“Azərbaycan gəncliyi 2011-2015-ci illərdə Dövlət Proqramı”nın icrasına dair müzakirələr səmərəli olub

Bakı:

24 °C

63 %

11 m/s

AZ RU EN

Ana səhifə / Siyasət / “Azərbaycan gəncliyi 2011-2015-ci illərdə Dövlət Proqramı”nın icrasına dair müzakirələr səmərəli olub

“Azərbaycan gəncliyi 2011-2015-ci illərdə Dövlət Proqramı”nın icrasına dair müzakirələr səmərəli olub

12.02.2014 [09:19]

Fevralın 11-də Bakıda “Azərbaycan gəncliyi 2011-2015-ci illərdə Dövlət Proqramı”nın icrası üzrə Əlaqələndirmə Şurasının növbəti iclası keçirilib.
AzərTAc xəbər verir ki, Əlaqələndirmə Şurasının sədri, gənclər və idman naziri Azad Rəhimov əvvəlcə ötən dövrdə görülən işlər barədə məlumat verib.
Dövlət Proqramının reallaşdırılmasına gənclər təşkilatlarının fəal qoşulduqlarını deyən Şuranın sədri bildirib ki, ölkəmizdə 3 milyona yaxın gənc var. Onların mənəvi və fiziki sağlamlığı, məşğulluğu, ictimai işlərdə fəallığı, vətənpərvərlik ruhunda tərbiyəsi, yaradıcılıqlarının dəstəklənməsi, qeyri-formal təhsili, intellektual inkişafı, beynəlxalq səviyyədə əməkdaşlığı və digər istiqamətlərdə əhəmiyyətli işlər görülüb. Bunun nəticəsidir ki, Azərbaycan gəncləri bir çox uğurlara imza atır, cəmiyyətdə fəal rol oynayırlar.
“Bu gün Azərbaycanda gənclər siyasəti uğurla aparılır”, - deyən A.Rəhimov bildirib ki, “2014-cü il Gənclər üçün Prezident mükafatlarının verilməsi haqqında” dövlətimizin başçısının 2014-cü il 1 fevral tarixli Sərəncamına əsasən elm, təhsil, mədəniyyət, ədəbiyyat və ictimai fəaliyyət sahələrində xüsusi fərqlənən bir qrup gəncə mükafatlar verilib.
Qeyd olunub ki, Gənclər və İdman Nazirliyi tərəfindən ötən il 5 milyon 500 min manat dəyərində 137 layihə maliyyələşdirilib, 23 şəhər və rayonda gənclər evi-mərkəzi istifadəyə verilib, daha 14-ünün tikintisinə başlanılıb.
Gəncə şəhərinin Avropa Gənclər Forumunun təşkil etdiyi müsabiqədə 2016-cı ilin “Avropa gənclər paytaxtı” seçilməsi isə xüsusi qeyd olunmalıdır.
Sonra gənclər və idman nazirinin müavini İntiqam Babayev hesabat xarakterli məruzə ilə çıxış edib. Ötən bir ildə görülən işlərdən danışan İ.Babayev deyib ki, gənclər arasında keçirilmiş sosioloji tədqiqatlarların nəticəsi olaraq bir çox sənədlər, o cümlədən “Gənclər və gənc ailələr üçün ipoteka kreditlərinin alınması imkanlarının genişləndirilməsinə dair təkliflərin hazırlanması” aidiyyəti dövlət qurumları ilə razılaşdırılma mərhələsini keçdikdən sonra Nazirlər Kabinetinə təqdim edilib.
Vurğulanıb ki, dövlət gənclər siyasətinin ən vacib istiqamətlərindən olan vətənpərvərlik tərbiyəsi işinin həyata keçirilməsi, gənclərin Vətənə məhəbbət, dövlətçiliyə sədaqət, milli-mənəvi dəyərlərimizə hörmət ruhunda tərbiyə edilməsi sahəsində bir çox işlər görülüb.
Daha sonra Gənclər və İdman Nazirliyinin şöbə müdiri İndira Hacıyeva “İstedadların hazırlığı laboratoriyası” layihəsi barədə məlumat verib.
Əlaqələndirmə Şurasının iclası digər çıxışlarla davam etdirilib, dövlət orqanlarına təqdim edilmək üçün bir sıra təkliflər irəli sürülüb.

Paylaş:

Baxılıb: 970 dəfə