Vətəndaşlar ölkəmizdə dərman vasitələrinin qiymətlərinin tənzimlənməsini dəstəkləyirlər

Bakı:

24 °C

66 %

3 m/s

Əlaqə

AZ RU EN

Ana səhifə / Siyasət / Vətəndaşlar ölkəmizdə dərman vasitələrinin qiymətlərinin tənzimlənməsini dəstəkləyirlər

Vətəndaşlar ölkəmizdə dərman vasitələrinin qiymətlərinin tənzimlənməsini dəstəkləyirlər

23.09.2015 [10:26]

Əli Əhmədov: Qarşıda duran daha vacib məsələ dərman vasitələrinin keyfiyyətinə nəzarəti gücləndirməkdir
Məlum olduğu kimi, son illər Azərbaycanda bütün sahələr dinamik inkişaf edir. Səhiyyə sektorunun da inkişafı ilə bağlı islahatlar dövlətin həyata keçirdiyi sosial siyasətin başlıca istiqamətlərindən birini təşkil edir. Səhiyyə ilə bağlı mühüm dövlət proqramlarının hazırlanaraq həyata keçirilməsi, əhalinin sağlamlığının daha etibarlı şəkildə qorunması, onların ən yüksək səviyyədə tibbi xidmətlərlə əhatə olunması sözügedən istiqamətdə gerçəkləşən siyasətin əsas prioritetlərini təşkil edir.
Bu istiqamətdə həyata keçirilən tədbirlərdən biri də dərman vasitələrinin qiymətlərinin tənzimlənməsidir. Prezident İlham Əliyevin tapşırığına əsasən, hökumət dərman vasitələrinin qiymətlərinin dövlət tərəfindən tənzimlənməsi istiqamətində sistemli iş aparır. Eyni zamanda, dərman vasitələrinin keyfiyyətinə nəzarət məsələsində də hökumət ciddi addımlar atmaqdadır.
Qeyd edək ki, Azərbaycan Respublikası Prezidentinin 18 mart 2015-ci il tarixli Fərmanı ilə Nazirlər Kabinetinə dövlət qeydiyyatına alınmış dərman vasitələrinin qiymətlərinin tənzimlənməsi və həmin qiymətlərə nəzarətin həyata keçirilməsi qaydasının, Tarif (qiymət) Şurasına isə dövlət qeydiyyatına alınmış dərman vasitələrinin qiymətlərinin tənzimlənməsinin təmin edilməsi tapşırılıb. Fərmanın icrasını təmin etmək məqsədilə Nazirlər Kabineti tərəfindən 3 iyun 2015-ci il tarixli qərarla “Dövlət qeydiyyatına alınmış dərman vasitələrinin qiymətlərinin tənzimlənməsi və həmin qiymətlərə nəzarətin həyata keçirilməsi Qaydası” təsdiq edilib. Bu gün dərman bazarında olan durum, qiymətlərinin tənzimlənməsi və keyfiyyəti əhalinin çox böyük marağına səbəb olub. Xatırladaq ki, Tarif Şurasının iclaslarında ümumilikdə 1057 dərman vasitəsi üzrə qiymətlər təsdiq olunub. Prezident İlham Əliyevin tapşırığına uyğun olaraq, dərman vasitələrinin qiymətlərinin tənzimlənməsi prosesi davam etdirilir.
Məsələnin aktuallığını nəzərə alaraq Azərbaycan Respublikası Baş nazirinin müavini, Yeni Azərbaycan Partiyası Sədrinin müavini - İcra katibi Əli Əhmədov dünən Bakı şəhərində yerləşən bir sıra apteklərdə əhaliyə göstərilən xidmətlərin vəziyyəti ilə maraqlanıb. Səməd Vurğun küçəsi-113 ünvanında yerləşən “Zeytun” aptekinə gələn Əli Əhmədov burada dərman preparatlarının qiyməti və keyfiyyəti ilə tanış olub, aptek işçilərinin problemləri ilə maraqlanıb və onlara öz tövsiyələrini verib. Bu sahədə qiymət tənzimlənməsinin dövlət başçısının tapşırığı əsasında həyata keçirildiyini deyən Baş nazirin müavini atılan addımların vətəndaşların maraqlarına uyğun olduğunu bildirib.
