Bakıda “Kitabxana-informasiya sahəsində əldə edilmiş nəzəri və təcrübi nailiyyətlərin tətbiqi” mövzusunda birinci Beynəlxalq elmi konfrans keçirilir

Bakı:

28 °C

55 %

11 m/s

AZ RU EN

Ana səhifə / Siyasət / Bakıda “Kitabxana-informasiya sahəsində əldə edilmiş nəzəri və təcrübi nailiyyətlərin tətbiqi” mövzusunda birinci Beynəlxalq elmi konfrans keçirilir

Bakıda “Kitabxana-informasiya sahəsində əldə edilmiş nəzəri və təcrübi nailiyyətlərin tətbiqi” mövzusunda birinci Beynəlxalq elmi konfrans keçirilir

02.04.2014 [09:35]

Aprelin 1-də “ADA” Universitetində “Kitabxana-informasiya sahəsində əldə edilmiş nəzəri və təcrübi nailiyyətlərin tətbiqi” mövzusunda birinci Beynəlxalq elmi konfrans öz işinə başlayıb.
AzərTAc xəbər verir ki, bu ali məktəbin Mədəniyyət və Turizm Nazirliyi ilə birgə təşkil etdiyi konfransı açan “ADA” Universitetinin rektoru, səfir Hafiz Paşayev artıq 8 ildir fəaliyyət göstərən təhsil müəssisəsinin yaradılmasına elə kitabxanadan başlandığını diqqətə çatdırıb. Bildirib ki, artıq niyyətimizin birinci mərhələsi həyata keçib. Hazırda kitabxana kampusun mərkəzindədir və burada dünya təcrübəsinin ən yaxşı nailiyyətləri tətbiq olunub.
Hər bir elm və təhsil ocağının əsas hissəsinin kitabxana olduğunu deyən rektor Hafiz Paşayev müasir dövrdə kitabxananın rolu və iş üslubunun çox dəyişdiyini diqqətə çatdırıb. Rektor konfransın keçirilməsi təşəbbüsünü dəstəkləyən Mədəniyyət və Turizm Nazirliyin rəhbərliyinə təşəkkürünü bildirib.
Mərasimdə çıxış edən mədəniyyət və turizm naziri Əbülfəs Qarayev konfransın keçirilməsini ölkəmizdə kitabxana-informasiya şəbəkəsinin inkişafına yönələn mühüm təşəbbüs kimi yüksək qiymətləndirib.
Nazir qeyd edib ki, kitabxana şəbəkəsi təkcə paytaxtda deyil, Azərbaycanın hər rayonunda və kəndində mövcuddur. Dövlətin məqsədi ölkə üzrə bütün sahələrin inkişafının kitabxana şəbəkəsi vasitəsilə yerlərə çatdırılması və bu şəbəkənin insanların tələbatına cavab verən bir formatda fəaliyyət göstərməsidir. Hazırda Azərbaycanda fəaliyyət göstərən 11 min kitabxanadan təqribən 4 minə yaxını nazirliyin şəbəkəsinə daxildir.
Vurğulanıb ki, Azərbaycan Respublikasının Prezidenti İlham Əliyevin 2008-ci il 6 oktyabr tarixli Sərəncamı ilə təsdiq olunmuş “Azərbaycan Respublikasında kitabxana - informasiya sahəsinin 2008-2013-cü illərdə inkişafı üzrə” Dövlət Proqramı müvafiq istiqamətdə çox böyük işlərin həyata keçirilməsinə, kitabxana işini tamamilə yeni səviyyəyə qaldırmağa imkan yaradıb. Hazırda növbəti proqramın hazırlandığını deyən nazir görülən işlərin nəticəsi olaraq “kitabxana” anlayışının öz əvvəlki rəflərdə kitabların saxlanması çərçivəsindən çıxaraq kitabxana-informasiya mərkəzi məzmunu kəsb etdiyini diqqətə çatdırıb. Qeyd edib ki, respublika üzrə rayonların yarısından çoxunda artıq kitabxana-informasiya şəbəkəsi fəaliyyət göstərir.
Azərbaycan Milli Kitabxanasının bu sahə üzrə beynəlxalq qurumlar arasında öz fəallığı ilə seçildiyini qeyd edən nazir burada ən müasir standartların tətbiq olunduğunu bildirib. Müasir dövrdə kitabxananın internet vasitəsilə oxucu auditoriyasının genişləndiyini deyən natiq ötən il ilk dəfə Azərbaycanda milli internet kitabxana şəbəkəsinin yaradıldığını diqqətə çatdırıb.
“ADA” Universitetinin tədris işləri üzrə prorektoru, doktor Patrik Kvin hər bir ideyanın mərkəzində kitabxananın durduğunu, kitabxanasız inkişafın mümkünsüzlüyünü qeyd edib, bu gün müvafiq sahənin yeni formatda xidmət göstərməsinin əhəmiyyətindən söhbət açıb.
Çıxışlarda beynəlxalq elmi konfransın sessiyalarında müzakirə ediləcək mövzuların bu istiqamətdə inkişafa və əməkdaşlığa öz töhfəsini verəcəyinə inam ifadə olunub.
Sonra konfrans işini sessiyalarla davam etdirib.
Beş sessiyadan ibarət konfrans müasir kitabxanalarda informasiya xidməti, kitabxanalarda tədris və tədqiqat işlərinin düzgün istiqamətləndirilməsi, rəqəmsal elmlər, kitabxanaların rəqəmsallaşdırılması və digər mövzuları əhatə edir.
Konfransın birinci günündə “Müasir kitabxanalarda informasiya xidmətləri”, “Kitabxanalarda tədris və tədqiqat qlobal elmi-tədqiqat cəmiyyətinin bir hissəsi kimi”, “Onlayn informasiyaya ümumçıxış” mövzuları üzrə sessiyalarında çıxışlar dinlənilib və müzakirələr aparılıb.
Beynəlxalq konfransda Böyük Britaniyanın Aberisvits Universitetinin kitabxana xidmətinin rəhbəri Culiya Hart, Qazaxıstanın Nazarbayev adına Universiteti kitabxanasının meneceri Cim Agee, Tbilisi Dövlət Universitetinin rektoru İrakli Qaribaşvili və Azərbaycanın ali məktəblərinin və digər kitabxanaların nümayəndələri iştirak edirlər.
Aprelin 2-də konfrans işini davam etdirəcək.

Paylaş:

Baxılıb: 924 dəfə