Ulu öndərin xilaskarlıq missiyası

Bakı:

12 °C

87 %

4 m/s

Əlaqə

AZ RU EN

Ana səhifə / Siyasət / Ulu öndərin xilaskarlıq missiyası

Ulu öndərin xilaskarlıq missiyası

13.06.2025 [18:59]

Qurtuluş Günü bizə nə verdi? Bir sıra insanlar, həqiqətən, bu sualın cavabını bilmirlər, cavab tapmaq istəyirlər, bəziləri isə bilərəkdən özlərini bilməməzliyə vurub, düşüncələri zəhərləmək istəyirlər.
Cavabım hamıya aid olacaq. Çünki deyəcəklərim o şərəfli günün həqiqətlərini əks etdirəcək...
Keçən əsrin 90-cı illərinin əvvəllərini yaddan çıxarmaq olmaz. Heç bu mümkün də deyil.
Ölkəmizdə siyasi-iqtisadi vəziyyət nə günə düşmüşdü! Heç kimin gələcəyə ümidi qalmamışdı. Hakimiyyət uğrunda didişmələr, hərc-mərclik, başsızlıq, ordumuzun olmaması – bütün bunlar torpaqlarımızın ermənilər tərəfindən işğal olunmasına, cəmiyyətdə başıpozuqluğa səbəb olurdu. Vətəndaş müharibəsi təhlükəsi qarşısında qalmışdıq. Azərbaycan böyük çətinliklərlə qazandığı müstəqilliyini itirə bilərdi! Vətənimiz, dövlətimiz parçalanmağa doğru gedirdi.
Deyirlər, hər millətin ağır dövründə həmin millətlərin böyük şəxsiyyətlər ortaya çıxır, xalqa, Vətənə dayaq olur. Azərbaycanın məhz, həmin dövründə xalqımız yeganə ümidini Heydər Əliyevə bağladı, Böyük Şəxsiyyəti köməyə çağırdı. Heydər Əliyevin özünün də dediyi kimi, Azərbaycanın çətin dövründə o, kənarda qala bilməzdi, qalmadı da! Xalqın təkidi ilə ikinci dəfə siyasi hakimiyyətə gəldi.
Heydər Əliyev ikinci dəfə hakimiyyətə gəldikdən sonra dövlət çevrilişləri cəhdlərinin qarşısı alındı, təxribatlara, terror aktlarına son qoyuldu, cəbhədə atəşkəs elan edildi, torpaqlarımızın işğalının qarşısı alındı, xarici və daxili düşmənlərimizin dövlətçiliyimizin dağılmasına yönəlmiş əməlləri ifşa olundu.
Ölkədə sabitlik yarandı, səsimiz bütün dünyaya çatdırıldı. Beynəlxalq təşkilatlarla əlaqələr yaradılmağa başlanıldı.
Heydər Əliyevin tarixi qayıdışı nüfuzlu dövlətləri Azərbaycanın mövqeyi ilə razılaşmağa təhrik etdi. Güclü ordu quruculuğuna başlanıldı. Ölkəmiz siyasi, iqtisadi və dövlət böhranından xilas oldu. “Torpaq islahatı haqqında Qanun” həyata keçirildi, “Əsrin müqaviləsi” imzalandı.
Xarici dövlətlər Azərbaycanın ərazi bütövlüyünün toxunulmazlığını təsdiq etdi
Artıq Azərbaycan müstəqil dövlət siyasəti yeritməyə başladı, uca tribunalardan səsimiz bütün dünyaya çatdırıldı.
Heydər Əliyevin rəhbərliyi ilə respublikamızda demokratik dövlət quruculuğu üçün baza yaradıldı. Azərbaycanın yeni Konstitusiyası qəbul edildi, parlamentimizə ilk demokratik və azad seçkilər keçirildi.
Heydər Əliyev Azərbaycanın müstəqilliyini, ərazi bütövlüyünü qorumaq üçün yorulmadan çalışırdı. O, dünya ölkələrinə səfəri zamanı hər yerdə Qarabağ problemini qabardır, cəsarətli çıxışları ilə torpaqlarımızın işğal edildiyini faktlarla sübuta yetirirdi.
Böyük dövlət xadiminin az zamanda həyata keçirdiyi cahanşümul işləri saymaqla bitirmək mümkün deyil!
1993-cü il 15 İyun Qurtuluş Günü xalqımızın istəyi ilə təsis edildi. Ona görə də Qurtuluş Günü respublikamızın vətəndaşları tərəfindən hər il bayram kimi qeyd edilir. Çünki Heydər Əliyev həmin gün ikinci dəfə siyasi hakimiyyətə gəlməklə xalqımızın firavan yaşayacağı günlərin bünövrəsi qoyulmuşdur.
Mən fəxr edirəm ki, Milli Məclisin o zamankı deputatları ilə birlikdə Qurtuluş Gününün təsis edilməsində iştirak etmişəm! Əziz xalqımızı bu şərəfli gün münasibətilə ürəkdən təbrik edirəm!

Xeyrəddin QOCA,
Yazıçı

Paylaş:

Baxılıb: 330 dəfə