Səhiyyə nazirinin müavini Elsevər Ağayev isə Səhiyyə Nazirliyinin bu sahədə vəziyyətin daha da təkmilləşdirilməsi istiqamətində əlavə tədbirlər həyata keçiriləcəyini qeyd edib. Söhbət zamanı aptekin müdiri Elşən Həsənov və aptekdə çalışan əczaçılar da dərman vasitələrinin satışının yeni qayda ilə həyata keçirildiyini, dərmanların qiymətlərinin tənzimlənməsi ilə bağlı qərarı alqışladıqlarını bildiriblər.
Daha sonra jurnalistlərə açıqlama verən Baş nazirin müavini Əli Əhmədov deyib ki, sentyabrın 15-dən etibarən Tarif Şurası tərəfindən təsdiq edilmiş 25 təsiredici maddə üzrə 1057 adda dərman vasitəsinin yeni qiymətləri qüvvəyə minib. Onun sözlərinə görə, artıq ölkənin bütün apteklərində həmin dərman vasitələrinin eyni qiymətə satışı həyata keçirilir: “Satışına icazə verilən digər dərmanların qiymətləri isə yaxın vaxtlarda müəyyənləşəcək. Bu addımın atılması heç də təsadüfi deyil. Son vaxtlaradək Azərbaycanın dərman bazarında dərman satışında vahid qiymətin olmaması əsas problemlərdən biri idi. Prezident İlham Əliyevin Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı nitqində dərmanların qiymətləri ilə bağlı iradlarından sonra bu istiqamətdə müvafiq tədbirlər görülməyə başlanılıb. Məqsəd əhaliyə göstərilən tibbi xidmətin səviyyəsinin yüksəlməsinə nail olmaq, dərmanların baha qiymətə satılmasının qarşısını almaqla vətəndaşların büdcəsinə müsbət təsir göstərməkdir”.
Əli Əhmədov qeyd edib ki, bu praktika dünyanın əksər ölkələrində tətbiq olunub və Azərbaycan da dünya praktikasına əsasən bu prosesi həyata keçirir. Onun sözlərinə görə, qarşıda duran daha vacib məsələ dərman vasitələrinin keyfiyyətinə nəzarəti gücləndirməkdir: “Dərmanların keyfiyyətli olması ən vacib məsələdir. Bu funksiyanı Səhiyyə Nazirliyinin nəzdində yaradılmış qurum həyata keçirir. Söz yox ki, bu qurum öz fəaliyyətini daha da gücləndirəcək. Burada yaradılan şərait onu göstərir ki, Azərbaycanın dərman bazarı ciddi şəkildə nizam-intizama cəlb olunur. Bu, ondan xəbər verir ki, atılan addım doğrudur və vətəndaşlar tərəfindən yüksək qiymətləndirilir”.
Bu tədbirlərin dərman qıtlığı yaradıb-yaratmaması məsələsinə gəlincə, Əli Əhmədov bildirib ki, Azərbaycanda lazımi dərman ehtiyatı var və bu, daim idarə olunan bir prosesdir. Səhiyyə Nazirliyinin bu istiqamətdə qabaqlayıcı tədbirlər gördüyünü deyən Əli Əhmədovun fikrincə, ola bilsin ki, dərmanların qiymətlərinin tənzimlənməsi ilə əlaqədar qısa vaxtda problemlər ortaya çıxsın, amma gələcəkdə onlar tamamilə aradan qaldırılacaq: “Ölkədə dərman qıtlığı olmayacaq. Dünyada çoxlu dərman növləri var. Apteklərimizdə bir adda dərmanın tapılmaması o tərkibdə dərmanın olmaması anlamına gəlmir. Ölkəyə idxal olunan bütün bahalı və ucuz dərmanların üzərində Tarif Şurasının müəyyənləşdirdiyi qiymətlər olacaq. Məqsədimiz Azərbaycana bahalı dərmanların idxal olunmasının qarşısını almaq deyil. Söhbət ondan gedir ki, gətirilən dərmanların üzərinə daha yüksək qiymətlər qoyulmasın”.
Qeyd edək ki, aptekdən dərman alan vətəndaşlar da dərman vasitələrinin qiymətlərinin tənzimlənməsindən razılıqlarını ifadə ediblər. Bildirilib ki, Tarif Şurasının məlum qərarlarından sonra bəzi dərman vasitələrinin qiyməti üç, bəzilərinin qiyməti isə iki dəfə azalıb.
Nardar BAYRAMLI

Paylaş:

Baxılıb: 635 dəfə