələb edir. Diasporla İş üzrə Dövlət Komitəsi əslində bu zərurət nəzərə alınaraq yaradılıb. Lakin beynəlxalq siyasətdə ikinci paralel hesab olunan bu fəaliyyətin tənzimlənməsi baxımından bir sıra əlavə tədbirlərə ehtiyac var. Bu tədbirlərdən biri də xaricdə olan özəl diaspor təşkilatlarının sayını artırmaq, habelə onların fəaliyyətini tənzimləyən yeni təşkilatlar formalaşdırmaqdan ibarətdir.

Yeri gəlmişkən, fevralın 24-də Brüsseldə azərbaycanlıların yeni beynəlxalq transmilli lobbiçilik strukturu - Azərbaycanlıların Avro-Atlantik Tərəfdaşlıq Şurası (SEAPA) təsis edilib.

Təşəbbüs qrupunun rəhbəri, Avropa Azərbaycanlıları Konqresinin fəxri prezidenti Sahil Qasımov mətbuata açıqlamasında bildirib ki, Şura Belçikanın paytaxtında keçirilən Avro-Atlantik ölkələrində fəaliyyət göstərən Azərbaycan diaspor təşkilatlarının qurultayında təsis edilib: “Şuranın yaradılmasında məqsəd Azərbaycana qarşı son zamanlar Qərb dövlətləri tərəfindən intensivləşən hücumlar, Azərbaycanın ərazi bütövlüyünün şübhə altına alınması, Ermənistanın silahlandırılması kimi hallara, AŞPA və ABŞ tərəfindən Azərbaycana artan təzyiqlərə qarşı mübarizə aparmaqdır. Həmçinin Azərbaycan həqiqətlərini dünya ictimaiyyətinə dolğun şəkildə çatdırmaq və lobbiçilik fəaliyyəti də məqsədlərimiz arasında yer alır”.

S.Qasımov bildirib ki, təşkilat NATO ölkələrində fəaliyyət göstərən bir çox Azərbaycan və Türkiyə təşkilatlarının fəaliyyətlərini koordinasiya etmək niyyətindədir: “Şurada Avropa ölkələri ilə yanaşı, digər ölkələrdəki azərbaycanlılar da təmsil olunacaq. Şuranın Baş katibi 5 il müddətinə seçki yolu ilə seçiləcək. Şuranın yaranması üçün təşəbbüs qrupu bir müddətdir fəaliyyət göstərir. Azərbaycanlıların Avro-Atlantik Tərəfdaşlıq Şurası Azərbaycan üçün lobbiçilik fəaliyyəti həyata keçirən bütün təşkilatlara və layihələrə açıq qurum olacaq”.

SEAPA-nın baş katibi yeni təşkilatın məqsədlərini də açıqlayıb. Şura rəhbəri onların arasında Atlantik regionunun hər iki tərəfində yerləşən dövlətlərin diaspor təşkilatlarının lobbiçilik fəaliyyətinin əlaqələndirilməsini xüsusi qeyd edib. O, siyasətçilər, ictimai xadimlər və qeyri-hökumət təşkilatları ilə birgə fəaliyyətə xüsusi önəm veriləcəyini deyib. Sahil Qasımov regionda mövcud olan reallıqların Aİ ölkələri və Şimali Amerika ictimaiyyətinə çatdırılması üçün bu qitələrin ölkələrindəki media orqanları ilə sıx əməkdaşlığın vacibliyini vurğulayıb.

Baş katibin sözlərinə görə, SEAPA-nın fəaliyyəti Azərbaycan dövlətinin strateji məqsədlərinə və Azərbaycan Prezidentinin siyasi kursuna tam uyğun şəkildə həyata keçiriləcək.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Paylaş:

Baxılıb: 661 dəfə