İordaniyada “Qərbi Azərbaycan mədəniyyəti” sərgisi və elmi-praktiki konfrans təşkil olunub

Bakı:

11 °C

82 %

12 m/s

Əlaqə

AZ RU EN

Ana səhifə / Siyasət / İordaniyada “Qərbi Azərbaycan mədəniyyəti” sərgisi və elmi-praktiki konfrans təşkil olunub

İordaniyada “Qərbi Azərbaycan mədəniyyəti” sərgisi və elmi-praktiki konfrans təşkil olunub

16.05.2025 [16:09]

Azərbaycanın İordaniya Haşimilər Krallığındakı səfirliyinin təşkilatçılığı və Qərbi Azərbaycan İcmasının dəstəyi ilə Əmman şəhərində “Qərbi Azərbaycan mədəni irsinin izi ilə” mövzusunda elmi-praktiki konfrans və Qərbi Azərbaycana aid maddi mədəniyyət nümunələrindən ibarət “Qərbi Azərbaycan mədəniyyəti” adlı sərgi təşkil olunub.

İcmadan AZƏRTAC-a bildirilib ki, sərgidə nümayiş olunan eksponatların kataloqu və Qərbi Azərbaycan İcmasının Qayıdış Konsepsiyası tədbir iştirakçılarına təqdim edilib, həmçinin “Qərbi Azərbaycanın zəngin mədəni irsi” adlı videoçarx nümayiş olunub.

Konfrans Qərbi Azərbaycandan deportasiya olunmuş azərbaycanlıların mədəni irsi, mülkiyyət hüquqları və indiki Ermənistan ərazisində onlara aid abidələrin vəziyyəti barədə məlumatların İordaniya ictimaiyyətinə çatdırılması məqsədilə keçirilib.

Azərbaycanın İordaniya Haşimilər Krallığındakı səfiri Eldar Səlimov çıxış edərək, bu tədbirin bütöv bir xalqın hüquqlarının, mədəniyyətinin və mənəvi irsinin bərpasına yönəldiyini bildirib. O, indiki Ermənistan ərazisində yaşamış azərbaycanlıların zəngin mədəni irs yaratdığını, lakin ötən əsrdə zorla doğma yurdlarından çıxarılaraq hüquqlarından məhrum edildiyini diqqətə çatdırıb. Eldar Səlimov çıxışlar və müzakirələr zamanı Qərbi azərbaycanlıların mədəni irsinin qorunması və beynəlxalq ictimaiyyətə tanıdılmasının vacib olduğunu vurğulayıb.

İordaniyanın Baş nazirinin müavini, Yerli idarəetmə nazirinin müşaviri və “Yaxın Şərqdə Sülh Mədəniyyəti Birliyi”nin rəhbəri Məhəmməd Əl-Malkavi iki qardaş xalq arasında mədəni bağlılığı yüksək qiymətləndirib, 2023-cü ilin dekabrında Bakıda keçirilmiş beynəlxalq konfransda iştirakını məmnunluqla xatırladıb. O, Ermənistan ərazisindən didərgin düşmüş azərbaycanlıların doğma yurdlarına ləyaqətlə və təhlükəsiz qayıdışının təbii hüquqları olduğunu qeyd edib.

Sonra konfransda Qərbi Azərbaycan İcmasının Müşahidə Şurasının üzvü, Azərbaycan Memarlıq və İnşaat Universitetinin rektoru, Əməkdar memar Gülçöhrə Məmmədova, Qərbi Azərbaycan İcmasının Aparat rəhbəri, sənətşünaslıq üzrə fəlsəfə doktoru Qalib Qasımov, tədqiqatçı və kolleksioner Mohammad Əl-Bağdadi, İordaniya Əl-Əl Beyt Universitetinin professoru Əbdul Karim Caradat və Haşimi Universitetinin professoru Mohammad Vahib çıxış ediblər.

Daha sonra səfirlikdə təşkil edilmiş “Qərbi Azərbaycan mədəniyyəti” adlı sərginin açılış mərasimi keçirilib. Yaxın və Orta Şərqin tanınmış kolleksionerlərindən biri, tədqiqatçı, əntiq əşyalar və şərq xalçaları üzrə mütəxəssis Məhəmməd Əl-Bağdadinin kolleksiyasından seçilmiş, Qərbi Azərbaycan mədəni irsinin zənginliyini, orijinallığını və tarixi dərinliyini əyani şəkildə nümayiş etdirən tekstil, zərgərlik, metal məmulatları, tarixi sikkələr və digər əşyalar sözügedən sərgidə nümayiş olunub. Ekspozisiyada Qərbi Azərbaycan ərazisində yaşayan soydaşlarımızın istifadə etdikləri XVIII-XIX əsrlərə aid məişət və bəzək əşyaları, silah və zirehlər, milli geyimlər, Qərbi Azərbaycan xovlu və xovsuz xalçaları, həmçinin 1654-1720-ci illər ərzində İrəvanda zərb olunmuş Səfəvilərə aid 5 ədəd sikkə nümayiş etdirilib.

Tədbir iştirakçıları sonda xatirə fotosu çəkdiriblər.

Paylaş:

Baxılıb: 443 dəfə