Polşa ölkəmiz əleyhinə təbliğatda iştirak etməməlidir

Bakı:

14 °C

88 %

5 m/s

Əlaqə

AZ RU EN

Ana səhifə / Siyasət / Polşa ölkəmiz əleyhinə təbliğatda iştirak etməməlidir

Polşa ölkəmiz əleyhinə təbliğatda iştirak etməməlidir

29.11.2024 [09:13]

Bu ölkənin müvəqqəti işlər vəkili XİN-ə niyə çağırılıb?

Polşa Prezidenti Andjey Dudanın Avropa İttifaqının (Aİ) Ermənistandakı müşahidə missiyasının üzvləri ilə birgə Azərbaycanla şərti sərhəd bölgəsinə səfəri cəmiyyətimizdə etirazla qarşılanır. Bu, əslində Aİ-nin müxtəlif üzv ölkələrinin və Avropa institutlarının anti-Azərbaycan siyasətinin növbəti nümayişi kimi qiymətləndirilir.

Qeyri-dost addıma qarşı...

Məsələ ilə bağlı Azərbaycan Xarici İşlər Nazirliyinin “X” hesabındakı paylaşımda qeyd olunurdu ki, “Azərbaycanın “strateji tərəfdaşı” olan ölkənin prezidentinin Azərbaycan və Polşa arasında münasibətlərin gərginləşməsinə səbəb olan qəbuledilməz diplomatik “binokl şousu”nda iştirak etməsindən dərin təəssüf hissi keçiririk”. Bildirilib ki, Azərbaycan rəsmilərinin Polşanın Prezident Administrasiyasına və Xarici İşlər Nazirliyinə göndərdiyi çoxsaylı mesajlara baxmayaraq, Polşa tərəfi bu təxribatçı addımdan çəkinməyib: “Azərbaycan bu qeyri-dost addıma qarşı müvafiq diplomatik tədbirlər görmək hüququnu özündə saxlayır”.

Mixal Qreçilonun diqqətinə nələr çatdırılıb?

Noyabrın 28-də isə Polşanın Azərbaycandakı müvəqqəti işlər vəkili Mixal Qreçilo Xarici İşlər Nazirliyinə çağırılıb. Xarici İşlər Nazirliyinin Mətbuat xidməti idarəsindən verilən məlumata görə, görüş zamanı Azərbaycan tərəfinin xəbərdarlıqlarına baxmayaraq, Polşa Prezidenti Anjey Dudanın Ermənistan-Azərbaycan sərhəd bölgəsinə, hələ də Ermənistanın işğalı altında olan Kərki kəndinə yaxın əraziyə səfər edərək Avropa İttifaqının Ermənistandakı missiyası ilə birgə ölkəmiz əleyhinə təbliğatda iştirakına etiraz bildirilib.

Sözügedən missiyanın regional sabitlik, habelə Azərbaycanla Ermənistan arasında etimad quruculuğuna töhfə vermək kimi bəyan edilmiş məqsədlərinə zidd olaraq, Azərbaycan əleyhinə alət kimi geniş şəkildə sui-istifadə olunduğu xatırlanıb. Bu təxribatın Azərbaycan-Polşa münasibətlərinə zidd olduğu, Azərbaycanın legitim təhlükəsizlik maraqlarına təsir edən bu kimi addımlardan çəkinməyin zəruriliyi diqqətə çatdırılıb.

Qərbi Azərbaycan İcması hesab edir ki, Polşa öz problemlərinin həlli ilə məşğul olmalıdır

Məsələ ilə bağlı Qərbi Azərbaycan İcması da bəyanat yayıb. İcma Polşa Prezidentinin Azərbaycan-Ermənistan şərti sərhədinə səfər etməsi ilə bağlı dərin narahatlığını ifadə edib: “Dəfələrlə vurğulamışıq ki, Avropa İttifaqının Ermənistandakı missiyasının patrul etdiyi ərazilərin əksəri biz Qərbi azərbaycanlıların tarixən yaşadığı, dəfələrlə deportasiya edildiyi, dağıdılmış, viran edilmiş yurd yerləridir. Təəssüf ki, bununla bağlı Avropa İttifaqına etdiyimiz müraciətlər cavabsız qalıb”.

“Ermənilərin dəqiq müəyyən edilmiş sərhədlər çərçivəsində öz torpaqlarında dinc şəraitdə yaşamasını istərdik” deyən Polşa prezidentinə İcma xatırladıb ki, Azərbaycan əraziləri işğal altında olarkən Polşanın Azərbaycana münasibətdə belə bəyanatlarının şahidi olmamışıq. Andjey Dudanın ölkəsinin “Azərbaycan və Ermənistan arasında münaqişənin tənzimlənməsinə daha çox cəlb oluna biləcəyi” ilə bağlı verdiyi açıqlamasına dair isə bildirilib ki, rəsmi Varşavanın özünün qonşuları ilə kifayət qədər problemləri var və Polşa öz problemlərinin həlli ilə məşğul olsaydı, daha məntiqli olardı. Qərbi Azərbaycan İcması Polşanı Cənubi Qafqazda vəziyyəti gərginləşdirən addımlar atmamağa çağırıb: “Ermənistan isə başa düşməlidir ki, “binokl diplomatiyası” kimi ucuz şoularla, Luis Okampo, Qreta Tunberq kimi avantürüstlərə “yeni xilaskar” gözü ilə baxmaqla Cənubi Qafqazda sülhə nail olmaq mümkünsüzdür”.

“Yunanıstan məsələlərə etnik və dini təəssübkeşlik prizmasından baxmamalıdır”

Qərbi Azərbaycan İcması, həmçinin Yunanıstanın Ermənistanı silahlandırması ilə bağlı da bəyanat yayıb. İcma hesab edir ki, bütün bunlar regiondankənar aktorların Ermənistanı silahlandırmaq, Cənubi Qafqazı geosiyasi rəqabət meydanına çevirmək siyasətinin tərkib hissəsidir: “Biz Qərbi azərbaycanlıları öz dədə-baba yurdlarımızdan didərgin salmış, 30 il ərzində Azərbaycan torpaqlarını işğal altında saxlamış, hələ də konstitusiyasında ölkəmizə qarşı ərazi iddiasını davam etdirən təcavüzkar Ermənistanın silahlandırılması yolverilməzdir”.

Qərbi Azərbaycan İcması Yunanıstanı məsələlərə etnik və dini təəssübkeşlik prizmasından baxmamağa və regionda vəziyyəti gərginləşdirən təhlükəli addımlardan çəkinməyə çağırıb.

Nardar BAYRAMLI

Paylaş:

Baxılıb: 562 dəfə