Məzahir Pənahov: Müstəqil Mətbuat Mərkəzinin yaradılması təcrübəsi inkişaf etmiş ölkələrdə tətbiq olunur

Bakı:

16 °C

72 %

8 m/s

AZ RU EN

Ana səhifə / Siyasət / Məzahir Pənahov: Müstəqil Mətbuat Mərkəzinin yaradılması təcrübəsi inkişaf etmiş ölkələrdə tətbiq olunur

Məzahir Pənahov: Müstəqil Mətbuat Mərkəzinin yaradılması təcrübəsi inkişaf etmiş ölkələrdə tətbiq olunur

03.10.2013 [10:34]

Qarşıdan gələn prezident seçkilərinin geniş və obyektiv işıqlandırılması məqsədi ilə oktyabrın 2-də “Hilton Baku” otelində yaradılmış Müstəqil Mətbuat Mərkəzinin açılışı olub.
AzərTAc xəbər verir ki, əvvəlcə Mərkəzi Seçki Komissiyasının (MSK) sədri Məzahir Pənahov seçkilərə hazırlığın vəziyyəti ilə bağlı mətbuat konfransı keçirib.
M.Pənahov deyib ki, seçki prosesinin şəffaf təşkili, səsvermənin tam demokratik keçirilməsi üçün lazımi şərait yaradılıb. Əgər kiminsə adı hər hansı səbəbdən seçici siyahısına düşməyibsə, səsvermə günü şəxsiyyət vəsiqəsi ilə məntəqəyə gələrək Konstitusiya hüququndan istifadə edə bilər.
MSK sədri bildirib ki, ümumilikdə respublika ərazisində və Azərbaycanın xarici ölkələrdəki səfirliklərində, konsulluq və nümayəndəliklərində 5491 məntəqə yaradılıb. Bu məntəqələrdə 5 milyon 145 minə yaxın seçici öz seçimini edəcək. Səsvermə prosesinin izlənilməsi üçün məntəqələrin 20 faizində veb-kameralar quraşdırılıb. Dünyanın istənilən yerindən səsvermə günü MSK-nın internet saytına daxil olmaqla həmin məntəqələrdə prosesi onlayn rejimdə izləmək mümkün olacaq. Bu, artıq beynəlxalq miqyasda Azərbaycan təcrübəsi kimi ad qazanıb və müxtəlif ölkələr bunu tətbiq etməyə başlayıblar.
Seçki prosesinin işıqlandırılmasında jurnalistlərin xüsusi rolunu diqqətə çatdıran M.Pənahov mətbuatın bu prosesdə fəal iştirak etdiyini vurğulayıb.
Bildirilib ki, prezident seçkilərini izləmək üçün 40 minə yaxın müşahidəçi qeydiyyatdan keçib. Eyni zamanda, prosesi 50-yə yaxın beynəlxalq təşkilatdan 1300-dən artıq müşahidəçi izləyəcək. Beynəlxalq müşahidəçilərin tərkibində təxminən 100-ə yaxın ölkənin nümayəndəsi var.
Yeni yaradılan Müstəqil Mətbuat Mərkəzi barədə məlumat verən MSK sədri deyib ki, həm yerli və xarici KİV nümayəndələri, həm də prezidentliyə namizədlər və onların təmsilçiləri, beynəlxalq müşahidə missiyasının üzvləri buradakı imkanlardan istifadə edərək, mətbuat konfransı keçirə, media üçün açıqlama verə, proses barədə məlumatları paylaşa bilərlər. Yalnız hər hansı problemin yaranmaması üçün istənilən tədbir barədə mərkəzin əlaqələndiricisi əvvəlcədən məlumatlandırılmalıdır. Bundan başqa, namizədlər öz broşürlərini, məlumat materiallarını da mərkəzdə yerləşdirə bilərlər.
Diqqətə çatdırılıb ki, kompyuterlərlə təchiz olunmuş Müstəqil Mətbuat Mərkəzində jurnalistlər yüksəksürətli internetdən istifadə edərək seçki prosesi barədə məlumatları operativ ötürə biləcəklər.
Bildirilib ki, bu cür təcrübə inkişaf etmiş ölkələrdə tətbiq olunur və bu, seçki prosesinin şəffaf işıqlandırılmasında maksimum tələblərə cavab verən səviyyədir.
Sonda jurnalistlərin sualları cavablandırılıb.

Paylaş:

Baxılıb: 1139 dəfə