“İKT ili” çərçivəsində Binəqədi rayon İcra Hakimiyyətində görülmüş işlərin təqdimat mərasimi keçirilib

Bakı:

24 °C

64 %

10 m/s

AZ RU EN

Ana səhifə / Siyasət / “İKT ili” çərçivəsində Binəqədi rayon İcra Hakimiyyətində görülmüş işlərin təqdimat mərasimi keçirilib

“İKT ili” çərçivəsində Binəqədi rayon İcra Hakimiyyətində görülmüş işlərin təqdimat mərasimi keçirilib

19.12.2013 [09:27]

Xaləddin İsgəndərov: 2013-cü ilin Azərbaycanda “İnformasiya kommunikasiya texnologiyaları ili” elan edilməsi ölkəmizdə bu sahənin inkişafına olan diqqətin göstəricisidir
Binəqədi rayon İcra Hakimiyyətində “İKT ili” çərçivəsində görülmüş işlərin təqdimat mərasimi keçirilib. Mərasim reallaşdırılan tədbirlərə dair video-çarxın nümayişilə başlayıb.
Tədbirdə çıxış edən Binəqədi rayon İcra Hakimiyyətinin başçısı Xaləddin İsgəndərov müasir tələblər baxımından informasiya kommunikasiya texnologiyalarının inkişaf səviyyəsinin, eyni zamanda, hər bir dövlətin hərbi-siyasi və sosial-iqtisadi potensialının göstəricilərindən biri olduğunu deyib. Onun sözlərinə görə, Azərbaycan da bu mənada istisna təşkil etmir və informasiya cəmiyyətinə keçid üçün respublikada əlverişli şəraitin yaradılması ölkəmizin ali məqsədlərindən biridir: “2013-cü ilin Azərbaycanda “İnformasiya kommunikasiya texnologiyaları ili” elan edilməsi də ölkəmizdə bu sahənin inkişafına olan diqqətin göstəricisidir”.
İcra Hakimiyyətinin başçısı onu da deyib ki, Azərbaycanda İKT infrastrukturunun yaradılmasına və gücləndirilməsinə, İKT xidmətlərinin tətbiqinin genişləndirilməsinə böyük diqqət yetirilir. Əksər sahələrdə bu texnologiyaların tətbiqində ciddi uğurlar qazanılıb. Bu mənada təsadüfi deyil ki, hazırda İKT sektoru Azərbaycanda energetikadan sonra ən dinamik inkişaf edən sahədir. Respublikamızda ən yeni texnologiya - 4G-nin tətbiqi, milli irsimiz və mədəniyyətimizlə bağlı materialların virtual məkanda daha dolğun şəkildə yerləşdirilməsi, azərbaycandilli internet resurslarının zənginləşdirilməsi, internet-radio və internet-televiziya proqramları, elektron qəzet və jurnalların yayılması, sosial şəbəkələrin geniş yer alması və respublika əhalisinin əksər hissəsinin internetdən istifadə etməsi, “ASAN” xidmət mərkəzlərinin yaradılması informasiya kommunikasiya texnologiyalarının inkişafının əyani göstəricisidir.
Daha sonra, Binəqədi rayon İcra Hakimiyyətinin İKT sahəsində strategiyası və onun əsas prinsipləri barədə ətraflı məlumat verilib, həmçinin, ayrı-ayrı sahələr üzrə təqdimatlar olub. Belə ki, Binəqədi rayon İcra Hakimiyyətinin Sakinlərin Müraciəti Xidmətinin rəisi Anar Səfərov “1646 xidməti” və yeni yaradılmış internet səhifəsi, YAP Binəqədi rayon təşkilatının Aparat rəhbəri Qabil Qafarov və “Binəqədi Sahibkarları” İctimai Birliyinin icraçı direktoru Yavər Şahbazov isə tədbir iştirakçılarını təmsil etdikləri qurumların veb səhifələri ilə tanış ediblər.
Eyni zamanda, Binəqədi rayon İcra Hakimiyyəti başçısı Aparatının Rayon təsərrüfatı şöbəsinin müdiri Ədalət Rəcəbov “Operativ məlumatlar” alt modulu, Sosial-iqtisadi inkişafın təhlili və proqnozlaşdırılması şöbəsinin müdiri Yəhya Əliyev “Statistik hesabatlar” alt modulu, Ərazi idarəetmə və yerli özünüidarəetmə orqanları ilə iş şöbəsinin müdiri Ramiz Göyüşov isə “Ev təsərrüfatları” alt modulu haqqında tədbir iştirakçılarına geniş məlumat veriblər.
Təqdimat mərasimində çıxış edən vergilər nazirinin müşaviri Akif Musayev və Milli Məclisin deputatı Rafael Cəbrayılov rayon İcra Hakimiyyətində “İKT ili” çərçivəsində görülmüş işləri yüksək qiymətləndiriblər.
Nadir AZƏRİ

Paylaş:

Baxılıb: 1055 dəfə