Siyavuş Novruzov: Müxalifət heç vaxt Azərbaycan xalqı haqqında düşünmür

Bakı:

18 °C

77 %

3 m/s

Əlaqə

AZ RU EN

Ana səhifə / Siyasət / Siyavuş Novruzov: Müxalifət heç vaxt Azərbaycan xalqı haqqında düşünmür

Siyavuş Novruzov: Müxalifət heç vaxt Azərbaycan xalqı haqqında düşünmür

21.06.2014 [11:11]

Yeni Azərbaycan Partiyası (YAP) İcra katibinin müavini, millət vəkili Siyavuş Novruzov parlamentin iyunun 20-də keçirilən növbədənkənar iclasında Türkiyə diplomatlarının İŞİD təşkilatı tərəfindən girov götürülməsinə münasibət bildirib. SİA-nın xəbərinə görə, millət vəkili deyib ki, Türkiyə Azərbaycan üçün qardaş ölkədir: “Əgər bu gün türk diplomatlarına qarşı bu cür addımlar atılırsa, deməli, bu hərəkət bizə qarşı da edilir. Bu baxımdan, NATO Parlament Assambleyasının 86-cı Rouz-Rout seminarının yekun bəyannaməsində Assambleyanın prezidenti də NATO ölkələrindən xahiş etdi ki, bu məsələyə dəstək göstərsinlər. Hesab edirəm ki, biz də hansısa formada bu məsələyə dəstək göstərməliyik”.
Siyavuş Novruzov, həmçinin, qeyd edib ki, seminarda iştirak edən Ermənistandan olan deputatların əsas informasiya mənbəyi Azərbaycanda olan bir sıra müxalifət partiyalarıdır: “Erməni deputatlar bir sıra QHT-lərin materiallarını misal gətirərək Azərbaycan əleyhinə həqiqəti əks etdirməyən fikirlər səsləndirirdilər. Dəfələrlə dediyimiz kimi, bu da onu göstərir ki, müxalifət heç vaxt Azərbaycan xalqı haqqında düşünmür. Onlar həmişə erməni və digər düşmənlərlə əlbir olmağa hazırdırlar ki, Azərbaycan haqqında hər hansı bir mənfi informasiya yayılsın. Həmin seminarda da bunun şahidi olduq”.
Millət vəkili onu da qeyd edib ki, müxalifət partiyaları parlamentdə QHT-lərlə bağlı qanun layihəsinə edilən dəyişiklikləri tamam başqa bir formada müxtəlif beynəlxalq təşkilatlara çatdırırlar: “Guya QHT-lər hüquq-mühafizə orqanlarının nəzarəti altına düşür, hər dəqiqə onlara hesabat verirlər. Qeyd etməliyəm ki, həmin qanunda konkret olaraq şəffaflıq məsələsi ortaya qoyulub ki, QHT-lərin xaricdən aldığı qrantı hansı formada xərcləməsi barədə ictimaiyyətə məlumat verilsin. Məgər qanunda hansı qəbahətli iş var? Hesab edirəm ki, qanun layihəsi aydın şəkildə bir daha ictimaiyyətə şərh olunmalıdır”.
Spiker Oqtay Əsədov isə millət vəkili Siyavuş Novruzovun səsləndirdiyi fikirlərə belə münasibət bildirib: “Bir daha təkrar edirəm ki, Azərbaycan müharibə şəraitində yaşayan ölkədir. Azərbaycanın milli maraqları hər şeydən öndə gedən məsələdir. Əgər milli maraqlarda Azərbaycanın mövqeyini dəstəkləməyən və buna zidd fikirlər söyləyən varsa, həmin şəxsləri bütün media nümayəndələri görür. Bir-iki qəzetdən başqa heç bir yerdə bu haqda məlumat görmədim. Lakin kimsə bir-birini söysə, bütün mətbuatda bu barədə yazılar dərc olunur. Ona görə bu məsələləri parlamentlə yanaşı, mediada da qabartmaq lazımdır”.

Paylaş:

Baxılıb: 851 dəfə