ATƏT PA müşahidə missiyasının rəhbəri: Seçkilərin yaxşı təşkilinə görə Azərbaycan hökumətinə minnətdarlığımı çatdırıram

Bakı:

12 °C

76 %

5 m/s

AZ RU EN

Ana səhifə / Siyasət / ATƏT PA müşahidə missiyasının rəhbəri: Seçkilərin yaxşı təşkilinə görə Azərbaycan hökumətinə minnətdarlığımı çatdırıram

ATƏT PA müşahidə missiyasının rəhbəri: Seçkilərin yaxşı təşkilinə görə Azərbaycan hökumətinə minnətdarlığımı çatdırıram

15.10.2013 [09:35]

ATƏT-in Demokratik Təsisatlar və İnsan Haqları Bürosunun (DTİHB) seçkiləri qiymətləndirmə metodologiyasına yenidən baxılmalıdır. Trend-in məlumatına görə, bu barədə Monteneqronun Budva şəhərində keçirilən ATƏT Parlament Assambleyasının payız sessiyası çərçivəsində Daimi Komitənin iclasında Azərbaycanda keçirilmiş prezident seçkilərində ATƏT PA-dan iştirak edən müşahidə missiyasının rəhbəri, Almaniyadan olan millət vəkili Doris Barnet bildirib.
D.Barnet ABŞ ilə Azərbaycanda və ya Almaniya ilə Ukraynada keçirilən seçkilərə eyni meyarlarla yaxınlaşmağın doğru olmadığını qeyd edib: “Baş vermiş qüsurları isə pisləmək deyil, onların aradan qaldırılmasına yardımçı olmaq lazımdır”.
Müşahidə missiyasının rəhbəri seçki günü 59 seçki məntəqəsində apardıqları müşahidələrin nəticəsi olaraq, seçki prosesinin yaxşı təşkil edildiyini, bir çox cəhətlərə görə Azərbaycandakı son seçkilərin ölkəsində keçirilən seçkilərdən demək olar ki, heç fərqlənmədiyini bildirib.
D.Barnet mənfi hallarla bağlı məlumatların bir sıra hallarda yalnız müəyyən QHT-lərin yoxlanılmamış məlumatlarına əsaslandığını təəssüflə qeyd edib və ümumiyyətlə, QHT-lər tərəfindən təqdim olunan bütün məlumatların ATƏT/DTİHB tərəfindən birmənalı olaraq qəbul edilməsinin düzgün olmadığını vurğulayıb.
O, namizədlərin öz təbliğat fəaliyyətlərini həyata keçirməsi üçün 152 yer ayrıldığını, müşahidəçilərin isə həmin yerlərdən yalnız 52-də olduğunu və bununla bağlı fikirlərini hesabata daxil etmədiklərini söyləyib. Həmçinin, namizədlərdən birinə daha çox efir vaxtının ayrılması ilə bağlı irada münasibət bildirən D.Barnet qeyd edib ki, Almaniyada seçkilər ərəfəsində də Angela Merkelə onun gündəlik fəaliyyəti baxımından digərlərinə nisbətən daha artıq vaxt ayrıldığını vurğulayıb.
Azərbaycanda keçirilən prezident seçkilərində ATƏT-in fəaliyyətdə olan sədrinin xüsusi əlaqələndiricisi və ATƏT qısamüddətli müşahidə missiyasının rəhbəri Mişel Vuazen isə çıxışında Azərbaycana müşahidə missiyasının üzvü kimi dördüncü dəfə səfər etdiyini və Azərbaycanın düzgün yolda irəliləməsinin şahidi olduğunu, bunu Avropa Parlamenti və AŞ PA-nın mövqeyinin də sübut etdiyini bildirib, tam məsuliyyəti ilə Azərbaycandakı prezident seçkilərinin düzgün, ədalətli, açıq və şəffaf keçirildiyini bəyan etdiyini vurğulayıb, seçkilərin AP, AŞ PA və ATƏT PA-nın standartlarına uyğun keçirildiyini söyləyib: “ATƏT/DTİHB-nin bəzi məntəqələrdə baş vermiş kiçik qüsurlar haqqında