Askar Aytmatov: Azərbaycan bütün sahələrdə böyük uğurlar qazanıb

Bakı:

13 °C

82 %

6 m/s

Əlaqə

AZ RU EN

Ana səhifə / Siyasət / Askar Aytmatov: Azərbaycan bütün sahələrdə böyük uğurlar qazanıb

Askar Aytmatov: Azərbaycan bütün sahələrdə böyük uğurlar qazanıb

18.12.2013 [09:14]

Hər şeydən əvvəl türk dünyasında, MDB-də və digər ölkələrdə Çingiz Aytmatov istedadının pərəstişkarlarına öz yazıçılarının xatirəsinə göstərdikləri sadiqliyə görə minnətdarlığımı bildirirəm.
Bu sözləri türk dünyasının görkəmli yazıçısı Çingiz Aytmatovun 85 illik yubileyi tədbirlərində iştirak etmək üçün Bakıya gəlmiş dünya şöhrətli ədibin oğlu Askar Aytmatov AzərTAc-a müsahibəsində deyib.
Görkəmli yazıçının oğlu bildirib ki, Çingiz Aytmatovun Azərbaycanda ən oxunulan, sevimli yazıçılardan biri olmasından son dərəcə məmnunam: “Hədsiz dərəcədə sevinirəm ki, onun əsərlərini vətəni Qırğızıstandan sonra daha çox Azərbaycanda oxuyurlar. Deməli, Çingiz Aytmatov təkcə qırğızların deyil, həm də Azərbaycanın, ümumilikdə, türk dünyasının yazıçısıdır. Çox şadam ki, Bakıda onun 85 illik yubileyinə həsr olunmuş təntənəli mərasim keçirilir. Bu mərasimdə Azərbaycanın görkəmli ziyalıları, yazıçıları, yaradıcı insanlar iştirak edəcəklər”.
Ölkəmizdə on il əvvəl olduğunu deyən Askar Aytmatov bu müddətdə Azərbaycanda inanılmaz dəyişikliklərin baş verdiyini diqqətə çatdırıb. Bildirib ki, Bakı çox gözəlləşib və yeniləşib. Dəyişikliklər davam edir. Azərbaycanın bütün sahələrdə, o cümlədən iqtisadiyyatda, xalqın rifahının yüksəlməsi, beynəlxalq aləmdə böyük uğurlar qazanması türk dünyasının bir nümayəndəsi olaraq məni hədsiz sevindirir.
Qonaq vurğulayıb ki, oxşar tarixi və mədəni köklərə malik olan qırğız və Azərbaycan xalqları arasında əməkdaşlıq dövlət başçıları səviyyəsində yüksək səviyyədə davam etdirilir. Keçən il Qırğız Respublikasının Prezidenti Almazbek Atambayev Azərbaycanda rəsmi səfərdə olub. Bu səfərdən sonra iki qardaş xalq arasında əlaqələrin inkişafında yeni mərhələ başlanıb. Hazırda iqtisadi əlaqələrin daha da dərinləşməsi üçün ikitərəfli vacib layihələr üzərində iş gedir. Bir sözlə, əlaqələrimizi daha da genişləndirmək üçün potensial böyükdür. Hər iki ölkə türk dünyasının mühüm dövlətlərindən sayılır. Bütün bunlar tərəflər arasında əməkdaşlığı möhkəmləndirir.
Askar Aytmatov atasını xeyirxah, zəhmətkeş bir insan, hər şeydən əvvəl nümunəvi ailə başçısı kimi xatırladığını deyib. Bildirib ki, atam “Erkən durnalar” povestini yaşadığı çətin, hərbi dövrün uşaqlıq xatirələri əsasında yazıb və o vaxt balaca bir oğlan olan mənə həsr edib. Bu əsər mənim bir insan kimi formalaşmağımda böyük rol oynayıb.
Görkəmli yazıçının oğlu Çingiz Aytmatov yaradıcılığının pərəstişkarlarına dərin təşəkkürünü bildirib. Qeyd edib ki, onun əsərləri türk dünyasının mənəvi sərvətidir: “Çox şadam ki, Çingiz Aytmatov ümumi türk dəyərlərimizi öyrənməyə və oxucuya çatdırmağa müvəffəq olub. Ona görə də onun əsərləri bizlərə yaxın və doğmadır. Çingiz Aytmatovun əsərləri ilə postsovet məkanında bir neçə nəsil tərbiyə alıb. Bəlkə də hər birimizin qəlbində onun aşılamaq istədiyi humanist ideyalardan bir zərrə var. Arzu edərdim ki, böyük ədibin pərəstişkarları öz övladlarına bu ideyaları aşılasınlar. Əgər belə olarsa, Çingiz Aytmatov obrazı hər bir türk övladının qəlbində daim yaşayar və bu bağlılıq tarix boyu davam edər”.

Paylaş:

Baxılıb: 913 dəfə