Baş nazirin müavini Əli Həsənov: Ermənistan beynəlxalq konvensiyaların tələblərini pozur

Bakı:

19 °C

55 %

3 m/s

Əlaqə

AZ RU EN

Ana səhifə / Siyasət / Baş nazirin müavini Əli Həsənov: Ermənistan beynəlxalq konvensiyaların tələblərini pozur

Baş nazirin müavini Əli Həsənov: Ermənistan beynəlxalq konvensiyaların tələblərini pozur

19.07.2014 [11:12]

AzərTAc xəbər verir ki, məcburi köçkünlər üçün salınan yeni qəsəbədə tikinti işlərinin gedişi ilə bağlı vəziyyəti öyrənmək üçün Ağdam rayonunda olan Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov jurnalistlərin Kəlbəcər rayonu ərazisində azərbaycanlıların girov götürülməsi ilə bağlı suallarını cavablandırıb.
Əli Həsənov bildirib ki, azərbaycanlıların girov götürülməsi ilə bağlı Ermənistan tərəfi həqiqətə uyğun olmayan məlumatlar yayır. Onları diversant kimi təqdim edirlər. Guya onlar diversiya xarakterli işlər görmək istəyirdilər.
Bütün bunları cəfəngiyat adlandıran Baş nazirin müavini deyib: “Bizdə olan məlumata görə, onlar bir neçə dəfə öz kəndlərinə, doğulduqları yerə gediblər. Onlar mülki vətəndaşlardır və öz doğma ocaqlarına, əzizlərinin məzarlarını ziyarət etmək üçün bu addımı atıblar. Ermənistan tərəfinin özünün də etiraf etdiyi kimi, əgər onlar bir neçə dəfə doğma Kəlbəcər rayonuna gediblərsə, həmin vaxtlarda hansı pis hərəkəti ediblər?! Hansı partlayışı törədiblər, kimə xəsarət yetiriblər?! Heç kimə. Onlar sadəcə olaraq, Vətənini sevən insanlar kimi doğulduqları yerləri ziyarət ediblər”.
Məsələnin Azərbaycan Prezidentinin nəzarəti altında olduğunu deyən Əli Həsənov bildirib ki, bu işlə gündəlik məşğul olunur. Baş nazirin müavini sözünə davam edərək deyib: “Məlumat dəqiqləşdirildikdən dərhal sonra Beynəlxalq Qızıl Xaç Komitəsinin Azərbaycandakı nümayəndəliyinə bildirildi ki, təcili olaraq Yerevanda, yaxud Xankəndidə olan ofisləri ilə əlaqəyə girsinlər. Həmin ofislər vasitəsilə girov götürülən insanlarla təcili görüş istəsinlər. Bu vaxta qədər əlaqəyə girə bilməyiblər. Bu, bir daha onu göstərir ki, Ermənistan tərəfi beynəlxalq konvensiyaların tələblərini pozur. Ermənistanın özünün də Beynəlxalq Qızıl Xaç Komitəsi ilə müqaviləsi var. Ermənistan həmin müqaviləni pozaraq beynəlxalq hüququn tələblərinə əməl etmir. Həmişə olduğu kimi, dünyaya meydan oxuyur. Bu hadisədən bir həftədən çox keçib. Ancaq bu günədək Beynəlxalq Qızıl Xaç Komitəsinə girovlarla görüş verilməyib. Biz təxmini bilirik ki, onlar girov götürdükləri dinc azərbaycanlılara qarşı hansı vəhşilikləri tətbiq edirlər.
Mən azərbaycanlı qaçqın məcburi köçkünlər adından Ermənistan rəhbərliyinə müraciət edirəm. Əgər Ermənistan rəhbərliyi, bu ölkənin xüsusi xidmət orqanları o iki vətənpərvər azərbaycanlıya işgəncələr versələr və belə bir fakt aşkara çıxarılsa, Azərbaycan xalqında özlərinə qarşı yaratdıqları nifrəti 10 qat artıracaqlar. Azərbaycan xalqı, xüsusən məcburi köçkünlər o vətəndaşlarımızı qəhrəman hesab edirlər”.

Paylaş:

Baxılıb: 680 dəfə