Bakıda “XIX əsrin əvvəllərində Qafqaz müharibələri və onların nəticələri” mövzusunda Beynəlxalq elmi konfrans keçirilir

Bakı:

29 °C

48 %

4 m/s

AZ RU EN

Ana səhifə / Siyasət / Bakıda “XIX əsrin əvvəllərində Qafqaz müharibələri və onların nəticələri” mövzusunda Beynəlxalq elmi konfrans keçirilir

Bakıda “XIX əsrin əvvəllərində Qafqaz müharibələri və onların nəticələri” mövzusunda Beynəlxalq elmi konfrans keçirilir

07.12.2013 [08:31]

Dekabrın 6-da Bakıda Azərbaycan Milli Elmlər Akademiyasının (AMEA) A.A.Bakıxanov adına Tarix İnstitutunun təşkilatçılığı ilə “XIX əsrin əvvəllərində Qafqaz müharibələri və onların nəticələri” mövzusunda Beynəlxalq elmi konfrans işə başlayıb.
AzərTAc xəbər verir ki, Azərbaycanı iki yerə parçalamış Gülüstan müqaviləsinin bağlanmasının 200 illiyinə həsr olunmuş konfransın işində 8 ölkədən - Azərbaycan, Türkiyə, Rusiya, Ukrayna, Gürcüstan, ABŞ, İran və Albaniyadan 80-ə yaxın alim iştirak edir.
Konfransı giriş sözü ilə açan institutun direktoru, AMEA-nın müxbir üzvü, Milli Məclisin deputatı Yaqub Mahmudov tarixə bir daha nəzər salmağın vacibliyini bildirib və qeyd edib ki, bugünkü tədbir bir çox tarixi həqiqətlərin üzə çıxarılması məqsədi ilə keçirilir.
Qafqaz müharibələrinin səbəbləri və onların acı nəticələrindən danışan institutun direktoru deyib ki, hadisələrə dövlətlərin siyasəti baxımından deyil, tarix elminin mənafeyi baxımından yanaşılmalıdır. Yalnız belə olduğu halda tarixi araşdırmalar həqiqətə söykənə bilər. O, deyib ki, çar Rusiyasının işğalçılıq siyasəti və Osmanlı imperiyasının Cənubi Qafqaza münasibəti araşdırılarkən bundan nə demokratik Rusiyanın, nə də Mustafa Kamal Atatürkün qurduğu Türkiyənin tarixçi alimləri narahat olmamalıdırlar. Tarix düzgün araşdırmalıdır, olduğu kimi yazılmalıdır. Qafqaz müharibələri və onların nəticələri barədə sənədlər əsasında yazılanlar qardaş Türkiyənin və bizimlə dostluq əlaqələri gündən-günə möhkəmlənən Rusiyanın alimləri tərəfindən incikliklə qarşılanmamalıdır.
Daha sonra Türkiyənin Atatürk Araşdırma Mərkəzi sədrinin müavini Nihat Böyükbaş və Başbakanlıq Arxivləri baş müdirinin köməkçisi Mustafa Budak çıxış edərək konfransın işinə uğurlar arzulayıblar.
Plenar iclasda AMEA-nın Tarix İnstitutunun şöbə müdiri, “Azərbaycan Tarix Qurumu” İctimai Birliyinin sədri Tofiq Mustafazadənin “1813-cü il Gülüstan müqaviləsinə aparan yollar: müqavilənin hüquqi və tarixi nəticələri”, İstanbul Universitetinin professoru Xəlil Balın “Osmanlı dövləti ilə Rusiya arasında bağlanan Ədirnə anlaşması və Qafqaza dair məsələlər”, Suxumi Dövlət Universitetinin professoru Quram Marxuliyanın “XIX əsrin ilk yarısında Cənubi Qafqaz uğrunda geosiyasi mübarizə” və Tarix İnstitutunun şöbə müdiri Kərim Şükürovun “Qafqaz müharibələri və Rusiya imperiyasının regionda ərazi və əhalinin artım dinamikası” mövzularında məruzələri dinlənilib.
Konfrans bu gün işini davam etdirəcək.
Yerli və xarici alimlərin məruzələri dörd bölmə iclasında dinləniləcək və müzakirələr aparılacaq.

Paylaş:

Baxılıb: 1081 dəfə