Konstitusiya Məhkəməsində MDB Parlament Assambleyasının ekspert qrupunun üzvləri ilə görüş olub

Bakı:

25 °C

64 %

13 m/s

Əlaqə

AZ RU EN

Ana səhifə / Siyasət / Konstitusiya Məhkəməsində MDB Parlament Assambleyasının ekspert qrupunun üzvləri ilə görüş olub

Konstitusiya Məhkəməsində MDB Parlament Assambleyasının ekspert qrupunun üzvləri ilə görüş olub

05.09.2013 [09:43]

Sentyabrın 4-də Azərbaycan Respublikası Konstitusiya Məhkəməsində qarşıdakı prezident seçkilərinin uzunmüddətli monitorinqini həyata keçirən MDB Parlament Assambleyasının (MDB PA) ekspert qrupunun üzvləri ilə görüş keçirilib.
AzərTAc xəbər verir ki, görüşdə Konstitusiya Məhkəməsinin sədri Fərhad Abdullayev ekspert qrupunun prezident seçkiləri ərəfəsində Azərbaycana səfərinin vacib olduğunu qeyd edib. O bildirib ki, MDB Parlament Assambleyasının seçkilərin monitorinqi ilə bağlı həyata keçirdiyi missiya böyük əhəmiyyətə malikdir. F.Abdullayev qeyd edib ki, müasir dövrdə vətəndaşlar seçki hüququna daha çox önəm verirlər: “Çünki insanlar anlayırlar ki, seçkilərdə iştirak ölkənin gələcəyinin müəyyən olunmasında böyük rol oynayır”.
Sədr Konstitusiya Məhkəməsinin tarixi haqda qonaqlara məlumat verərək bildirib ki, bu il 15 illiyini qeyd etmiş Konstitusiya Məhkəməsinin əsas vəzifəsi ölkədə qəbul olunan qanunların və normativ hüquqi aktların Konstitusiyaya uyğunluğuna nəzarət etməkdir. Dövlət strukturları ilə yanaşı, vətəndaşların da birbaşa Konstitusiya Məhkəməsinə müraciət etmək hüququ var. Konstitusiya Məhkəməsinin mühüm funksiyalarından biri də qanunlara rəsmi şərhlərin verilməsidir. Hazırda Konstitusiya Məhkəməsinin dünyanın bir çox müvafiq hüquq institutları ilə əlaqələrinin yarandığını deyən F.Abdullayev ölkə Konstitusiyasına dürüst əməl olunmasının, habelə Avropa Konvensiyasına riayət edilməsinin əsas prioritet olduğunu və Avropa Məhkəməsinin təcrübəsinə istinad edildiyini diqqətə çatdırıb.
MDB Parlament Assambleyası Şurasının baş katibinin müavini, Azərbaycan Milli Məclisinin MDB PA-da nümayəndəsi Aydın Cəfərov qeyd edib ki, ekspert qrupu bu il missiyasını daha geniş ərazidə həyata keçirməyi qərara alıb. “Əgər əvvəlki illərdə seçkilərə hazırlıq işlərinin müşahidəsi Bakı və Sumqayıt şəhərlərində keçirilirdisə, bu il biz bu işi regionlarda da aparmaq qərarına gəldik”, - deyə A.Cəfərov missiyanın artıq Gəncə, Samux, Şəmkir şəhərlərində olduğunu, tezliklə Azərbaycanın cənub bölgəsinə səfər ediləcəyini bildirib. Onun sözlərinə görə, ekspert qrupu eyni zamanda seçki hüququ sahəsində fikir və təcrübə mübadiləsinə də xüsusi əhəmiyyət verir.
MDB PA-nın demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi Beynəlxalq İnstitutunun direktoru Dmitri Qladey məlumat verib ki, missiya Gəncə və digər şəhərlərdə dairə və məntəqə seçki komissiyalarının formalaşması, təqvim planlarının tərtib edilməsi və digər proseslərlə tanış olub. Bütün bunlar geniş faktiki materialların toplanmasına şərait yaradıb.
Sonra görüş müzakirələrlə davam edib.

Paylaş:

Baxılıb: 1227 dəfə