verilən məlumatlar əsasında ümumi seçki prosesinə qiymət verməsi düzgün deyil: “DTİHB-nin hazırladığı hesabatla mənim və ATƏT PA müşahidəçilərinin fikirləri üst-üstə düşmürdü. Amma onlar bizim fikrimizi dinləmək istəmirdilər. Nə qədər çalışsaq da, onlarla bir kompromis əldə edə bilmədik. Ona görə də mən ATƏT/DTİHB-nin ilkin hesabatı açıqlandıqdan sonra ayrıca bəyanatla çıxış etmək məcburiyyətində qaldım. Çünki ilkin hesabatın mətni hazırlanarkən bizim mövqeyimiz nəzərə alınmamışdı. Seçkilərin qiymətləndirilməsində kontraktla işləyən müşahidəçilərlə xalqın seçdiyi millət vəkili olan müşahidəçilərin mövqelərində fərqlər var idi. DTİHB öz fəaliyyəti ilə ATƏT-ə ağılsız xidmət göstərmiş oldu”.
O vurğulayıb ki, ümumiyyətlə, seçkiləri müşahidə edən müşahidəçilərin “davranış kodeksi”nin hazırlanması yaxşı olardı: “Seçkilərin nəticəsi olaraq, namizədlərdən biri şəksiz qələbə qazanıb. Bunu “exit-poll”ların nəticələri də göstərirdi. Amma ATƏT/DTİHB bizə bunları deməyə imkan vermək istəmirdi. Seçkilərdə vətəndaşların öz fikirlərini ifadə etməsi üçün tam şərait yaradılmışdı. Seçkilərin yaxşı təşkilinə görə Azərbaycan hökumətinə minnətdarlığımı çatdırıram”.
ATƏT PA-da Azərbaycan Parlamenti nümayəndə heyətinin rəhbəri Bahar Muradova Azərbaycan xalqının siyasi sabitliyə, əmin-amanlığa, sosial-iqtisadi tərəqqiyə səs verdiyini, Azərbaycan Prezidentinə ünvanlanan təbrik məktublarında da seçkilərin azad və ədalətli keçirilməsi, Azərbaycanın beynəlxalq öhdəliklərinə və standartlara cavab verməsinin əksini tapdığını vurğulayıb. B.Muradova 1300 beynəlxalq müşahidəçinin izlədiyi seçkilərin ədalətli və şəffaf, yüksək seçici aktivliyi şəraitində, Azərbaycan Respublikasının Konstitusiyası və Seçki Məcəlləsinin müddəalarına uyğun olaraq keçirildiyini bildirib. O, beynəlxalq müşahidəçilərin mütləq əksəriyyətinin seçki prosesini yüksək qiymətləndirdiyini, seçkinin nəticələrinə kölgə sala biləcək hər hansı ciddi halın baş vermədiyini vurğulayıb.
B.Muradova ATƏT/DTİHB-nin hesabatında seçki prosesinin müsbət tərəflərinin əksini tapmamasına görə öz haqlı etirazlarını və mövqelərini bəyan edən ATƏT PA-nın üzvləri M.Vuazen və D.Barnetə minnətdarlığını ifadə edib. ATƏT/DTİHB-nin ATƏT PA üzvlərini öz hazırladıqları ilkin hesabatın altında imza atmağa məcbur etmək cəhdlərinin ən azı təəssüf doğurduğunu vurğulayıb: “Seçkilərdə qüsurların olduğunu heç kim inkar edə bilməz. Hər ölkədə keçirilən seçkilərdə nöqsanlar olur. Amma bu heç cür əsas vermir ki, Azərbaycan xalqının azad şəkildə ifadə olunmuş iradəsi şübhə altına alınsın. “Exit-poll”ların nəticələrini və İlham Əliyevin ölkədəki nüfuzunu nəzərə alaraq, nə Prezident, nə Onun rəhbərlik etdiyi partiya, nə də seçicilər heç bir formada hüquq pozuntularına yol verilməsi marağında olmayıblar. Baş vermiş hüquq pozuntuları ilə bağlı isə müvafiq orqanlar zəruri tədbirlər görəcəklər”.

Paylaş:

Baxılıb: 1033 dəfə