Mətbuat Şurasında “Beynəlxalq münasibətlər mövzusu media müstəvisində” adlı “dəyirmi masa” keçirilib

Bakı:

29 °C

52 %

2 m/s

AZ RU EN

Ana səhifə / Siyasət / Mətbuat Şurasında “Beynəlxalq münasibətlər mövzusu media müstəvisində” adlı “dəyirmi masa” keçirilib

Mətbuat Şurasında “Beynəlxalq münasibətlər mövzusu media müstəvisində” adlı “dəyirmi masa” keçirilib

01.11.2013 [15:34]

Oktyabrın 31-də Azərbaycan Mətbuat Şurasında (MŞ) “Beynəlxalq münasibətlər mövzusu media müstəvisində” adlı “dəyirmi masa” keçirilib.
AzərTAc xəbər verir ki, tədbir MŞ-nin beynəlxalq münasibətlər komissiyasının təşəbbüsü ilə reallaşan “Azərbaycanın beynəlxalq əlaqələri ölkəmizin kütləvi informasiya vasitələrində: mövcud durum və peşəkarlığın artırılması yolları” layihəsi çərçivəsində təşkil olunub.
Tədbirdə Mətbuat Şurasının sədri Əflatun Amaşov çıxış edərək layihə çərçivəsində nəzərdə tutulan işlər barədə məlumat verib. Bildirilib ki, layihənin rəhbəri, Milli Məclisin deputatı, MŞ-nin beynəlxalq münasibətlər komissiyasının rəhbəri Cavanşir Feyziyevdir.
Diqqətə çatdırılıb ki, layihə çərçivəsində Mətbuat Şurası tərəfindən mövzuya uyğun olaraq 20 aparıcı qəzet və 10 informasiya agentliyi və xəbər portalında son bir ayda işıq üzü görən yazıların monitorinqi aparılıb. Monitorinq nəticəsində 3200-dən çox yazının çap olunduğu aşkarlanıb. Araşdırmalar göstərib ki, qəzetlərə nisbətən, informasiya agentliyi və xəbər portallarında Azərbaycanın beynəlxalq münasibətlərinə daha çox yer ayılıb. Bu yazıların tam əksəriyyəti xəbərdir, çox az yazılar təhlil xarakterlidir. Analitik yazılara isə daha çox qəzetlərdə üstünlük verilib.
MŞ-nin sədri deyib ki, məqsədimiz bir il ərzində davam edəcək monitorinqlər nəticəsində Azərbaycanın beynəlxalq münasibətlərinə üstünlük verən yazı müəlliflərini aşkarlamaq və onların hansı dilləri bildiyini müəyyənləşdirməkdir. Bundan sonra bu jurnalistlərin peşəkarlığını artırmaq üçün xaricdən mütəxəssislər dəvət edərək onlara ustad dərslərinin keçirilməsini təşkil etmək niyyətindəyik. Eyni zamanda, daha layiqlilərini seçərək təcrübə mübadiləsi keçmək üçün Rusiya, Avropa, ABŞ və digər nüfuzlu ölkələrin tanınmış media orqanlarına göndərəcəyik. Hər il beş jurnalistin bu fürsətdən yararlanmasına çalışacağıq.
Tədbirdə çıxış edən Cavanşir Feyziyev deyib ki, monitorinqlər son 20 ildə Azərbaycan mətbuatının beynəlxalq arenaya çıxışının heç də yüksək səviyyədə təşkil edilmədiyini deməyə əsas verir. Bu layihə ölkəmizdə beynəlxalq jurnalistikanın inkişafına, genişlənməsinə təkan verəcək. Azərbaycanda beynəlxalq mövzuda yazan jurnalistlərin analitik yazıları çox azdır. Bu yazıların da çoxu xarici mediaya istinad əsasında hazırlanır. Biz istəyirik ki, jurnalistlərimiz özləri bu informasiyaların yayımçısına çevrilsinlər. Azərbaycan jurnalisti beynəlxalq arenaya çıxmalıdır. Biz belə media mənsublarının inkişafı istiqamətində mühüm addımlar atmalıyıq.
C.Feyziyev deyib ki, bir il davam edəcək bu layihə çərçivəsində müxtəlif görüşlər, konfranslar, müsabiqələr təşkil ediləcək və bu tədbirlər, ümumilikdə, bacarıqlı, xarici dilləri bilən jurnalistlərin üzə çıxmasına yardımçı olacaq.
Tədbirdə Milli Məclisin deputatları Musa Qasımlı, Rasim Musabəyov, Bəxtiyar Sadıqov və başqaları çıxış edərək layihəni yüksək qiymətləndirib, öz təklif və tövsiyələrini veriblər.

Paylaş:

Baxılıb: 1052 dəfə