Birinci vitse-prezidentdən sərrast cavab

Bakı:

22 °C

62 %

6 m/s

Əlaqə

AZ RU EN

Ana səhifə / Siyasət / Birinci vitse-prezidentdən sərrast cavab

Birinci vitse-prezidentdən sərrast cavab

17.02.2026 [10:50]

Yeni dünya nizamı yaranır. Dünyanın geosiyasi xəritəsində sərhədlər müəyyənləşdirilir. Hər kəsin yeri fərqlidir - kimisi düz mərkəzdə, proseslərin nüvəsində yer alır, kim(lər) də küncə qoyulur. Yəni bütün proseslərdən uzaqlarda, müşahidə postunda, başqa sözlə, kənarında, haradasa künc-bucaqda. Bütün bunları müəyyənləşdirən meyar isə peşəkarlıq səviyyəsidir. Ölkə rəhbəri Prezident cənab İlham Əliyevin uğurla həyata keçirdiyi çoxvektorlu daxili və xarici siyasəti nəticəsində Azərbaycan dövləti bu gün superdövlətlərlə eyni masada yer alır. Masanın tam mərkəzində. Haradan ki, müasir dünya üçün yeni qərarlar qəbul edilir; harada ki, dünya gücləri əyləşir. Son bir neçə ay ərzində şahidlik etdiyimiz proseslər və qarşıdakı perspektivlər bütün bunların ən aydın nümunəsidir, küncdəkilər (küncə qoyulanlar) üçün isə sübutu da hesab oluna bilər.

Dövlətimizin bu uğurlarını həzm edə bilməyən qüvvələr isə hər vəchlə öz çirkin qaraxayaxma kampaniyalarına davam edirlər. Bu günə qədər dəfələrlə onlara ən müxtəlif cavablar verilib. Lakin sonuncu cavab xaricdən maliyyələşən antimilli ünsürlərə həm də bir dərs oldu. Söhbət Münhen Təhlükəsizlik Konfransında qapı önündə dayanaraq, təxribat cəhdlərini davam etdirən Emin Hüseynovun sual vermək üçün müraciətinə Azərbaycanın Birinci vitse-prezidenti hörmətli Mehriban xanım Əliyevanın cavabından gedir. Həmin kadrları izləməyənlər üçün qısa bir xatırlatma etməkdə fayda var. Belə ki, sözügedən video Emin Hüseynovun konfrans zalından çıxan Mehriban xanım Əliyevaya “Azərbaycanda demokratiya ilə bağlı” sual vermək istədiyini bildirməsi ilə başlayır. Mehriban Əliyeva isə ayaq saxlayaraq, “Qadın paltarında səfirlikdə gizlənən insan sizsiniz? Sizə can sağlığı arzulayıram” - deyə, yoluna davam edib.

Təxminən yarım dəqiqəlik bir video əslində bir neçə yüz səhifəlik siyasi dərslik hesab oluna bilər. Birinci ona görə ki, Azərbaycan dövləti ona qarşı yönələn heç bir təxribatın qarşısında cavabsız qalacaq qədər gücsüz deyildir. Başqa sözlə, dövlətin bütün sahələrdə silah-sursatı kifayət qədərdir. Digər bir məqam hörmətli Mehriban xanımın timsalında Azərbaycan qadının mərhəmətinin, kübarlığının, incəliyinin təcəssümüdür. Mehriban xanım antimilli fəaliyyətlə məşğul olan Emin Hüseynova çox sakit, kübar bir şəkildə ağır bir dərs verir. Həm də Hüseynovu küncə qoyur, özü də tək ayağı üzərində dayanması şərti ilə. Mehriban xanım eminkimilərin nə vaxtsa dövlətinə layiqli vətəndaş olmalarına da haradasa inanır, başqa sözlə, onların islah olmaları üçün də mesaj verir. Eminə cansağlığı arzulamağı da unutmayan Mehriban xanımın bu ifadələri bütün antimilli ünsürlər üçün çağırış da hesab oluna bilər. Yəni sizin etdiyiniz bütün cinayətlər, çirkli əməllər bir müddət sonra əfv də oluna bilər. Çünki Azərbaycan dövləti humanizm və mərhəmət prinsiplərinə yüksək önəmini hər zaman nümayiş etdirir və həmrəyliyin gücləndirilməsinə yönəlik mühüm addımlar atır. Yetər ki, bu dırnaqarası niyyətlərdən əl çəkin.

Əks halda, Eminin timsalında bütün antimilli ünsürlər küncdə qalacaqlar, özü də tək ayaq üzərində.

Nicat Dilqəmli

Qısa arayış: Haqqında danışılan Emin Hüseynov Soros Fondunun vəsaitlərindən qeyri-şəffaf istifadə etməsi və ayrılan külli miqdarda vəsaiti talaması üzə çıxandan sonra ölkədən qaçmışdı. O, ölkədən qaçarkən qadın paltarından istifadə etmişdi. E.Hüseynov hazırda da antimilli fəaliyyətini davam etdirir. Hətta 44 günlük savaşda “novarçı” donuna girərək, erməni işğalının davam etməsi üçün təbliğat aparırdı. “Erməni hüquqlarının müdafiəçisi” kimi tanınan Emin Hüseynov erməni diaspor təşkilatlarının maliyələşdirdiyi qurumlardan qrant alır. Emin Hüseynov Mehman Hüseynovun böyük qardaşıdır.

Paylaş:

Baxılıb: 486 dəfə